2 ATEPTAP PEETUUSYEK 30 - BUKUIT NE TILIL

¹ Kiiyokto anyun Hesekia keguur Israel tugul ak Juda, ak kisirji baronok Epraim ak Manase, kole kobwa gotab Jehovah eng’ Jerusalem, koripchi Jehovah paska, Kamuktaindetab Israel.

² Amu kiga komwa laitoriat koboto bounik, ak tuiyet tugul eng’ Jerusalem, kole korib paska eng’ arawet ne bo aeng’.

³ Amu kima imuch koyai eng’ betusiechoto, amu kitom koyam tisiik che kiga koanyinygei, anan koyumjigei bik Jerusalem.

⁴ Ak kimieit kioto eng’ taitab laitoriat ak tuiyet tugul.

⁵ Kogimit anyun ng’atutiet kole kemwaita eng’ Israel tugul, koboch Beer-seba agoi Dan, kole kobwa koripchi Jehovah paska, Kamuktaindetab Israel, eng’ Jerusalem: amu kitomo koribei bik che chang’ ko u noto ko u ye kigisir.

⁶ Kiib anyun bik che kiga kiyokto, baronok che kibunu laitoriat ak bounikyik, koba Israel tugul ak Juda, ko u ng’atutietab laitortiat, kolenji, Okwek, lagokab Israel, oweekyige Jehovah, Kamuktaindetab Abraham, Isak ak Israel, si komuch inendet koweekyigei bik che king’et, che kichililso eng’ okwek eng’ eunekab laitorinikab Asuria.

⁷ Amoige kwanisiekwok, ak tupchosiekwok, che kiingelelji Jehovah, Kamuktaindetab kwanisiekwak, kot kobagakta ichek koek che kikwong’e, ko u ye ogeere.

⁸ Amoegu anyun che uui kaat, ko u ye ki u kwanisiekwok; ago ogochige Jehovah, ak obe oldanyi ole tilil, ne kigotaban kobunji koigeny, ak oboisiechi Jehovah Kamuktaindeng’wong’, si koistoenogei neregekyik che koromen.

⁹ Amu ngoweekyige Jehovah, kosichei tupchosiekwok ak lagokwok rirenet eng’ taitab icheget che kiluul ichek, ak koweek kogeny kobwa emoni: amu tinyei Jehovah Kamuktaindeng’wong’ mieindo ak rirenet, ama ituktochinok batai, ngot oweekyige inendet.

¹⁰ Kibun anyun bik, che kiga kiyokto, nganaset age tugul eng’ emetab Epraim ak Manase, agoi Sebulun: ago kirorechi, kochot ichek, ak kochurachur.

¹¹ Agos kiiming’ingei alak che bo Aser ak Manase ak Sebulun, ak kobwa Jerusalem.

¹² Kimi kogeny eutab Kamuktaindet Juda si kogochi ichek muguleldo agenge, koyai ng’atutietab laitoriat ak bounik eng’ ng’olyotab Jehovah.

¹³ Ak kiiyumjigei Jerusalem bik che chang’ korib igortab makatinik che ma kinde mermerek eng’ arawetab aeng’, ki tuiyet ne o kot.

¹⁴ Kong’eetyo anyun ak koisto kaptisisiosiek che kimi Jerusalem, ak kapkorosusiek tugul che bo nyamdutik, ak kowirji kererutab Kidron.

¹⁵ Kieny anyun aruetab paska eng’ betutab taman ak ang’wan eng’ arawetab aeng’: ak kiililanso tisiik ak Lawik, ak koanyinygei, ak kiib kagochinoik che kibeelei kobwa gotab Jehovah.

¹⁶ Ak kitononso eng’ komostanywa ko u ye kiga king’at, ko u Ng’atutietab Musa chitab Kamuktaindet: kiisisie tisiik korotik che kitaachei eng’ eunekab Lawik.

¹⁷ Amu kimi che chang’ eng’ tuiyet che kitom koanyinygei: noto anyun, ki boisietab Lawik koeng’ji paska chito age tugul ne kima ko tilil, koanyinyji Jehovah.

¹⁸ Amu kitom koanyinygei che chang’ eng’ bichoto, agot che chang’ che ki bo Epraim, ak che bo Manase, che bo Isakar, ak che bo Sebulun, ago kiam alak paska ama ko u ye kigisir. Amu kiga sa Hesekia agobo ichek kole, Ingonyochi kaat Jehovah ne mie chi age tugul,

¹⁹ ne chobei muguleldanyi kocheng’ Kamuktaindet, Jehovah, Kamuktaindetab kwanisiekyik, agot ngo tomo kianyiny ko u kaanyinyetab ole tilil.

²⁰ Ak kigasyi Jehovah Hesekia, ak kosoob bik.

²¹ Ak kirib lagokab Israel che kimi Jerusalem, igorta ne bo makatinik che ma kinde mermerek, betusiek tisab eng’ kagasetab ge ne o: ak kiilos Jehovah Lawik ak tisiik betut age tugul, kotienjin Jehovah eng’ kibugandinik che cheitos mising’.

²² Kicheer anyun Hesekia Lawik tugul che ki inetotin eng’ otisietab Jehovah. Koamis anyun eng’ igorta tugul eng’ betusiek tisab, kogoitoi tiseiywek che bo kalyet, ak komwachin kongoi Jehovah, Kamuktaindetab kwanisiekwak.

²³ Ak kichamnyechi tuiyet komugul kole kota korib igorta betusiek alak tisab: ak kirib betusiek alak tisab eng’ kagasetab ge.

²⁴ Amu kiigochi Hesekia laitoriatab Juda tuiyet kirugik elfut ak kechirek elfusiek tisab, koek kagochinoik; ak kiigochi bounik tuiyet kirugik elfut ak kechirek elfusiek taman; ak kiianyinygei tisiik che chang’ kot.

²⁵ Ak kiboiboitu tuiyet komugul ne bo Juda, koboto tisiik ak Lawik, ak tuiyet tugul ne kibunu Israel, ak toek che kibunu emetab Israel, ak che kimenyei Juda.

²⁶ Kibiit boiboiyet no o anyun eng’ Jerusalem: amu koboch eng’ betusiekab Solomon weritab Daudi laitoriatab Israel ko kitomo kobiit ne u noto eng’ Jerusalem.

²⁷ Kong’eetyo anyun tisiik, Lawik, ak koberur bik: ak kigigas kutinywa, ak kitogosta saenywa kwo oldanyi ne tilil, kipsengwet.