2 KORINTOEK 12 - BUKUIT NE TILIL

Keersosiek che bo barak, ak nyalulnatosiek che ibu kaming’inetab ge

¹ Kanyol alosge, agot ngo manyolu; ago aityini keersosiek ak ng’ang’utik che bo Kiptaiyat.

² Angen chito eng’ Kristo, koboch nguno ko kenyisiek taman ak ang’wan (ngo kimi eng’ borto, ko mangen; anan ngo kiga komanda eng’ borto, ko mangen; ingen Jehovah), ale kigimut inendet kotogosta agoi kipsengwet ne bo somok.

³ Ak angen chichoto (ngo kimi eng’ borto, anan kima ko ta komi eng’ borto, ko mangen; ingen Jehovah),

⁴ ale kigimut kotogosta agoi Paradis, ak kigas ng’alek che ma mwaoksei, che ma chamdaat komwa chi.

⁵ Alosuge agobo chichoto: ago malosuge agobo anege, kobate eng’ nyalulnatosiekyuk.

⁶ Amu ngot amache alosge, ko maberberitu; amu amwae ne bo iman: ago asise, si mat koiita chi age tugul kosiir ne te ne keerjina, anan ye kasena.

⁷ Ak eng’ oindo ne siirtoot ne bo ng’ang’utik - si ma kitorora mising’, ko kigigona katet eng’ borto, ne otwoget ne bo Setani kobira, si ma kitorora mising’.

⁸ Kiasom Kiptaiyat mising’ konyil somok agobo kiito, ale koistoenogei.

⁹ Ak kilenja, Yamin mieindanyu: amu kiyaei kamugennyu koek ne igesunotgei eng’ nyalulet. Alosuge anyun eng’ boiboiyet mising’ kosiir amu nyalulnatosiekyuk, si kobiit kotebena kamugetab Kristo.

¹⁰ Noto anyun, abaibai eng’ nyalulnatosiek, eng’ ng’woninwek, eng’ kagiigosiek, eng’ usisiosiek, eng’ tiritinwek, agobo Kristo: amu ye a nyalulat, ko yoto anyun ye a kim.

Kogetyingei Paulo kalosunet ne ilusunegei

¹¹ Kaaberberitu: kiobirja; amu kota nyolu oloswa okwek: amu kima a bo let eng’ kiy age tugul eng’ che koiyoktoi che eechen kosiir, agot ngo ma a kiy.

¹² Iman kigiyae kwenung’wong’ kaborunoik che bo ne kiyoktoi eng’ muitaet tugul, eng’ kaborunoik ak kwong’utik ak boisionik che bo kamuktaet.

¹³ Amu tos mi nee ne kiyaak oegu che nyerotin eng’ kanisosiek alak, kobate kima aegu nyigisin eng’ okwek? Onyoiywa kaat lelutionito.

¹⁴ Ogeero, nito ko ne bo somok achoboksei ale anyonjok; ak manyone aegu nyigisindo eng’ okwek: amu macheng’e tugukwok, ago okweget: amu manyoljin lagok kogonorji tuguk sigik, ago konorjin sigik lagok.

¹⁵ Ak abaibai mising’ aboisie chechuk ak keboisena agobo sobonwekwok. Ngot achamok mising’ kosiir, ko tos kichama kitigin?

¹⁶ Ago ngo u noto, ko kima agonok nyigisindo; ago atinye ng’omnatet, ak kianamak eng’ mestet.

¹⁷ Tos kiaibenok kiy eng’ chi age tugul eng’ icheget che kiayokwok?

¹⁸ Kiatechi Tito, ak kiayokte ne kitupche koba tuwai. Tos kiibenok Tito kiy? Kima kebendoti eng’ Tamirmirionoto agenge? Tos ma eng’ tiegutik che kergei?

¹⁹ Obwati agoi nguno olen kisoruge eng’ taing’wong’. Eng’ taitab Jehovah keng’alali eng’ Kristo. Ago tuguk tugul, ko si keteechak, chamanichu.

²⁰ Amu aiywei, ale si ye anyo, ko manyoruok eng’ or age tugul ko u ye mamache, ak onyorua ko u ye momache; si mabiit eng’ or age tugul, boriosiek, ng’etkonda, neregek, suriosiek, ng’aksosiek, chaamsosiek, menotosiek, bolatosiek;

²¹ si ye tun anyo kogeny, ko maiming’ina Jehovah nenyu eng’ taing’wong’, ak arir agobo che chang’ eng’ ichek che kiyai tengekwogik koboch yoto, ama sik eng’ simdo ak sokset ak maget ne ya agobo tuguk che yaach che kiyai ichek.