2 ATEPTAP PEETUUSYEK 5 - BUKUIT NE TILIL

¹ Kiigesgei anyun boisiet tugul ne kiyai Solomon agobo gotab Jehovah. Ak kiib Solomon tuguk che kiga kotaban Daudi kwandanyi, kobwa go, feda, ak tahabu, ak tuguk che kiboisie, ak konde ole kigonore konoraik che bo gotab Kamuktaindet.

Kebei Moinget kwo hekalut

² Kiiyum anyun Solomon boisiek che bo Israel, ak kandoik tugul che bo ortinwek, bounik che bo kwanisiekab lagokab Israel, kobwa Jerusalem, koib moingetab arorutietab Jehovah kotogos eng’ nganasetab Daudi, ne noto ko Sion.

³ Ak kiiyumgei bik tugul che bo Israel eng’ ole kimi laitoriat eng’ igorta, ne kimi eng’ arawetab tisab.

⁴ Ak kibwa boisiek tugul che bo Israel, ak kigonob Lawik moinget.

⁵ Ak kiib moinget ak emait ne kituiyechin, ak terenik tugul che tililen che kimi Emait; kiib choto kotogos tisiik, Lawik.

⁶ Ak kimi taitab moinget laitoriat Solomon ak tuiyet tugul ne bo Israel, che kiga iyumgei eng’ ole mi inendet, koenyei kechirek ak eik, che kima kimuchi kerar anan ko kiit eng’ chang’indo.

⁷ Ak kiib tisiik moingetab arorutietab Jehovah konyo ole tebe eng’ got ne bo orit, ole tilil mising’, kureretab kebebaikab kerubisiek.

⁸ Amu kiga iito kerubisiek kebebaikwak kouur ole mi moinget, ak kituch kerubisiek moinget ak ketikyik che kiibe.

⁹ Ak ki koen ketichato mising’, ak ki toogu walisiekwak eng’ moinget eng’ taitab got ne bo orit; ago kima ko toogu sang’: ak mi yoto agoi ra.

¹⁰ Kima komi kiy moinget orit kobate koik aeng’ che lebelen che kiindoi Musa eng’ Horeb, kingoyaei Jehovah arorutiet ak lagokab Israel, ye kimong’u eng’ Misri.

¹¹ Ak kingomong’ tisiik eng’ ole tilil, (amu tisiik tugul che kimi yoto, ko kiga kotililgei, ak ma rib ripsosiekwak;

¹² ak kitononso Lawik agichek, che ki tienik ichek tugul, che choto ko Asap, Heman, Jedutun, ak werikwak ak tupchosiekwak, kolaachi katanisiek che kororon, ak kotinyei sanisiekab sugunonik che kibirei ak kibugandinik ak ketubosiek, eng’ komostab kong’asis ne bo kaptisisiet, ak kimi koboto ichek tisiik bogolu ak tiptem che kuutei iriagok:)

¹³ ak kingoyomogei bik che kuutei iriagok ak tienik koek agenge, si kotien cheet agenge kegas eng’ kalosunet ak komwachin Jehovah kongoi; ak kingotien eng’ kutit ne o eng’ iriagok ak sanisiekab sugunonik, ak kibugandinikab tienwogik, ak kolos Jehovah, kole, Amu mie inendet; bo koigeny rirenennyi: konyi got anyun boldet, ne noto ko gotab Jehovah,

¹⁴ ne mata komuch tisiik kotononso kobois amu boldonoto: amu kinyi lilindab Jehovah gotab Kamuktaindet.