2 ATEPTAP PEETUUSYEK 32 - BUKUIT NE TILIL

¹ Kingobata tuguchoto, ak boisionichoto be iman, konyo Senakerib laitoriatab Asuria, kochut Juda, ak koteech koyiem nganasok che ng’ototin, kolen koman ichek kobunji.

² Ak kingogeer Hesekia kole kagonyo Senakerib, ak kobegechinot kobar Jerusalem,

³ kong’alal ak bounikyik ak bikyik che kimen, si koger beekab kondametusiek che kimi sang’utab nganaset; ak kitoret bichoto inendet.

⁴ Koyumgei anyun bik che chang’, ak koger kondametusiek tugul, ak kererut ne kirootei eng’ kwenutab emet, kole, Amu nee si kobwa laitorinikab Asuria, ak konyor beek che chang’?

⁵ Ak kinyiganit, ak koteech irimet tugul ne kiga kobutok, ak kiteech koaechin ak teeksosiek che koen, koboto irimet age ne kitobonu sang’, ak kogimit Milo eng’ nganasetab Daudi, ak kiyai karik ak long’onik che chang’.

⁶ Ak kiinde kiptainikab luget koboi, ak koyum kobwa ole mi inendet eng’ ole baraa eng’ ormarichetab nganaset, ak kocheer ichek kolenji,

⁷ Ogimegitu, ak onyiganitu, amoiyweisie anan otoptobense amu laitoriatab Asuria, anan agobo tuiyet tugul ne mi koboto inendet: amu mi ne o kobotech kosiir ne mi ak inendet.

⁸ Mi koboto inendet eut ne bo borto; ago mi kobotech Jehovah Kamuktaindennyo kotoretech, ak koyai lugosiekyok. Ak kitiiegei bik ng’alekab Hesekia laitoriatab Juda.

⁹ Kingobata nito koyokto Senakerib laitoriatab Asuria otwogikyik koba Jerusalem, (kimi ole negite Lakis, koboto lugennyi tugul,) oldab Hesekia laitoriatab Juda ak oldab Juda tugul che kimi Jerusalem, kolenji,

¹⁰ Kamwa ko u ni Senakerib laitoriatab Asuria, kole, Omang’u nee, ngotebye ak ogeere ko kageyiemak eng’ Jerusalem?

¹¹ Tos maigoigook Hesekia si kogoitook obegu eng’ rubet ak melelda, kolenjinok, Soruech Jehovah Kamuktaindennyo eng’ eutab laitoriatab Asuria?

¹² Tos ma Hesekia nito ne kiisto komoswek che tororen ak kapkorosusiekyik, ak kong’atei Juda ak Jerusalem kolenjin, Osae eng’ taitab kapkorosut agenge, ak obeele nyamdutik eng’ yoto?

¹³ Tos mongen kit ne kigiyachi, ane ak kwanisiekyuk, bororiosiek tugul che bo emotinwek? Tos kiimuchi cheptalelisiekab bororiosiek che bo emotinwek kosor emenywa eng’ or age tugul eng’ eunnyu?

¹⁴ Tos kimi ng’o eng’ cheptalelisiek tugul che bo bororiosiechoto, che kibar kwanisiekyuk koges, ne kiimuch kosor bikyik eng’ eunnyu, kot ole imuchi Kamuktaindeng’wong’ kosoruok eng’ eunnyu?

¹⁵ Noto anyun, among’ koberberak Hesekia, anan kogaigaak ko u ni, anan oyan inendet: amu mami cheptalelit ne bo boror age tugul, anan ko bounatet age tugul ne kiimuch kosor bikyik eng’ eunnyu, ak eng’ eunekab kwanisiekyuk: komuktoi ano anyun Kamuktaindeng’wong’ kosoruok eng’ eunnyu?

¹⁶ Ak kites otwogikyik kong’alal che yaach agobo Jehovah Kamuktaindet, ak otwogindennyi Hesekia.

¹⁷ Kisir kogeny baronok, kochurachur Jehovah Kamuktaindetab Israel, ak komwa che yaach agobo inendet, kole, Ko u ye ma sor cheptalelisiekab bororiosiekab emotinwek, kosor bikwak eng’ eunnyu, komasoru agine Kamuktaindetab Hesekia bikyik eng’ eunnyu.

