2 ATEPTAP PEETUUSYEK 25 - BUKUIT NE TILILLaitornatetab Amasia 1 Ki bo Amasia kenyisiek tiptem ak mut ye kitau kolaitorani; ak kilaitoran kenyisiek tiptem ak sogol eng’ Jerusalem: ak kainetab kamennyi ko ki Jeoadan ne bo Jerusalem. 2 Ak kiyai ne mie eng’ taitab Jehovah, ago ma eng’ muguleldo ne igesunotgei. 3 Ak kingo kagogimit laitornatennyi, kobar otwogikyik che kibar laitoriat kwandanyi. 4 Ago ma bar lagokwak, kiyai ko u ye kigisir eng’ Ng’atutik che mi bukuitab Musa, ko u ye kiga ng’at Jehovah, kole, Mabegu kwanisiek agobo lagok, anan kobek lagok agobo kwanisiekwak; ago meei chi tugul agobo tengektanyi. 5 Kogeny, ko kiiyum Amasia bikab Juda, ak kotet ichek kobee gorikab kwanisiekwak, kondochin kiptainikab elfusiek ak kiptainikab bogolwogik Juda tugul ak Benjamin: ak kiit ichek koboch che bo kenyisiek tiptem ak che siirei, ak kiek bik elfusiek bogol somok che kigilewen, che imuchi koba luget, che kiimuchi konam ng’otwek ak long’onik. 6 Kisir kogeny bik elfusiek bogol che kimen ak ko nyigonen eng’ Israel eng’ talentaisiek bogol che bo feda. 7 Ago kinyo chitab Kamuktaindet ole mi, ak kolenji, Ee laitoriat, amobe koboto lugetab Israel; amu mami Jehovah koboto Israel, choto ko lagok tugul che bo Epraim. 8 Ago ngot imache iwe, iwe, inyiganitu, igimitu eng’ luget: wirtoin Kamuktaindet eng’ taitab bunyot; amu tinyei Kamuktaindet kimnatet kotoret, ak kotinyei kimnatet kowirta. 9 Ak kilenji Amasia chitab Kamuktaindet, Ara si kelyonji talentaisiek bogol che kiagochi lugetab Israel? Kowol anyun chitab Kamuktaindet kole, Imuchi Jehovah kogonin che siirei chuto mising’. 10 Koweekta anyun Amasia ichek, noto ko luget ne kiga nyo oldanyi, ne kibunu Epraim, koweek koba ga: kolalyo anyun neregekwak kot agobo Juda, ak kiweek koba ga eng’ neregek che ng’wonen. 11 Konyiganit anyun Amasia, ak kondochi bikyik, kwo Atebwetab Munyuk, ak kobar che bo lagokab Seir elfusiek taman. 12 Ak kiluul lagokab Juda bik alak elfusiek taman, ak komut kobwa baragutab ruandet, ak kotoorta eng’ ruandanoto barak, ak kitonogis tugul. 13 Ago kibar bikab luget che kiweektoi Amasia kole amaba tugul luget, nganasokab Juda koboch Samaria kot koit Bet-horon, kibar bik elfusiek somok, ak koib barunenik che chang’. 14 Ak kingobunu Amasia baretab Edomik, koib kanamonikab lagokab Seir, ak kolumda koek kanamonikyik, ak kong’urukyi ichek eng’ tainywa, ak kobeelji nyamdutik. 15 Kolalyo anyun neregekab Jehovah agobo Amasia, ak koyokyi maotiot ne kimwachi inendet kolenji, Amu nee si icheng’ kanamonikab bik, che tom kosor bikwak eng’ eung’ung’? 16 Ak ye kita kong’alaldos ak inendet, kolenji laitoriat, Tos kogindein iegu kiruogindetab laitoriat? Muite; amu nee si imache kebarin? Kimuita anyun maotiot, ak kile, Angen ale, kagotil Kamuktaindet kole kong’emin, amu kaiyai ni, ama igas ng’alekyuk. 17 Koruoch anyun Amasia laitoriatab Juda, ak kiiyokto bik koba oldab Joas weritab Jeoahas weritab Jeu laitoriatab Israel, kolenji, Nyo ketuiye kegeerge togoch. 18 Ak kiiyokyi Joas laitoriatab Israel bik Amasia laitoriatab Juda, kolenji, Kiiyokto ng’olyot katableliat ne kimi Lebanon koyokyi tarakwet ne kimi Lebanon, kolenji, Igochi cheptang’ung’ werinnyu kotun: ak kisiirto tiondo ne bo timin ne kimi Lebanon, ak kotiech katableliandanato. 19 Imwae ile, Keero, kiibar Edom; ak itororin muguleldang’ung’ si ilosuge: tebe gong’ung’; amu nee si icheng’jige nyalilda, si ibut inye, koboto Juda? 20 Ago ma cham Amasia kogas; amu kibunu Kamuktaindet kioto, si kobiit konde ichek eunekab bunikwak, amu kicheng’ kanamonikab Edom. 21 Kitogosta anyun Joas laitoriatab Israel; ak kigeergei inendet ak Amasia laitoriatab Juda togoch eng’ Bet-semes, ne bo Juda. 22 Ak kigiterter Juda eng’ taitab Israel; ak kimwei chi tugul kwo emainnyi. 23 Ak kiimut Joas laitoriatab Israel Amasia laitoriatab Juda weritab Joas weritab Jeoahas, eng’ Bet-semes, ak komut inendet konyo Jerusalem, ak kobut irimet ne bo Jerusalem koboch ormarichetab Epraim agoi ormarichetab luita, kakwautik bogol ang’wan che bo eut. 24 Ak kiib tahabu tugul ak feda, ak tuguk tugul che kimi gotab Kamuktaindet koboto Obed-edom, ak konoraik che bo gotab laitoriat, koboto luulenik agichek, ak kiweek kwo Samaria. 25 Ak kita kosob Amasia weritab Joas laitoriatab Juda kenyisiek taman ak mut kingobata meetab Joas weritab Jeoahas laitoriatab Israel. 26 Ak boisionik che ng’etunotin che bo Amasia, che bo tai ak che bo let, ogeero, tos ma sirotin eng’ bukuitab laitorinikab Juda ak Israel? 27 Kichaam bik Amasia eng’ Jerusalem, koboch ngab komasta kobagakta Jehovah; ak kimwei kwo Lakis: ago kiiyokto bik kosub inendet koba Lakis, ak kobar inendet eng’ oloto. 28 Ak kilaune inendet mbartanyisiek, ak kotupchi nganasetab Juda koboto kwanisiekyik. |