2 ATEPTAP PEETUUSYEK 17 - BUKUIT NE TILIL

Laitornatetab Jeosapat

¹ Ak kilaitoran werinnyi Jeosapat kogeer inendet, ak kogimitgei kobargei ak Israel.

² Ak kiinde lugosiek nganasok tugul che ng’ototin che bo Juda, ak kiinde ribik emetab Juda, ak nganasokab Epraim, che kiga reb kwandanyi Asa.

³ Ak kimi Jehovah ak Jeosapat, amu kiwendote ortinwek che bo tai che bo kwandanyi Daudi, ama cheng’ Baalik;

⁴ ago kicheng’ Kamuktaindetab kwandanyi, ak kowendote ng’atutikyik, ama isub tuguk che kiyai Israel.

⁵ Kiigimit anyun Jehovah laitornatet eng’ eunnyi; ak kiipchi bik tugul che bo Juda Jeosapat kagochinoik; ak kitinyei magornatet ak teegisto eng’ chang’indo.

⁶ Ak kiitororok muguleldanyi eng’ oretab Jehovah: ak kogeny, kiisto komoswek che tororen ak Aserik kobetyo eng’ Juda.

⁷ Ak kogeny kiiyokto bounikyik eng’ kenyitab somok ne bo laitornatennyi, choto ko ki Benail, Obadia, Sekaria, Netanel, ak Mikaia, koba konetisiot eng’ nganasokab Juda;

⁸ ak kimi Lawik koboto ichek, ichek ko ki Semaia, Netania, Sebadia, Asael, Semiramot, Jeonatan, Adonija, Tobija, ak Tobadonija, Lawik; ak kimi koboto ichek Elisama, ak Jeoram, tisiik.

⁹ Ak konetisiot eng’ Juda, kotinyei bukuitab Ng’atutikab Jehovah; ak kibendate nganasok tugul che bo Juda, konetisiot eng’ kwenutab bik.

¹⁰ Ak kiibutyi kamuisetab Jehovah bounatosiek tugul che bo emotinwek che kimi tabanwekab Juda, kot ko mata kobokyi Jeosapat.

¹¹ Ak kiipchi Pilistik alak kagochinoik Jeosapat, ak kiipchi feda koek aisurut; kigetyi Marabuk agichek akwotisiekab kechirek, mengichik elfusiek tisab ak bogol tisab, ak kwesik elfusiek tisab ak bogol tisab.

¹² Ak kitesak Jeosapat koeet mising’; ak kiteech irimoik ak nganasok che kigonore tuguk, eng’ Juda.

¹³ Ak kitinye boisionik che chang’ eng’ nganasokab Juda; koboto bikab luget, bik che kimen, che nyigonen, eng’ Jerusalem.

¹⁴ Chu koitosiekwak ko u gorikab kwanisiekwak: che bo gab Juda, che ki kiptainikab elfusiek ko ki Adna ne ki kiptaiyat, ak kitinyei bik che kimen che nyigonen elfusiek bogol somok:

¹⁵ ak ne kirubei inendet ko ki Jeohanan ne ki kiptaiyat, ak kitinyei bik elfusiek bogol aeng’ ak tamanwogik sisiit;

¹⁶ ak kirubei inendet Amasia weritab Sikri, ne kiigochigei Jehovah eng’ chamnyet; ak kitinyei bik che kimen che nyigonen elfusiek bogol aeng’:

¹⁷ ak che bo gab Benjamin ko ki Eliada ne kim ak ko nyigan, ak kitinyei bik elfusiek bogol aeng’ che kitinyei kwangok ak long’onik:

¹⁸ ak kirubei inendet Jeosabad, ak kitinyei bik elfusiek bogol ak tamanwogik sisiit che ki chobotin koyai luget.

¹⁹ Chuto ko che kiboisiechin laitoriat, ko ma kiitito che kiinde laitoriat nganasok che ng’ototin che bo Juda tugul.