¹⁸ Ak kiwaage bichoto bikab Jerusalem che kimi irimet barak, eng’ kutit ne o, eng’ ng’alekab Yahudik, komu ichek, ak koiim; si komuch konam nganaset.

¹⁹ Ak king’alal agobo Kamuktaindetab Jerusalem koyanie kanamonikab bik che bo ng’ony, che boisionikab eunekab bik.

²⁰ Ak kisa laitoriat Hesekia ak maotiot Isaia weritab Amos agobo ng’olyondonito, ak korirji kipsengwet.

²¹ Ak kiiyokto Jehovah malaikaiyat, ne kibar murenik tugul che kimen che nyigonen, koboto kandoik ak kiptainik, eng’ nganaset ne bo laitoriatab Asuria. Koweek anyun eng’ kalilanet kwo emennyi. Ak kingoit gotab kanamwennyi, kobar lagokyik inendet eng’ yoto eng’ rotwetab chok.

²² Kisor anyun Jehovah Hesekia ak bik che kimenyei Jerusalem, eng’ eutab Senakerib laitoriatab Asuria, ak eng’ eunekab alak tugul, ak kondochi ichek eng’ komosta age tugul.

²³ Ak kiipchi bik che chang’ Jehovah kagochinoik kobwa Jerusalem, ak kiipchi Hesekia laitoriatab Juda tuguk che bo kamanutiet ne o: kot kotororit inendet eng’ taitab bororiosiek tugul koboch betunoto agoi.

²⁴ Kimian Hesekia eng’ betusiechoto ne ki negit kome: ak kisa Jehovah; ak king’alalji Jehovah inendet ak kogochi kaborunet.

²⁵ Ago ma yai Hesekia kogeny ko u ye kiga kiyachi ko mie; amu kimen: konyonji anyun nereknatet inendet, ak Juda ak Jerusalem.

²⁶ Ago kiiming’ingei Hesekia kometo menotetab muguleldanyi, inendet koboto bik che kimenyei Jerusalem, ak kima nyonji neregekab Jehovah ichek eng’ betusiekab Hesekia.

²⁷ Ak kitinyei Hesekia magornatosiek che chang’ mising’ ak teegisto: ak kichopchigei ole kigonore feda ak tahabu, ak koik che bo kamanutiet ne o, ak tuguk che ng’uu ne anyiny, ak long’onik, ak tuguk che kororon che terotin;

²⁸ koboto chogenik che bo bek che karurio, ak divaik ak mwanik; ak gorikab tuguk alak tugul che kiyagi, ak akwotisiekab kechirek eng’ biusiek.

²⁹ Ak kichopchigei kogeny nganasok, ak kitinyei akwotisiekab kechirek ak che bo tuga eng’ chang’indo: amu kiga kogochi Kamuktaindet tuguk ng’isiat.

³⁰ Hesekia nito ne kiimaas beekab kondametut ne mi meto eng’ Gion, ak koib eng’ oret ne litit korek kobwa komostab cherongo ne bo nganasetab Daudi. Ak kibor Hesekia eng’ boisionikyik tugul.

³¹ Ago eng’ ng’alekab bik che kiiyok bounikab Babulon, che kibwa koteepse agobo kwong’utiet ne kiyaak eng’ emet, ko kibagakta Kamuktaindet inendet, kotiem si konai tuguk tugul che kimi muguleldanyi.

³² Ak boisionik che ng’etunotin che bo Hesekia, ak boisionikyik che miach, ogeero, sirotin eng’ ng’ang’utietab maotiot Isaia weritab Amos, eng’ bukuitab laitorinikab Juda ak Israel.

³³ Ak kiru Hesekia koboto kwanisiekyik, ak kigitupchi ole kitogostoe kebendi kererisiekab werikab Daudi: ak kigonyit inendet Juda tugul ak bik che kimenyei Jerusalem eng’ meenyi. Ak kilaitoran Manase werinnyi, kogeer inendet.