2 ATEPTAP PEETUUSYEK 4 - BUKUIT NE TILIL

Tuguk che kindoi hekalut orit

¹ Kiyai kogeny kaptisisietab sugunonik, ki kakwautik tiptem che bo eut koindanyi, ko kakwautik tiptem che bo eut tebeesindanyi, ak ki kakwautik taman che bo eut koindab tononennyi.

² Ak kiyai nyanjet ne kitanyi ne bo kakwautik taman che bo eut, kong’eete taban agoi taban, ne kigitainganat, ak ki kakwautik mut che bo eut koindab tononennyi; ak kimi mireiywot ne bo kakwautik sosom che bo eut.

³ Ak kimi itonwekab eik ng’onyutab mireiywot, che kiyiem kotuiyo, che bo kakwautik taman che bo eut, che kiyiemei nyanjanato. Ki aeng’ eichato, che kigitanyi, ye kigitanyi nyanjet.

⁴ Kiga tonone nyanjanato itonwekab eik, taman ak aeng’, kogeerei somogu murot ne bo katam, kogeerei somogu cherongo, kogeerei somogu murot ne bo tai, kogeerei somogu kong’asis: ak kitonone baragunywa nyanjanato, ak kigeer sugulumwekwak orit.

⁵ Ak kiaechin tebeesindanyi ak nyigisindab eut; ak kigiyai mireiywondennyi kogergeit ak mireiywotab kikombet, ko u taptet ne kaiye: ak kiyamegei ak debeisiek elfusiek lo.

⁶ Ak kiyai tabok taman che eechen, ak kiinde mut komostab eutab tai, ak kiinde mut komostab eutab katam, si kiunse; kigiune choto tuguk che bo kagochinoik che kibeelei: ago ki bo nyanjet tisiik si kounegei.

⁷ Ak kiyai kelyek taman che bo tait eng’ tahabu ko u ng’atutiet ne kiging’at agobo tuguchoto; ak kiinde hekalut orit, kiinde mut komostab eutab tai, konde mut komostab eutab katam.

⁸ Ak kiyai kogeny mesosiek taman, ak konde hekalut, kiinde mut komostab eutab tai, konde mut komostab eutab katam. Ak kiyai tabok bogol che mengechen che bo tahabu.

⁹ Ak kiyai kogeny seremutab tisiik, ak seremut ne o, ak kereiywek che bo seremut, ak koliige sugunonik kereiywekab kurgotikwak.

¹⁰ Ak kiinde nyanjanato komostab tai, kogeer kong’asis, kotokyigei murot ne bo tai.

¹¹ Ak kiyai Huram terenik, ak kechigosiek che eechen, ak tabok che mengechen. Kiiges anyun Huram boisiet ne kiyachi laitoriat Solomon eng’ gotab Kamuktaindet:

¹² tolochik aeng’, ak bagulisiek, ak metowek aeng’ che kimi baragutab tolochichoto; ak karichato aeng’ regerotin, kotuch bagulisiechoto aeng’ che kimi baragutab tolochik;

¹³ ak itonwekab logoek bogol ang’wan che bo karichato aeng’ regerotin; ortinwek aeng’ che bo logoek che bo karnet age tugul ne kigireger, kotuch bagulisiechoto aeng’ bo metowek che kimi baragutab tolochik.

¹⁴ Kiyai kogeny ng’echerok ak tabokwak che eechen, che kimi ng’echerochoto,

¹⁵ nyanjanato agenge, ak itonwekab eik taman ak aeng’ che kimi kureretab nyanjanato.

¹⁶ Ak kiyai kwandab Huram terenik agichek, ak kechigosiek che eechen, ak karik che kirutune banyek, ak tugukyik tugul, koyachi laitoriat Solomon kobunji gotab Jehovah, kiyae sugunonik che sitotin.

¹⁷ Kiyai laitoriat tuguchoto eng’ Atebwetab Jordan, eng’ ole mi menet eng’ kwenutab Sukot ak Sereda.

¹⁸ Kiyai anyun Solomon tuguchuto tugul eng’ chang’indo: amu ma imuch chi konai nyigisindab sugunonik.

¹⁹ Ak kiyai Solomon tuguk tugul che kimi gotab Kamuktaindet, kapkorosutab tahabu, ak mesosiek che kitebe makatinikab kabartaet;

²⁰ kiyae tahabu che tililen kelyekab taisiek koboto taisiekwak, si kobiit kolaldos eng’ taitab got ne bo orit, ko u ye kiging’at;

²¹ ak kiyae tahabu, tahabu ne ma burugot ak kiy, taptok, ak taisiek, ak kanameiywek;

²² ak magasisiek, che tilei ole lalei eng’ taisiek, ak tabok che mengechen, ak kechigosiek, ak terenik che kiibe mat, kiyae choto tahabu che tililen: ak ki bo tahabu ole kigibunei kebendi go, ak kereiywekab kurgotikyik che bo orit che bo ole tilil mising’, ak kereiywekab kurgotikab got, noto hekalut.