2 ATEPTAP PEETUUSYEK 8 - BUKUIT NE TILIL

Teeksosiekab Solomon ak tuguk alak che kiyai

¹ Ak kingo kagogesgei kenyisiek tiptemu, che kiteege Solomon gotab Jehovah, ak gonnyi,

² koteech Solomon nganasok che kiga kogochi Huram Solomon, ak kogochi lagokab Israel komeny oloto.

³ Ak kiwa Solomon Hamat-seba, ak koterter.

⁴ Ak kiteech Tadmor eng’ ong’atet, ak nganasok tugul che kigonore tuguk, che kiteech eng’ Hamat.

⁵ Kiteech kogeny Bet-horon ne bo meto, ak Bet-horon ne rektoot, nganasok che ng’ototin, che kitinyei irimoik, ak ormarichok, ak temeleiywek;

⁶ ak Baalat, ak nganasok tugul che kigonorisie che kitinyei Solomon, ak nganasok tugul che bo karisiekyik, ak nganasokab bik che lanyei mbartanyisiekyik, ak tuguk tugul che bo magennyi che kicham Solomon koteech eng’ Jerusalem, ak eng’ Lebanon, ak eng’ emet tugul ne bo bounatennyi.

⁷ Ago bik tugul che king’et eng’ Hitik, Amorik, Perisik, Hibik, ak Jebusik, che kima ko bo Israel;

⁸ king’at Solomon kelewen bik eng’ lagokab bichoto che kiga ng’et eng’ emet, che kima bar lagokab Israel koges, koek otwogik agoi rani.

⁹ Ago kima yai Solomon lagokab Israel koek otwogik che yaei boisiennyi; ago kiek murenikab luget, ak che eechen eng’ kiptainikyik, ak bounikab karisiekyik ak murenikyik che kilanyei mbartanyisiekyik.

¹⁰ Chu ko ki kiptainik che eechen che bo laitoriat Solomon, bik bogol aeng’ ak konom, che kibou bik.

¹¹ Ak kiimut Solomon cheptab Parao kotogos eng’ nganasetab Daudi konyo got ne kiga koteekyi inendet: amu kile, Mamenyei osotiondennyu gotab Daudi laitoriatab Israel, amu tililen komoswek che kinyo moingetab Jehovah kotebe.

¹² Kiigochi anyun Solomon Jehovah kagochinoik che kibeelei eng’ kaptisisietab Jehovah, ne kiga koteech eng’ taitab keterut,

¹³ ko u ye yamei boisietab betut age tugul, kogoitoi ko u ng’atutietab Musa, eng’ sabatosiek, ak eng’ ye kaleel arawet, ak eng’ igorwek che kiging’at, konyil somok eng’ kenyit, igorta ne bo makatinik che ma kinde mermerek, ak igortab wigisiek, ak igortab keriosiek.

¹⁴ King’at ripsosiekab tisiik eng’ otisienywa, ko u ng’atutietab Daudi kwandanyi, ak king’at Lawik, koyai boisionikwak, si kolosu ak koboisiei eng’ taitab tisiik, ko u ye yamei boisietab betut age tugul: ak king’at ribikab kurget agichek koyai ripsosiekwak eng’ kurget age tugul: amu kiga ng’at Daudi chitab Kamuktaindet ko u noto.

¹⁵ Ak kima meto ng’atutietab laitoriat ne king’at tisiik ak Lawik agobo ng’olyot age tugul, anan agobo konoraik.

¹⁶ Kechob anyun boisiet tugul ne bo Solomon kot koit betut ne kilume lumeiywotab gotab Jehovah, agoi kogesgei. Kiigesgei anyun boisietab gotab Jehovah.

¹⁷ Yeityo kwo Solomon Esion-geber ak Elot, che mi ngegutab emetab Edom.

¹⁸ Ak kiiyokyi Huram melisiek inendet koyoktae otwogikyik, ak otwogik che ingen nyanjet; ak kibwa Opir koboto otwogikab Solomon, ak koib eng’ oloto talentaisiek che bo tahabu bogol ang’wan ak konom, koipchi laitoriat Solomon.