2 ATEPTAP PEETUUSYEK 9 - BUKUIT NE TILIL

Korutochin laitoriatab Sheba, Solomon: magornatetab Solomon, ak meenyi

¹ Ak kingogas laitoriatab Sheba, ne ki kwondo, kalosunetab Solomon, konyo Jerusalem koboto bik che chang’, ak tambesik che ibei tuguk che ng’uu ne anyiny, ak tahabusiek che chang’, ak koik che bo kamanutiet ne o, konyo kotiem Solomon eng’ teebutik che uuen: ak kingoit ole mi Solomon, kong’alal ak inendet agobo tuguk tugul che kimi muguleldanyi.

² Ak kiwolji Solomon inendet teebutikyik tugul: ak kima komi kiy age tugul ne kigiung’e Solomon ne ma mwachi inendet.

³ Ak kingo kagogeer laitoriandanato bo Sheba ng’omnatetab Solomon, ak got ne kiga teech,

⁴ ak amitwogikyik, ak ole teptoi otwogikyik, ak tononet ne tononjin boisiet kiboitinikyik, ak ngoroikwak, ak bikyik agichek che ipchin tuguk che eei, ak ngoroikwak; ak kagochinoikyik che kibeelei che kiigoitoi eng’ gotab Jehovah; kogesgei anyun kimnatennyi.

⁵ Ak kilenji kwonyoto laitoriat, Bo iman ng’alechu kiagase eng’ emennyu agobo boisioniguk, ak ng’omnateng’ung’.

⁶ Ago kima ayan ng’alekwak, kot anyo, ak kagogeer konyekyuk: ak keero, kima kimwawa agot kebebertab oindab ng’omnateng’ung’: isiire kalosunoni kiagase.

⁷ Boiboi biguk, ak boiboi otwogichuguk, chu tonondos eng’ taing’ung’ kotugul, ak kogasei ng’omnateng’ung’.

⁸ Iberurot Jehovah Kamuktaindeng’ung’, ne kibaibait eng’ inye, kondein ng’echerennyi ne bo laitornatet, iegu laitoriatab Jehovah Kamuktaindeng’ung’; amu kicham Kamuktaindeng’ung’ Israel, kogimit ichek koigeny, kondein anyun iegu laitoriat ibou ichek iyai kiruoget ak imanda.

⁹ Ak kiigochi kwonyoto laitoriat talentaisiek bogol ak tiptem che bo tahabu, ak tuguk ng’isiat che ng’uu ne anyiny, ak koik che bo kamanutiet ne o: ak kima biit nyamdutik che u choto kiigochi laitoriatab Sheba laitoriat Solomon.

¹⁰ Ak kiib otwogikab Huram agichek, ak otwogikab Solomon, che kiib tahabu eng’ Opir, ketikab almug, ak koik che bo kamanutiet ne o.

¹¹ Ak kiyae laitoriat ketichato bo almug ole kitogostoe eng’ gotab Jehovah, ak eng’ gotab laitoriat, ak ketubosiek ak kibugandinik che bo tienik: ak kitomo kogeerei chi tuguk che u choto eng’ emetab Juda.

¹² Ak kiigochi laitoriat Solomon laitoriatab Sheba kiy age tugul ne kimach, kiy age tugul ne kisom, ko maboto tuguk che kiga ipchi laitoriat. Ki weektagei anyun kwo emennyi, koboto otwogikyik.

¹³ Ak nyigisindab tahabu che kigiipchi Solomon eng’ kenyit agenge ko ki talentaisiek bogol lo ak tamanwogik lo ak lo che bo tahabu;

¹⁴ ama boto che kiibu bik che aldooti ak che kiibu chemung’arainik: ak kiib laitorinik tugul che bo Arabia ak bounikab emet, tahabu ak feda, koipchi Solomon.

¹⁵ Ak kiyai laitoriat Solomon, long’onik che eechen bogol aeng’ che bo tahabu che kigitany: kigiyae long’et agenge ne o sekelisiek bogol lo che bo tahabu che kigitany.

¹⁶ Ak kiyai long’onik che mengechen bogol somok che bo tahabu che kigitany; kigiyae long’et agenge sekelisiek bogol somok che bo tahabu: ak kigonore laitoriat long’onichato gotab osnetab Lebanon.

¹⁷ Ak koyai kogeny laitoriat ng’echeret ne o ne bo laitornatet eng’ kelekab belek, ak koliige tahabu che tililen.

¹⁸ Ak kimi long’eiywot ne tinyei tuguk lo che kitiegoti ketogosyin ng’echeretab laitornatet, koboto ng’echeret ne tebe kelyek ne ki bo tahabu, ne kiga kiratyi ng’echeretab laitornatet, ak kimi ketik komosi ak komosi che tiiegei eunek, ak itonwek aeng’ che bo ng’etunyik eng’ komosi ak komosi eng’ ye negite ketichato kitiie eunek.

¹⁹ Ak kitonondos itonwek tamanu ak aeng’ che bo ng’etunyik eng’ komoswek tuwai eng’ tuguchoto lo kitiegoti ketogostoi: kima komi age ne kergei ak noto ne kigiyai eng’ bororiet age tugul.

²⁰ Ki bo tahabu tuguk tugul che kieeise laitoriat Solomon, ak tuguk tugul che kigiboisie eng’ gotab osnetab Lebanon ko ki bo tahabu che tililen: kima ko kiy feda eng’ betusiekab Solomon.

²¹ Amu kitinyei laitoriat melisiek che kibendi Tarsis koboto otwogikab Huram: kiibu melisiek che bo Tarsis konyil agenge eng’ kenyisiek somok, tahabu, ak feda, ak kelekab belek, ak tisok, ak taritik che kiguure tausi.

²² Kisiir anyun laitoriat Solomon laitorinik tugul che bo ng’ony eng’ magornatosiek ak ng’omnatet.

²³ Ak kicheng’ laitorinik tugul che bo ng’ony kogeer Solomon, kogas ng’omnatennyi, ne kiinde Kamuktaindet muguleldanyi.

²⁴ Ak kiib chi tugul kagochinennyi, tugukab feda, ak tugukab tahabu, ak ngoroik, karikab luget, ak nyamdutik, ak mbartanyisiek, ak nyumbusiek, koitet ne kigigonu eng’ kenyit age tugul.

²⁵ Ak kitinyei Solomon gorik elfusiek ang’wan che bo mbartanyisiek ak karisiek, ak bik elfusiek taman ak aeng’ che bo mbartanyisiek, che kiinde nganasokab karisiek, ak che kimi ole mi laitoriat eng’ Jerusalem.

²⁶ Ak kibou laitorinik tugul koboch Ainet agoi emetab Pilistik, ak agoi kiwotetab Misri.

²⁷ Ak kiyai laitoriat feda eng’ Jerusalem koigei koik, ak kiyai eng’ chang’indo taragonik koigei mogoonik che mi emet ne soi.

²⁸ Ak kigigetyi Solomon mbartanyisiek eng’ Misri, ak eng’ emotinwek tugul.

²⁹ Ak tos ma kisirji boisionikab Solomon che kang’et, che bo tai ak che bo let, bukuitab ng’alekab maotiot Natan, ak eng’ maoinatetab Aija Silonindet, ak eng’ ng’ang’utikab keerindet Ido agobo Jeroboam weritab Nebat?

³⁰ Ak kilaitoran Solomon eng’ Jerusalem koboi Israel tugul kenyisiek artam.

³¹ Ak kiru Solomon koboto kwanisiekyik, ak kigitupchi nganasetab Daudi kwandanyi: ak kilaitoran Reoboam werinnyi kogeer inendet.