2 ATEPTAP PEETUUSYEK 21 - BUKUIT NE TILIL

Laitornatetab Jeoram

¹ Ak kiru Jeosapat ak kwanisiekyik, ak kigitupchi ole kigitupchi kwanisiekyik eng’ nganasetab Daudi: ak kilaitoran Jeoram werinnyi kogeer inendet.

² Kitinyei inendet werik che tupcho, werikab Jeosapat, Asaria, Jehiel, Sekaria, Asaria, Mikael, ak Sepatia: chuto tugul ko ki werikab Jeosapat laitoriatab Israel.

³ Ak kiigochi kwandanywa kagochinoik che eechen, che bo feda, ak che bo tahabu, ak che bo tuguk che bo kamanutiet ne o, ak kogochi nganasok che ng’ototin che bo Juda: ago kiigochi laitornatet Jeoram, amu ki taita.

⁴ Ak kingong’eet Jeoram konam bounatetab kwandanyi, ak kogimitgei, kobar tupchosiekyik tugul eng’ rotwetab chok, ak alak che bo bounikab Israel.

⁵ Ki bo Jeoram kenyisiek sosom ak aeng’ ye kitau kolaitorani; kilaitoran kenyisiek sisiit eng’ Jerusalem.

⁶ Ak kiwendote ortinwekab laitorinikab Israel, ko u ye kiyai gotab Ahab: amu kiitun cheptab Ahab: ak kiyai ne ya eng’ taitab Jehovah.

⁷ Agot nganda ki u noto ko ma cham Jehovah kong’em gotab Daudi, amu kayomiset ne kiga koyomisyi Daudi, ak ko u ye kiiarorji inendet ak lagokyik kole igochin inendet tait kotugul.

⁸ Kiingelelji Edomik bounatetab Juda eng’ betusiekyik, ak konamjigei laitoriat ne bou ichek.

⁹ Kiwa anyun Jeoram kolanda koboto kiptainikyik kotinyei karisiekyik tugul, ak king’eet kemoi ak kobar Edomik, che kigayiem inendet, koboto kiptainikab karisiek.

¹⁰ Kiingelel anyun Edomik kobagakta bounatetab Juda, agoi rani: kiingelel agine Libna eng’ betusiechoto: amu kiga kometo Jehovah, Kamuktaindetab kwanisiekyik.

¹¹ Ak kiteech kogeny komoswek che tororen eng’ tulonokab Juda, ak koyai che kimenyei Jerusalem koibotgei, ak kobeet Juda.

¹² Kinyonji inendet baruet ne kibunu maotiot Elija, kolenji, Kamwa ko u ni Jehovah, Kamuktaindetab Daudi kwandang’ung’, kole, Amu ma iwendote ortinwekab Jeosapat kwandang’ung’, anan ortinwekab Asa laitoriatab Juda;

¹³ ago kiiwendote ortinwekab laitorinikab Israel, ak kiigochi Juda ak che menyei Jerusalem koyai ibetab ge, ko u ye kiyai gotab Ahab; ak kiibar kogeny tupchosieguk che bo gotab kwandang’ung’, che ki koigoi kosiirin:

¹⁴ keero, barei Jehovah biguk, ak lagoguk, ak osotiguk, ak tuguguk tugul, eng’ koroito ne o:

¹⁵ ak inyoru miando ne o, koroito eng’ agutaniguk, agoi komong’ agutaniguk eng’ mianato, eng’ betut age tugul.

¹⁶ Ak kiing’eet Jehovah nereknatetab Pilistik ak ne bo Marabuk che menyei ole negite Etiopik, kobargei ak Jeoram:

¹⁷ ak kitogos kobokyi Juda, ak kobut koba orit, ak koib tuguk tugul che kinyor eng’ gotab laitoriat, ak koluul werikyik agichek, ak osotikyik; kot ko ma ng’etyi werit agot agenge, kobate Jeoahas, werit ne ming’in eng’ tugul.

¹⁸ Ak kingobata chuto tugul, kobir Jehovah inendet eng’ miando eng’ agutanikyik, ne ma inyaoksei.

¹⁹ Ak kingobata kenyisiek aeng’u komong’ agutanikyik amu miandanyi, ak kime eng’ mianwek che ng’wonen, ama beelji bikyik kiy inendet, ko u ye kigibeelji kwanisiekyik.

²⁰ Ki bo kenyisiek sosom ak aeng’ ye kitau kolaitorani, ak kilaitoran eng’ Jerusalem kenyisiek sisiit: ak kime, ko ma komachei chi inendet; ak kigitupchi nganasetab Daudi, ago ma eng’ kererisiekab laitorinik.