2 ATEPTAP PEETUUSYEK 3 - BUKUIT NE TILIL

Teeksetab hekalut

¹ Kitoi anyun Solomon koteech gotab Jehovah eng’ Jerusalem eng’ tulwetab Moria, ole kimong’jine Jehovah kwandanyi Daudi, ne kichob inendet eng’ ole king’at Daudi, eng’ ruanyut ne kiborse ne bo Ornan Jebusindet.

² Ak kitoi koteekso eng’ betutab aeng’ eng’ arawet ne bo aeng’, eng’ kenyitab ang’wan ne bo laitornatennyi.

³ Chu anyun lumeiywek che kilumda Solomon agobo teeksetab gotab Kamuktaindet. Ak kiek koindo kakwautik tamanwogik lo che bo eut eng’ pimanet ne bo tai ne bo kakwautik che bo eut, ak kiek tebeesindo kakwautik tiptem che bo eut.

⁴ Ak koindab keterut ne kimi taitab got, ko u tebeesindab got, ko ki kakwautik tiptem, ak kiek koindab tononennyi kakwautik che bo eut bogol ak tiptem: ak kiiliige tahabu che tililen komostab orit.

⁵ Ak kitete got ne o ketikab biribirinik che kiiliige tahabu che kororon, ak kiwachinot itonwekab tironik ak sirimwek.

⁶ Ak kilelesonji got eng’ koik che bo kamanutiet ne o si kogararanit: ak kibunu tahabu Parbaim.

⁷ Kiiliige kogeny tahabu got, kimurtoinik, ak tugatugik, ak inatusiek, ak kereiywekab kurgotikyik; ak kiwachi inatusiek itonwekab karubisiek.

⁸ Ak kiteech got ne tilil mising’; ak kiek koindanyi kakwautik tiptem che bo eut, ko u tebeesindab got; ak kiek kakwautik tiptem che bo eut tebeesindanyi: ak kiiliigote tahabu che kororon, che kiitei talentaisiek bogol lo.

⁹ Ak kiek nyigisindab kipchumarisiek sekelisiek konom che bo tahabu. Ak kiiliige tahabu gorik che bo barak.

¹⁰ Ak kiinde itonwek aeng’ che bo karubisiek got ne tilil mising’; ak koliige tahabu.

¹¹ Ak ki kakwautik tiptem che bo eut koindab kebebaikab kerubisiek: koindab kebepchet agenge ko ki kakwautik mut che bo eut, ak kiitei inatutab got; ak ki kakwautik mut che bo eut kebepchet age, ak kitiinyegei kebepchetab kerubit age ak ne bo age.

¹² Ak ki kakwautik mut che bo eut kebepchetab kerubit age, ak kiitei inatutab got: ak ki kakwautik mut che bo eut kebepchet age agine, kotiinyegei ak kebepchetab kerubit age.

¹³ Kiga uitogei kebebaikab kerubisiechuto koit kakwautik tiptem che bo eut: ak kitonondos eng’ kelyekwak, ak kiga tokyigei togochikwak got.

¹⁴ Ak kinab anget ne kioiye got, che tuuen ne nyalil, ak che arusen ne birir, ak che biriren, ak katanit ne kararan, ak kinapchi choto kerubisiek.

¹⁵ Ak kiyai kogeny tolochik aeng’ eng’ taitab got, che bo kakwautik sosom ak mut che bo eut koindab tononennyi, ak ki bo kakwautik mut che bo eut, metit age tugul ne kimi tuguchoto barak.

¹⁶ Ak kiyai sirimwek eng’ got ne bo orit, ak konde baragusiekab tolochik; ak kiyai itonwekab logoek bogol agenge, ak koiywachi baragutab sirimwechoto.

¹⁷ Ak kilumda tolochichoto eng’ taitab hekalut, kilumda age eng’ komostab tai, kolumda age eng’ komostab katam; ak koguure ne kimi komostab tai Jakin, koguure ne kimi komostab katam Boas.