2 ATEPTAP PEETUUSYEK 6 - BUKUIT NE TILIL

Saetab Solomon ak katabanetab hekalut

¹ Kong’alal anyun Solomon kole, Kile Jehovah, menyei inendet mesundeito ne o.

² Ago kaateegun got ne imenye, komostang’ung’ ne imenye koigeny.

³ Ak kiwelelgei laitoriat, ak koberur tuiyet tugul ne bo Israel: ak kitonon tuiyet tugul ne bo Israel.

⁴ Ak kile, Iberurot Jehovah, Kamuktaindetab Israel, ne king’alalji eng’ kutinnyi baba Daudi, ak kagoyai eng’ eunnyi kosulda, kole,

⁵ Koboch betut ne kiamutu bikyuk eng’ emetab Misri, ko malewen nganas eng’ ortinwek tugul che bo Israel ateech got, si kobiit kotebe yoto kainennyu; amalewen chi age tugul koek bounindet koboi bikyuk Israel:

⁶ ago kialewen Jerusalem, si kobiit kotebe yoto kainennyu; ak kialewen Daudi koboi bikyuk Israel.

⁷ Ak kimi muguleldab baba Daudi kole koteekyi got kainetab Jehovah, Kamuktaindetab Israel.

⁸ Ago kilenji Jehovah kwandanyu Daudi, Amu kimi muguleldang’ung’ iteekyi got kainennyu, ko kiiyai kit ne mie ibwat ko u noto eng’ muguleldang’ung’:

⁹ ago ma inye ne teechei goyoto; ago wering’ung’ ne mong’une bortang’ung’, inendet ne teekyin kainennyu got.

¹⁰ Ak kagoyai Jehovah ng’olyondennyi ne kimwa; amu kiabiitu ageer kwandanyu Daudi; ak atebe ng’echeretab laitornatet ne bo Israel, ko u ye kiiaror Jehovah, ak koateekyi got kainetab Jehovah, Kamuktaindetab Israel.

¹¹ Ak kiande yoto moinget, ne mi orit arorutietab Jehovah, ne kiyai ak lagokab Israel.

¹² Ak kitonon inendet eng’ taitab kaptisisietab Jehovah, eng’ taitab tuiyet tugul ne bo Israel, ak koiito eunekyik:

¹³ (amu kiga yai Solomon eng’ sugunwet ole kitororit, ne koindanyi ko ki kakwautik mut che bo eut, ak tebeesindanyi ko ki kakwautik mut, ak koindab tononennyi ko ki kakwautik somok, ak konde kwenutab seremut; ak kotonone, ak kogutuny eng’ taitab tuiyet tugul ne bo Israel, ak koiito eunekyik kotokyigei kipsengwet:)

¹⁴ ak kile, Ee Jehovah, Kamuktaindetab Israel, mami Kamuktaindet age ne u inye, eng’ kipsengwet, anan eng’ ng’ony; ne ribei kayomiset ak rirenet ak otwogiguk, che bendote taing’ung’ eng’ mugulelwekwak tugul:

¹⁵ ne kiisuldochi otwogindeng’ung’ baba Daudi kit ne kiiyomisyi inendet: ee kiimwa eng’ kuting’ung’, ak kaiyai eng’ eung’ung’ kosulda, ko u kit ne u rani.

¹⁶ Ara anyun, ee Jehovah, Kamuktaindetab Israel, isuldochi otwogindeng’ung’ baba Daudi kit ne kiiyomisyi, ilenji, Mabetenen chito ne tebe ng’echeretab laitornatet ne bo Israel eng’ tainnyu, ngot korib lagoguk ortinwekwak, kobendate ng’atutiennyu, ko u ye kiiwendote tainnyu.

¹⁷ Ara anyun, ee Jehovah, Kamuktaindetab Israel, ingogimit ng’olyondeng’ung’, ne kiimwachi otwogindeng’ung’ Daudi.

¹⁸ Ago tos menyei Kamuktaindet ak bik iman eng’ ng’ony? Keero, mayamin kipsengwet itebe, anan ko kipsengwet ne bo kipsengwetisiek; ko ming’in ne tia anyun goi koateech!

¹⁹ Ago konyit saetab otwogindeng’ung’, ak somennyi, ee Jehovah Kamuktaindennyu, kas rirek ak saet ne saei otwogindeng’ung’ eng’ taing’ung’:

²⁰ si kobiit kogeer konyeguk goi bet ak kemoi, kogeer komosta ne kiimwa ile indoi kaineng’ung’; si igas saet ne saei otwogindeng’ung’ kotokyingei komosit.

²¹ Ak igas somutikab otwogindeng’ung’, ak biguk Israel, ye saei kotokyingei yuto; ee kas anyun eng’ ole imenye, eng’ kipsengwet; ak ye igas, inyochi kaat.

