2 ATEPTAP PEETUUSYEK 18 - BUKUIT NE TILIL

¹ Kitinyei Jeosapat magornatosiek ak teegisto eng’ chang’indo; ak kigangei ak Ahab.

² Ak kingosiirto kenyisiek alage kochortagei oldab Ahab eng’ Samaria. Ak kieng’ji Ahab inendet kechirek ak tuga che chang’ mising’, koboto bik che kimi ak inendet, ak kogaigai inendet kotogosta Ramot-gilead.

³ Ak kilenji Ahab laitoriatab Israel Jeosapat laitoriatab Juda, Ichame kebe tuwai Ramot-gilead? Ak kiwolji kolenji, A u kit ne i u, ak u bikyuk biguk; ak kimi koboten eng’ lugoni.

⁴ Ak kilenji Jeosapat laitoriatab Israel, Asomin ale, teeb eng’ ng’olyotab Jehovah rani.

⁵ Koyum anyun laitoriatab Israel maotik bogol ang’wan, ak kolenji ichek, Kibe kebargei ak Ramot-gilead, anan atebi? Ak kilenji, Togoste; amu indoi Kamuktaindet eutab laitoriat.

⁶ Ago kile Jeosapat, Tos mami maotiotab Jehovah age yu, si keteepse inendet?

⁷ Ak kilenji laitoriatab Israel Jeosapat, Ta komi chito age ne kimuchi keteepse eng’ Jehovah: ago aweche; amu mamaoteni tuguk che miachen agobo ane, kobate yaitiet kotugul: inendet ko Mikaia weritab Imla. Kile Jeosapat, Amat komwa laitoriat ko u no.

⁸ Kiguur anyun laitoriatab Israel kiptaiyat age, ak kolenji, Ui imutu Mikaia weritab Imla ichogune.

⁹ Ak kiga tebe laitoriatab Israel ak Jeosapat laitoriatab Juda chi tugul ng’echerennyi ne bo laitornatet, kolaachi ngoroikwak che bo laitornatet, ak kitebi eng’ ole baraa eng’ ole kibunei eng’ ormarichetab Samaria; ak kimaoteni maotik tugul eng’ tainywa.

¹⁰ Ak kiyachigei Sedekia weritab Kenaana kuinoikab karik, ak kole, Kamwa Jehovah ko u ni, kole, Itoortoe chuto Suriek, kot kogesgei.

¹¹ Ak kimaotenso maotik tugul ko u noto agichek, kole, Togoste Ramot-gilead, ak ibor: amu indoi Jehovah nganasanato eutab laitoriat.

¹² Ak king’alalji inendet chito ne kiga kiyokto koguur Mikaia, kolenji, Keero, kachamak eng’ laitoriat ng’alekab maotik che kamwachi eng’ kasyinet agenge: asomin ale, ingoigei anyun ng’olyondeng’ung’ ng’olyotab age eng’ ichek, ak ing’alal ng’alek che miach.

¹³ Ak kile Mikaia, Ko u ye sobei Jehovah, ko kit ne mwaei Kamuktaindennyu, amwae noto.

¹⁴ Ak kingoit inendet ole mi laitoriat, kolenji laitoriat inendet, Mikaia, kibe Ramot- gilead, anan kitebi? Ak kile, Otogoste, ak obor; ak kindoi eunekwok bichoto.

¹⁵ Ak kilenji laitoriat, Ayosieun konyil ata ale, Amat imwawa kiy age kobate imanda eng’ kainetab Jehovah?

¹⁶ Ak kile, Kiageer Israel tugul ko kaiyesta eng’ tulonok, ko u kechirek che matinyei mestowot: ak kimwa Jehovah kole, Matinyei chuto kiptaiyat; ingoweek chi tugul kwo gonnyi eng’ kalyet.

¹⁷ Ak kilenji laitoriatab Israel Jeosapat, Kama amwaun ale, mamaoteni tuguk che miachen agobo ane, kobate yaitiet?

¹⁸ Ak kile Mikaia, Ogas anyun ng’olyotab Jehovah: kiageer Jehovah kotebyei eng’ ng’echerennyi ne bo laitornatet, ak kitononi luget tugul ne bo kipsengwet eng’ eunnyi ne bo tai ak ne bo katam.

¹⁹ Ak kile Jehovah, Ng’o ne iberberi Ahab laitoriatab Israel, si kwo kotogosta ak kome eng’ Ramot-gilead? Ak kimwa age ko u ni, komwa age ko u ni.

²⁰ Ak kimong’ tamirmiriet ak kotonon eng’ taitab Jehovah, ak kole, Aberberi. Ak kimwachi Jehovah inendet, kolenji, Iberbertoi ano? Maotikyik tugul. Ak kimwa inendet kole, Iberberi inendet, ak iterter: ui anyun, ak iyai ko u noto.

²¹ Ak kile, Awendi ak aegu tamirmiriet ne kenisiei eng’ kutuswekab maotikyik tugul. Ak kimwa inendet kole, Iberberi inendet, ak iterter: ui anyun, ak iyai ko u noto.

²² Ara anyun, keero, kagonde Jehovah tamirmiriet ne kenisiei kutuswekab maotichuguk tugul; ak kagomwa Jehovah yaitiet agobo inye.

²³ Korik anyun Sedekia weritab Kenaana, ak korabach Mikaia matanda, ak kolenji, Kabun ano tamirmirietab Jehovah ak konyo kong’alalun?

²⁴ Ak kile Mikaia, Keero, igeere eng’ betunoto ye tun iwendi got ne bo orit iunyege.

²⁵ Ak kimwa laitoriatab Israel kole, Onam Mikaia ak oweekte omutyi Amon bounindetab nganaset, ak Joas weritab laitoriat;

²⁶ ak olenji, Kamwa laitoriat ko u ni kole, Onde chichi korgoret, ak obae amitwogikab nyalilda ak beekab nyalilda, agoi aweege eng’ kalyet.

²⁷ Ak kile Mikaia, Ngot iweege iman eng’ kalyet, ko kaga ma ng’alalena Jehovah. Ak kile, Ogas okwek bik tugul.

²⁸ Kitogosta anyun laitoriatab Israel ak Jeosapat laitoriatab Juda koba Ramot- gilead.

²⁹ Kilenji laitoriatab Israel Jeosapat, Awalegei aegu age, ak awe luget; ago ilaach inye ngoroik che bo laitornatet. Kowalgei anyun laitoriatab Israel koek age, ak koba luget.

³⁰ Kiga ng’at laitoriatab Suria kiptainikab karisiekyik, kolenji, Amat obargei ak ne ming’in anan ko ne o kobate laitoriatab Israel inegei.

³¹ Ak kingogeer kiptainichoto bo karisiek Jeosapat, komwa kole, Nito ko laitoriatab Israel. Koweekyigei anyun kole kobargei ak inendet: ago kiwaach Jeosapat, ak kitoret Jehovah inendet; ago kiigochi Kamuktaindet ichek kobagakta inendet.

³² Ak kingogeer kiptainikab karisiek kole ma laitoriatab Israel ni, koweek, mata kosub inendet.

³³ King’i chito age kwangennyi komwok kosapsapchi, ak kitiech laitoriatab Israel ole tuiyechin karikyik che kiilaachi: kolenji anyun chito ne kweriei karinnyi, Imuta amanda eng’ oli mi luget; amu kagiguotena mising’.

³⁴ Ak kitesak luget betunoto: ago kitiigei laitoriatab Israel eng’ karinnyi kotokyigei Suriek agoi koskoleny: ak kingo negit kororokto asista, kome.