2 ATEPTAP PEETUUSYEK 22 - BUKUIT NE TILIL

Laitornatetab Aasia ak korebei Atalia laitornatet

¹ Ak kiinde bik che kimenyei Jerusalem Aasia werinnyi ne ming’in koek laitoriat kogeer inendet: amu kibar kweanet ne kigabwa nganaset koboto Marabuk, werik tugul che eechen. Kolaitoran anyun Aasia weritab Jeoram laitoriatab Juda.

² Ki bo kenyisiek artam ak aeng’ Aasia ye kitau kolaitorani; ak kilaitoran kenyit agenge eng’ Jerusalem: ak kainetab kamennyi ko ki Atalia cheptab Omri.

³ Kiwendote agine ortinwekab gotab Ahab: amu kiek kamennyi konetindennyi ne kiinet inendet koyai ne ya.

⁴ Ak kiyai ne ya eng’ taitab Jehovah, ko u ye kiyai gotab Ahab: amu ki konetikyik che kiineti inendet, agoi ng’emisiennyi, kingo kagome kwandanyi.

⁵ Kiisub konetisienywa, ak koba ak Jeoram weritab Ahab laitoriatab Israel, kobargei ak Hasael laitoriatab Suria eng’ Ramot-gilead: ak kiiguoten Suriek Joram.

⁶ Kiweek konyo kinya eng’ Jesreel, ng’otobosiek che kigitoor eng’ Rama, ye kibaregei ak Hasael laitoriatab Suria. Ak kichortagei Asaria weritab Jeoram laitoriatab Juda kwo kogeer Jeoram weritab Ahab eng’ Jesreel, amu kimiani.

⁷ Kibunu Kamuktaindet ng’emisietab Aasia, amu kiwa ole mi Joram: amu kingoit, koba ak Jeoram kobargei ak Jeu weritab Nimsi, ne kiga koiil Jehovah si kobiit kobar gotab Ahab koges.

⁸ Ak ye kita koruokyin Jeu gotab Ahab, konyor bounikab Juda, ak werikab tupchosiekab Aasia, che kiboisiechin Aasia, ak kibar ichek.

⁹ Ak kicheng’ Aasia, ak kinam inendet, (kiga ung’egei Samaria,) ak kigimutyi Jeu, ak kibar inendet, ak kitub, amu kile inendet ko weritab Jeosapat, ne kicheng’ Jehovah eng’ muguleldanyi tugul. Ak ma sich gotab Aasia kimnatet konam bounatet.

¹⁰ Ak kingogeer Atalia kametab Aasia kole kigome werinnyi, kong’eet ak kobar iyotet tugul ne bo kaplaitoriat ne bo gotab Juda.

¹¹ Ago kiimut Jeosabeat, cheptab laitoriat, Joas weritab Aasia, kochor inendet komut eng’ ole mi werikab laitoriat, chu kigibarei, ak konde inendet ak cheblakwet got ne kiruei eng’ got orit. Kouny anyun inendet Jeosabeat cheptab laitoriat Jeoram, osotiotab Jeoiada tisiindet, (amu ki chepkametab Aasia,) si mabar Atalia.

¹² Ak kitebi koboto ichek ko ung’at eng’ gotab Kamuktaindet kenyisiek lo: ak kilaitorani Atalia eng’ emet.