2 KORINTOEK 10 - BUKUIT NE TILIL

Komwaei Paulo kole bunu Jehovah ng’alekyi

¹ Asomok anyun ane Paulo eng’ talasiet ak mutyonetab Kristo, ane ne ming’in ye ami kobotok eng’ kwenung’wong’, ago ye mami kobotok atinye nyiganatet:

² ee, asomok, ale si manyiganitu ye ami kobotok eng’ kamang’unet ne kona aiit ale a nyigan eng’ alak, che iitech kole kibendoti eng’ atebetab borto.

³ Amu agot ngebendoti eng’ borto, ko magiyae luget eng’ atebetab borto

⁴ (amu karikab lugennyo ko ma bo borto, ago tinyei kamuget eng’ taitab Jehovah koluul irimosiek);

⁵ kiluuli kabwatutik, ak kiy age tugul ne toror ne ieetegei kole kogirinda naetab Jehovah, ak koluulei kabwatet age tugul si kobiit kogas it Kristo;

⁶ ko ki chobotin keyaakyi mugetut bistoet tugul, ye tun isulda kaseng’wong’ bo it.

⁷ Ogeere tuguk che mitei taitab konyekwok. Ngot komang’ugei chi age tugul kole bo Kristo, ko ingoruchi nito kogeny inegei, kole, ko u ye bo Kristo inendet, ke u noto agachek.

⁸ Amu agot ngo nyolu alosge mising’ kitigin agobo kimnatennyo (ne kigon Kiptaiyat si kobiit koteechak, ama si koluulok), ko malilani;

⁹ si maegu ne amutenok baronokyuk.

¹⁰ Amu mwaei ichek kole, Baronokyik ko nyigisen ak ko kimen; ago nyalulat inendet ye mitei tainywa, ama tilei kiy ng’alekyik.

¹¹ Ingobwat ne u noto, ni, kole, kit ne ki u eng’ ng’olyot eng’ baronok ye magimi, ke u noto agine eng’ boisiet ye kimitei.

¹² Amu ma ki nyigonen kiitge anan kirogege alak eng’ ichek che ilosugei: ago ichek ichegei korogege ge ichegei, ak koyaniege ge ichegei, ko matinyei kaguiyet.

¹³ Ago magitororige kosiir ne te ne yamei, ago ko u ole te karogendoet ne kiikwaiywech Jehovah, kot keitu olong’wong’.

¹⁴ Amu magiyogoitoige kosiir, ko u ne magiitu olong’wong’: amu kigebwa agoi olong’wong’ eng’ logoiywek che miach che bo Kristo:

¹⁵ ama kilosuge kosiir ne te ne yamei, eng’ boisionikab bik alak; ago kimang’u kele, ko u ye tesoksei kayaneng’wong’, kitororech eng’ okwek ko u ole te kakwaennyo, kot kosiir,

¹⁶ si kobiit keamde logoiywek che miach agot eng’ komoswek che mi komosin eng’ olong’wong’, ama kilosuge eng’ kakwaetab chi age eng’ tuguk che kigechob.

¹⁷ Ago inendet ne ilosugei, ingolosgei eng’ Kiptaiyat.

¹⁸ Amu ma inendet ne ilosugei ne kiyani, ago inendet ne ilosu Kiptaiyat.