2 KORINTOEK 13 - BUKUIT NE TILIL

Kateunoik. Konyonei Paulo

¹ Ni ko ne bo somok anyonjinok. Kigimiti ng’olyot age tugul eng’ kutuswekab baorinik aeng’ anan ko somok.

² Kiasib amwa, ak asib amwae kogeny, ko u ye kiami eng’ banda ne bo aeng’, ko u noto nguno ye mami kobotok, eng’ icheget che kiyai tengekto, koboch yoto, ak eng’ chun alak tugul, ale, si ma ye anyo kogeny, ko marirege;

³ amu ocheng’e kaborunetab Kristo ne ng’alali eng’ ane; ne ma nyalulat eng’ okwek, ago tinyei kimnatet eng’ okwek:

⁴ amu kigigartat eng’ nyalulet, ago sobei eng’ kamuktaetab Jehovah. Amu ki nyalulyotin ak achek eng’ inendet, ago kisoptosi koboto inendet eng’ kamuktaetab Jehovah agobo okwek.

⁵ Osiaige okwege, ngomi eng’ kayanet; otiemge okwege. Anan mongen okwege ole mitei Jesu Kristo eng’ okwek? Iyois ko o esiootin iman.

⁶ Ago amang’u ale ongen ole ma ki esiootin.

⁷ Kisae Jehovah anyun si moyai yaitio age tugul; ma si ketoogu kele kigiyanech, ago si kobiit oyai noto mie, agot nganda ko u che kiesioi.

⁸ Amu magimuchi keyai kiy ne kirindoi imanit, ago ne toreti imanit.

⁹ Amu ki boiboen ye ki nyalulyotin, ago o kimen: kisae agobo nito agine, kele oegu che igesunotgei.

¹⁰ Amu noto anyun, asire tuguchu ko ma ami, si ma ye tun ami ko maboisie koromnatet, ko u ole te bounatet ne kigona Kiptaiyat agobo teekset, ma agobo butet.

Ng’alek che bo let

¹¹ Ne bo let anyun, che kitupche, ko saisere. Oegu che chobotin; oegu che bo kagaigaet; oegu che bo kabwatet agenge; otebi eng’ kalyet: ak mi Jehovah ne bo chamnyet ak kalyet kobotok.

¹² Ogatge eng’ ng’ututet ne tilil.

¹³ Igatok bik tugul che tililen.

¹⁴ Ingotebi ak okwek tugul mieindab Kiptaiyat Jesu Kristo, ak chamnyetab Jehovah, ak yamdaetab Tamirmiriet ne Tilil.