2 ATEPTAP PEETUUSYEK 23 - BUKUIT NE TILIL

Laitornatetab Joas

¹ Ak kiigimitgei Jeoiada eng’ kenyitab tisab, ak kinam kiptainikab bogolwogik, Asaria weritab Jeroam, ak Ismael weritab Jeohanan, ak Asaria weritab Obed, ak Maaseia weritab Adaia, ak Elisapat weritab Sikri, ak koyomisgei koboto ichek.

² Ak kibendate Juda, ak koyum Lawik eng’ nganasok tugul che bo Juda, ak kandoikab kwanisiekab Israel, ak kibwa Jerusalem.

³ Ak kiiyomisgei ak laitoriat tuiyet komugul eng’ gotab Kamuktaindet. Ak kilenji, Ingolaitoran weritab laitoriat, ko u ye kimwa Jehovah agobo werikab Daudi.

⁴ Ni kit ne oyae: egu ribikab kurgotik kebeberta agenge eng’ somok eng’ okwek, che bwanei eng’ betutab sabato, che bo tisiik ak Lawik;

⁵ kotebe kebeberta agenge eng’ somok gotab laitoriat; kotebe kebeberta agenge eng’ somok kurgetab lumeiywot: ak ingotebe bik tugul seremusiekab gotab Jehovah.

⁶ Ago amochamji chi konyo gotab Jehovah, kobate tisiik, ak Lawik che otisiei; bwanei icheget amu tililen: ago ribei bik tugul ripsetab Jehovah.

⁷ Si koyiem Lawik laitoriat, kotinyei chi tugul karikyik eng’ eunnyi ak chi age tugul ne nyonei go, kebarei: ak otebi ak laitoriat ye nyonei go ak ye mandoi.

⁸ Koyai anyun Lawik ak Juda tugul kit ne kang’at ichek Jeoiada tisiindet: komut chi tugul bikyik, bik che bwanei eng’ sabato, ak che kimandoi eng’ sabato; amu ma bagakta Jeoiada tisiindet ripsosiechoto.

⁹ Ak kiigochi Jeoiada tisiindet kiptainikab bogolwogik ng’otwek, ak long’onik che mengechen, ak long’onik che eechen, che ki bo laitoriat Daudi, che kimi gotab Kamuktaindet.

¹⁰ Ak kitet bik tugul, kotinyei chi tugul karikyik eng’ eunekyik, koboch komostab tai ne bo got agoi komostab katam ne bo goyoto, ye negite kaptisisiet, ak got, koyiem laitoriat.

¹¹ Komong’ anyun weritab laitoriat, ak kolaakyi nariet, ak kogochi baornatet, ak konde inendet koek laitoriat: ak kiil Jeoiada ak werikyik, inendet; ak kole, Ingosob laitoriat.

¹² Ak kingogas Atalia bolatetab bik che ruaoti ak kolosu laitoriat, konyo ole mi bik eng’ gotab Jehovah:

¹³ Ak kigeerot, ogeero, kitononi laitoriat eng’ ole negite toloitanyi eng’ ye kibunei kebendi orit, komi kiptainik ak iriagok ye mi laitoriat; ak kiboiboitu bik tugul che bo emet, ak koguutei iriagok; kibutei agichek tienik kibugandinik, ak kondochin tiendab kalosunet. Kogerer anyun Atalia ngoroikyik, ak kole, Chaamset, chaamset.

¹⁴ Komut anyun Jeoiada tisiindet kiptainikab bogolwogik, kobwa sang’, che kiga kinde koboi luget, kolenji, Omande inendet eng’ kwenutab bik: ak kibarei eng’ rotwetab chok chito ne isubi inendet: amu kile tisiindet, Amobarji gotab Jehovah.

¹⁵ Koistochigei anyun ichek inendet; ak kiwa ye kichutei ormarichetab mbartanyit ne bo gotab laitoriat; ak kibarji yoto.

¹⁶ Koyomisgei anyun Jeoiada ak bik tugul, ak laitoriat, kole koek bikab Jehovah.

¹⁷ Ak kiba bik tugul gotab Baal, kobut, ak kobut kapkorosusiekyik, ak kotuatui kanamonikyik, ak kobar Matan tisiindetab Baal eng’ taitab kapkorosusiek.

¹⁸ Ak king’at Jeoiada boisionikab gotab Jehovah koboi tisiik, Lawik, che kiga kopchei Daudi eng’ gotab Jehovah, si kogoitoi kagochinoik che kibeelei che bo Jehovah, ko u ye kigisir eng’ Ng’atutikab Musa, si koboiboitu ak kotiendos, ko u ng’atutietab Daudi.

¹⁹ Ak kiinde ribik kurgotikab gotab Jehovah, si mawa go chi age tugul ne ma tilil eng’ kiy age tugul.

²⁰ Ak kinam kiptainikab bogolwogik, ak bik che toogunotin, ak bounikab bik, koboto bik tugul che bo emet, si komut laitoriat kochorgei eng’ gotab Jehovah: ak kibun ormarichet ne toror kot koit gotab laitoriat, ak konde laitoriat kotebe ng’echeretab laitornatet ne bo bounatet.

²¹ Koboiboitu anyun bik tugul che bo emet, ak kisis nganaset: ak kibar Atalia eng’ rotwetab chok.