2 KORINTOEK 1 - BUKUIT NE TILIL

Kagatet ak kongoi

¹ Paulo, ne kiyoktoi ne bo Kristo Jesu eng’ magetab Jehovah, ak Timoteo tupchennyo, kisirjini kanisetab Jehovah ne mitei Korinto, koboto che tililen tugul che mitei Akaya komugul:

² Ingoteb kobotok mieindo ak kalyet ne bunu Jehovah Kwandanyo ak Kiptaiyat Jesu Kristo.

³ Iberurot Jehovah ne Kwandab Kiptaiyandennyo Jesu Kristo, Kwanda ne bo rirenosiek ak Jehovah ne bo kagaigaet tugul;

⁴ ne igoigoech eng’ bichiindanyo tugul, si kimuch kigaigai icheget che mi bichiin age tugul, eng’ kagaigaet ne igoigoenech Jehovah.

⁵ Ko u ye katesak eng’ achek nyalilwogik che bo Kristo, ko u noto katesak kagaigaennyo eng’ Kristo.

⁶ Ago nginyalilech, ko agobo kagaigaeng’wong’ ak yetuneng’wong’; anan ngigoigoech, ko agobo kagaigaeng’wong’, ne boisiei eng’ muitaet ye omuitoi eng’ nyalilwogichoto kinyalili agachek:

⁷ ak lumdaat kamang’unennyo agobo okwek; kingen kele, ko u ye o yamdoik che bo nyalilwogik, ko u noto o yamdoik che bo kagaigaet.

⁸ Amu magimache oegu che mongen, che kitupche, agobo bichiindo ne kinyoruech eng’ Asia, ale kisiebech mising’, kosiir kamugennyo, kot ko ma ketinyei kamang’unetab sobet.

⁹ Ee, kigitinye acheget kiruogetab meet eng’ orinnyo, si mata kimang’uge, ago Jehovah ne ing’eeti che begu:

¹⁰ ne kisoruech eng’ meet ne o ne te ni, ak ta kosoruech: ne kimang’u kele ta ko soruech kogeny;

¹¹ otoretech ak okwek kibagenge eng’ someng’wong’; si kobiit kogoito kongoi bik che chang’ agobo achek, amu konunet ne kigigonech eng’ toretetab che chang’.

Tililindo ne kiindochin kabwatutikab Paulo

¹² Amu kalosunennyo ko ni, baornatetab kabwatennyo, kele kigiteptoi tililindo ak atepto ne matinyei kenisiet, ne bo Jehovah, eng’ ng’ony, ma eng’ ng’omnatetab borto ago eng’ mieindab Jehovah, ak ne siirei mising’ ko eng’ komostang’wong’.

¹³ Amu magisirwok tuguk alak tugul, kobate choto che osomani anan onai, ak amang’u ale onai agoi let:

¹⁴ Agot ko u ye kionaech kitigin, ole achek ko ki kalosuneng’wong’, agot ko u ye o kalosunennyo ak okwek, eng’ betutab Kiptaiyandennyo Jesu.

Kagaetabge ne bo Paulo si ma sib koit Korinto

¹⁵ Ak eng’ kayanonito ko kiabwati isib anyonjok si kobiit onyoru mieindo ne bo aeng’;

¹⁶ ak abune olong’wong’ awendi Makedonia, ak kogeny abunu Makedonia anyone olong’wong’, si omonorseiwa eng’ bandanyu awendi Judea.

¹⁷ Ye kingabwat ko u noto, ko tos kiaurereni? Anan tuguk che a begechini ale ayae, ko tos abegechini ko u atebetab borto, si kobiit koek eng’ ane ee, ee, ak achicha, achicha?

¹⁸ Ago ko u ye bo iman Jehovah, ng’olyondennyo eng’ okwek ko ma ee ak achicha.

¹⁹ Amu Weritab Jehovah, Jesu Kristo, ne kigiamde eng’ kwenung’wong’, ane ak Silbano ak Timoteo, ne kima ko ee ak achicha, ago eng’ inendet ko wei.

²⁰ Amu agot ngo tia arorutikab Jehovah, eng’ inendet ko wei: ak kogeny eng’ inendet ko Amen, agoi torornatetab Jehovah eng’ achek.

²¹ Nguno anyun, inendet ne igimitech kobotok eng’ Kristo, ak ne kiilech, ko Jehovah;

²² ak king’ochech, ak kogonech Tamirmiriet eng’ mugulelwekyok koek tongoaniatab tuguk che bwanei.

²³ Ago aguure Jehovah koek baoriat eng’ sobondanyu, ale, si ko manyo Korinto, ko kiarirenak.

²⁴ Ma kele kitinye bounatet eng’ kayaneng’wong’, ago ki toretik che bo boiboiyeng’wong’: amu otonondosi eng’ kayaneng’wong’.