2 ATEPTAP PEETUUSYEK 2 - BUKUIT NE TILIL

Kogasyindos Solomon ak Hiram ne bo Turo agobo teeksetab hekalut

¹ Kibegechi anyun Solomon koteekyi got kainetab Jehovah, ak got ne bo bounatennyi.

² Ak kiit Solomon bik elfusiek tamanwogik tisab che laisei, ak bik elfusiek tamanwogik sisiit che waei koik eng’ tulonok, ak bik elfusiek somok ak bogol lo che tononjin.

³ Ak kiiyokto Solomon kemwachi Huram laitoriatab Turo, kelenji, Ko u ye kiiyachi baba Daudi, ak iyokyi inendet taragonik koteege gonnyi ne menyei, ko u noto, yaiywa agane.

⁴ Keero, ateekyini got kainetab Jehovah Kamuktaindennyu, si atabanji inendet, ak abeel eng’ tainnyi nyamdutikab tuguk che ng’uu ne anyiny, ak ko bo makatinikab kabartaet che bo kotugul, ak ko bo kagochinoik che kibeelei karon ak koskoleny, eng’ sabatosiek, ak eng’ ye kaleel arawet, ak eng’ igorwek che kiging’at che bo Jehovah Kamuktaindennyu. Bo koigeny nito eng’ Israel.

⁵ Ak o got ne ateeche: amu o Kamuktaindennyu kosiir cheptalelisiek tugul.

⁶ Ago ng’o anyun ne imuchi koteekyi inendet got, amu mayamei inendet kipsengwet ak kipsengwet ne bo kipsengwetisiek? A ng’o anyun, kot ateekyi got, kobate kebeelji nyamdutik eng’ tainnyi?

⁷ Ara anyun, iyokwa chito ne ng’om ne imuchi koyai boisietab tahabu, ak ne bo feda, ak ne bo sugunonik, ak ne bo karik, ak ne bo ngoroik che arusen ne birir, ak che biriren, ak che tuuen ne nyalil, ak bik che utotin eng’ waet age tugul kobois, kotebi ak bik che ng’omen che mi kobota eng’ Juda ak eng’ Jerusalem, che kigochob baba Daudi.

⁸ Iyokwa kogeny ketikab taragonik, ak biribirinik, ak ketikab almug che bo Lebanon: amu angen ale ng’omen otwogiguk eng’ ebetab ketikab Lebanon; ak keero, tun mi otwogikyuk ak otwogiguk,

⁹ si kochobwa ketik che chang’ mising’: amu got ne negit ateech ko o ak ko bo kwong’et.

¹⁰ Ak keero, agochini otwogiguk bik che ebei ketik, nganok che kigetui, kerutik elfusiek tiptem che bo nganok che kigibor, ak kerutik elfusiek tiptem che bo sairik, ak divaik che yamegei ak debeisiek elfusiek artam, ak mwanik che yamegei ak debeisiek elfusiek artam.

¹¹ Kowolji anyun Huram laitoriatab Turo eng’ baruet ne kiiyokyi Solomon, kolenji, Amu chamei Jehovah bikyik, ko kiindein iegu laitoriat ibou ichek.

¹² Komwa kogeny Huram kole, Iberurot Jehovah, Kamuktaindetab Israel, ne kiyai kipsengwet ak ng’ony, ne kigogochi laitoriat Daudi werit ne ng’om, ne kigigochi kaguiyet ak naet, si kobiit koteekyi got Jehovah, ak got ne bo bounatennyi.

¹³ Kaayogu anyun chito ne ng’om, ne kigigochi naet, ne bo Huram kwandanyu,

¹⁴ weritab kwondo ne bo tibikab Dan, ak ki chitab Turo kwandanyi, ne utat, ne imuchi koyai boisietab tahabu, ak ne bo feda, ak ne bo sugunonik, ak ne bo karik, ak ne bo koik, ak ne bo ketik, ak ne bo ngoroik che arusen ne birir, ak che tuuen ne nyalil, ak ne bo katanit ne kararan, ak ne bo che biriren: ak kowai waet age tugul, ak koyai kit age tugul ne kaibwat: si kobiit ole kigilewenji inendet, kobois koboto biguk che ng’omen, ak koboto bik che ng’omen che bo kiptaiyandennyu Daudi kwandang’ung’.

¹⁵ Ingoyok anyun inendet nganok, ak sairik, ak mwanik, ak divaik, che kimwaei kiptaiyandennyu, koyokyi otwogikyik:

¹⁶ si keeb ketik eng’ Lebanon, che te che imache; si kiyogun ko ratotin kobun beek eng’ nyanjet agoi Jopa; si iib eng’ yoto kotogosta koba Jerusalem.

¹⁷ Ak kiit Solomon bunotik tugul che kimi emetab Israel, eng’ koitonoto kiiti kwandanyi Daudi, ak kibiit bik elfusiek bogolu ak konom ak somok ak bogolwogik lo.

¹⁸ Ak kiinde bik elfusiek tamanwogik tisab che laisei, ak elfusiek tamanwogik sisiit che waei koik eng’ tulonok, ak bik che tononjin boisiet elfusiek somok ak bogolwogik lo che gochin bik boisiet.