²² Ngot kolelji chi chitab kokwennyi, ak kebirji inendet koyosio, ak konyo koyosio eng’ taitab kaptisisieng’ung’ eng’ goi:

²³ igas anyun eng’ kipsengwet, ak iyai, ak iruoksechi otwogiguk, iyaakyi mugetut inendet ne kalel, si inde kotebe metinnyi ortinwekyik, ak iityi imanda inendet ne bo iman, igochi inendet ko u imandanyi.

²⁴ Ak ngot kebar biguk Israel eng’ taitab bunik, amu kigoyaun tengekto ak koweek kogeny ak kong’any kaineng’ung’, ak kosa, ak koririo eng’ taing’ung’ eng’ goi:

²⁵ igas anyun eng’ kipsengwet, ak inyochi kaat biguk Israel eng’ tengektanywa, ak imutu ichek kogeny kobwa emet ne kiigochi ichek ak kwanisiekwak.

²⁶ Ye kerak kipseng’wet, ak kobet ropta, amu kigoyaun tengekto, ko ngot kosa kotokyigei komosi, ak kong’any kaineng’ung’, ak koweek eng’ tengektanywa, ye inyalil ichek:

²⁷ igas anyun eng’ kipsengwet, ak inyochi kaat otwogiguk eng’ tengektanywa, ak ne bo biguk Israel, ye ineti ichek oret ne mie ne nyolu kobendate; ak iyokyi ropta emeng’ung’, ne kiigochi biguk koek borotenywa.

²⁸ Ngot kobiit rubet eng’ emet, anan ko koroito, ngot kobiit chelalitiet anan ko uchatet, chereng’endet anan ko kutiet; ngot koyiem ichek bunikwak eng’ emetab nganasokwak; anan kobiit koroito age tugul anan ko miando age tugul;

²⁹ ko saet anan ko somet age tugul ne kasom chi age tugul, anan ko ne kasom biguk tugul che bo Israel, ne naei chi age tugul miandanyi ak arogenennyi, ak koiito eunekyik kotokyi goi:

³⁰ igas anyun eng’ kipsengwet oldang’ung’ ole imenye, ak inyochi kaat ak iyaakyi chi age tugul ko u ortinwekyik tugul, ne ingen muguleldanyi; (amu inye inyege ne ingen mugulelwekab werikab bik;)

³¹ si kobiit koiywein ak kobendate ortinweguk kote kosoptos eng’ emet ne kiigochi kwanisiekyok.

³² Ak eng’ chito ne bo bororiosiek, ne ma bo biguk Israel, ngo nyo eng’ emet ne loo agobo kaineng’ung’ ne o, ak agobo eung’ung’ ne kim, ak eung’ung’ ne chuulat; ye bwa ak kosa kotokyigei goi:

³³ igas anyun eng’ kipsengwet eng’ oldang’ung’ ole imenye, ak iyai ko u tuguk tugul che kaguurjin chichoto bo bororiosiek; si kobiit konai kaineng’ung’ bik tugul che bo ng’ony, ak koiywein, ko u ye iywein biguk Israel, ak si kobiit konai kole goi kiateech kemwaitoe kaineng’ung’.

³⁴ Ngot koba biguk kobargei ak bunikwak, eng’ oret age tugul ne keyoktae, ak kosain kotokyigei nganasani kiilewen, ak goi koateekyi kaineng’ung’:

³⁵ igas anyun eng’ kipsengwet saenywa, ak somenywa, ak iyachi ichek kit ne machei.

³⁶ Ngot koyaun tengek, (amu mami chi ne mayaei tengek,) ak inerekyi, ak igochi ichek bunikwak koluul ichek komut koba emet ne loo anan ko ne negit;

³⁷ ago ngot kobwatgei eng’ emet ne kigimut koek luulenik ak kosik, ak korirjin eng’ emet ne kigiluulji ichek, kole, Kigeyai tengekto, kigeyai kit ne imaasat, kigeyai kit ne ya kot;

³⁸ ngot koweekyingei eng’ mugulelwekwak tugul ak eng’ sobonwekwak tugul eng’ emet ne kigiluulji ichek, ole kigimut ichek koek luulenik, ak kosa kotokyigei emenywa, ne kiigochi kwanisiekwak, ak nganaset ne kiilewen, ak got ne koateekyi kaineng’ung’:

³⁹ igas anyun eng’ kipsengwet eng’ oldang’ung’ ole imenye, saenywa ak somutikwak, ak iyachi ichek kit ne machei; ak inyochi kaat biguk che kigoyaun tengekto.

⁴⁰ Ara anyun, ee Kamuktaindennyu, asain ale, ingogeer konyeguk, ak ingogas itiguk saet ne kisaei eng’ yuto.

⁴¹ Ara anyun, ng’eet, ee Jehovah Kamuktaindet, nyo oli imuung’e, inye ak moingetab kimnateng’ung’: ingolaach tisiiguk yetunet, ee Jehovah Kamuktaindet, ak ingoboiboitu biguk che tililen eng’ mieindo.

⁴² Ee Jehovah Kamuktaindet, ameiste togetab neng’ung’ ne iilat: ibwat rirenosiekab Daudi otwogindeng’ung’.