2 JOHANA 1 - BUKUIT NE TILIL

Imanda ak chamnyet

¹ Ane boiyot ne asirjini chebioset ne lewenot ak lagokyik, che achame eng’ imanit; ago ma anege kityo, ago tugul che ingen imanit agichek;

² agobo imanit ne menyech ak kotebyei kobotech koigeny:

³ tebyei kobotech mieindo ak rirenet ak kalyet che bunu Jehovah Kwanda ak Jesu Kristo, Weritab Kwanda, eng’ imanit ak chamnyet.

⁴ Abaibai mising’ amu kianyoru lagoguk alak kobendoti eng’ imanit, ko u ye kigetaach ng’atutiet ne bunu Kwanda.

⁵ Ak nguno anyun chebiosoni, asomin mising’, ma kele kasirun ng’atutiet ne leel, ago noto kigitinye koboch taunet, ale kechamnye.

⁶ Ak ni ko chamnyet, ale kebendate kisub ng’atutikyik. Nito ko ng’atutiet, ko u ye kiogas koboch taunet, ale obendate ng’atutionoto.

⁷ Amu kigomong’ji ng’ony kenik che chang’, ichek che mang’anyei kole kinyo Jesu Kristo eng’ borto. Nito ko kenindet, ak ko kirindoindetab Kristo.

⁸ Oripge, si momete tuguk che kigeyai, ago si onyoru melekto ne nyiitat.

⁹ Chi age tugul ne indoi ama tebyei eng’ konetisietab Kristo ko matinyei Jehovah; inendet ne tebyei eng’ konetisiet kotinyei tuwai, Kwanda ak Werit.

¹⁰ Ngot konyonjok chi ama ibu konetisioni, ko mat otaach inendet eng’ gorikwok, amat ogat:

¹¹ amu inendet ne igati ko kayamda ak inendet boisionikyik che yaach.

¹² Amu atinye tuguk che chang’ che katasirwok, ko mamache asir eng’ kartasit ak wino: ago amang’u anyonjok, ak keng’alal togoch eng’ togoch, si kobiit kosulda boiboiyennyo.

¹³ Igatin lagokab chepkomet ne lewenot.