2 ATEPTAP PEETUUSYEK 36 - BUKUIT NE TILIL

Laitornatetab laitorinik alak, ak ng’emisietab Jerusalem

¹ Kiieet anyun bikab emet Jeoahas weritab Josia koek laitoriat eng’ Jerusalem kogeer kwandanyi.

² Ki bo Jeoahas kenyisiek tiptem ak somok ye kitau kolaitorani: ak kilaitoran arawek somok eng’ Jerusalem.

³ Ak kiribe laitornatennyi laitoriatab Misri eng’ Jerusalem, ak kimage emet talentaisiek bogol che bo feda ak talentait agenge ne bo tahabu.

⁴ Ak kiieet laitoriatab Misri ng’etab kamet Eliakim koboi Juda ak Jerusalem, ak kiweech kainennyi koguure Jeoiakim. Ak kiimut Neko ng’etab kamet Jeoahas kwo Misri.

⁵ Ki bo Jeoiakim kenyisiek tiptem ak mut ye kitau kolaitorani; ak kilaitoran kenyisiek taman ak agenge eng’ Jerusalem; ak kiyai ne ya eng’ taitab Jehovah Kamuktaindennyi.

⁶ Kitogos Nebukadnesar laitoriatab Babulon konyo kobargei ak inendet, ak kirate inendet mugurek, komut kwo Babulon.

⁷ Kiib kogeny Nebukadnesar terenikab gotab Jehovah koba Babulon, ak konde hekalunnyi eng’ Babulon.

⁸ Ak boisionik che ng’etunotin che bo Jeoiakim, ak tuguk che kiwechei che kiyai, ak tuguk che yaach che kiginyorji inendet, ogeero, sirotin eng’ bukuitab laitorinikab Israel ak Juda: ak kilaitoran Jeoiakin werinnyi kogeer inendet.

⁹ Ki bo Jeoiakin kenyisiek sisiit ye kitau kolaitorani; ak kilaitoran arawek somok ak betusiek taman eng’ Jerusalem: ak kiyai ne ya eng’ taitab Jehovah.

¹⁰ Ak ye kingogesgei kenyit koyok laitoriat Nebukadnesar bik komut inendet konyo Babulon, koboto terenik che kororon che bo gotab Jehovah, ak kiieet Sedekia ng’etab kamet koek laitoriat koboi Juda ak Jerusalem.

¹¹ Ki bo Sedekia kenyisiek tiptem ak agenge ye kitau kolaitorani: ak kilaitoran kenyisiek taman ak agenge eng’ Jerusalem.

¹² Ak kiyai ne ya eng’ taitab Jehovah Kamuktaindennyi; kima iming’injigei maotiot Jeremia ye king’alal ng’alek che bunu kutitab Jehovah.

¹³ Ak kiingelelji kogeny laitoriat Nebukadnesar, ne kiga birji koyosio eng’ Kamuktaindet: ago kiiuuiit kaatinnyi ak muguleldanyi, ma weekyigei Jehovah, Kamuktaindetab Israel.

¹⁴ Kiingelelso kogeny mising’ tisiik tugul che eechen, ak bik, kosub tuguk tugul che kiwechei che bo bororiosiek; ak kiimuruon gotab Jehovah ne kiga kotaban eng’ Jerusalem.

¹⁵ Ak kiiyoktoi Jehovah, Kamuktaindetab kwanisiekwak, bikyik, komusta koba ole mi ichek; amu kirire bikyik, ak ole menyei inendet.

¹⁶ Ago kireny bichoto kiiyoktoi Kamuktaindet, ak kisas ng’alekyik, kogengenie maotikyik, agoi konerekyi Jehovah bikyik, kot ko ma komi kit ne kinyae.

¹⁷ Komutyi anyun icheget laitoriatab Kaldiek, ne kinyo kobar neranikwak eng’ rotwetab chok, eng’ gotab oldanywa ne tilil, ama rire muren anan tie, boiyot anan ne negit kolil: kiinde tugul eunnyi.

¹⁸ Ak kiib anyun tuguk tugul che bo gotab Kamuktaindet, che eechen ak che mengechen, ak konoraikab gotab Jehovah, ak konoraikab laitoriat, ak che bo bounikyik, kiib tugul koba Babulon.

¹⁹ Ak kibeel gotab Kamuktaindet, ak kobut irimetab Jerusalem, ak kobeel gorik tugul che bo laitoriat, ak kong’em tuguk tugul che kororon che kimi gorjoto.

²⁰ Ak kiimut koba Babulon che kiga chililye rotwetab chok; ak kiek otwogikyik ak che bo werikyik agoi bounatetab Persia:

²¹ si kosulda ng’olyotab Jehovah ne kimwa eng’ kutitab Jeremia, agoi kogasegei emet sabatosiekyik: amu kirib sabatosiekyik eng’ betusiechoto kima komenyei chi, kot kosulda kenyisiek tamanwogik tisab.

²² Ak eng’ kenyit ne bo tai ne bo Kirus laitoriatab Persia, si kobiit kosulda ng’olyotab Jehovah ne kimwa eng’ kutitab Jeremia, kochirjir Jehovah tamirmirietab Kirus laitoriatab Persia, si komwaita eng’ bounatennyi tugul, ak kosirta kogeny, kole,

²³ Kamwa ko u ni Kirus laitoriatab Persia, kole, Kigona Jehovah, Kamuktaindetab kipsengwet, bounatosiek tugul che bo ng’ony; ak king’ata ateekyi got eng’ Jerusalem, ne mi Juda. Ingotogosta age tugul eng’ okwek che o bo bikyik tugul, ak ingoteb Jehovah Kamuktaindennyi koboto chichoto.