2 ATEPTAP PEETUUSYEK 16 - BUKUIT NE TILIL

¹ Eng’ kenyitab sosom ak lo ne bo laitornatetab Asa, kwo Baasa laitoriatab Israel kwo kobargei ak Juda, ak koteech Rama, si mata kochamji chi komanda anan konyo orit ole mi Asa laitoriatab Juda.

² Konem anyun Asa feda ak tahabu eng’ ole kigonore tugukab gotab Jehovah, ak gotab laitoriat, ak koyokyi Ben-hadad laitoriatab Suria, ne kimenyei Damasko, kolenji,

³ Mitei kasyinet kwenunnyo, ane ak inye, ko u ye kimi kwenutab kwandanyu ak kwandang’ung’: ogeero, kaayogun feda ak tahabu; ui but kasyinet ne oting’ege ak Baasa laitoriatab Israel, si kwo koistoenagei.

⁴ Kogasyi anyun Ben-hadad laitoriat Asa ng’alekyik, ak koyokto kiptainikab lugosiekyik koba kobar nganasokab Israel; ak kibar Ijon, ak Dan, ak Abel-maim, ak nganasok tugul che kigigonore tuguk, che bo Naptali.

⁵ Ak kingogas Baasa, ko mata koteech Rama, kobagakta boisiennyi ne kiyaei.

⁶ Komut anyun laitoriat Asa Juda tugul; ak koba koib koik che bo Rama, koboto ketik, che kiga teekse Baasa; ak koteege Geba ak Mispa.

⁷ Ak kinyo eng’ betusiechoto Hanani keerindet ole mi Asa laitoriatab Juda, ak kolenji, Amu koitiiege laitoriatab Suria, ma itiiege Jehovah Kamuktaindeng’ung’, ko kachilil lugetab laitoriatab Suria eng’ eung’ung’ amu noto.

⁸ Tos kima ko luget ne o Etiopik ak Lubik, che kitinyei karisiek ak bik che chang’ mising’ che kilanyei mbartanyisiek? Ko amu kiitiiege Jehovah, ko kiinde inendet ichek eung’ung’.

⁹ Amu bendoti konyekab Jehovah eng’ ng’ony komugul, kobortogei kole kim agobo icheget che igesunotgei mugulelwekwak eng’ tainnyi. Koiyai koito eng’ berberindo; amu koboch nguno ko kenyoru lugosiek agoi.

¹⁰ Konerekyi anyun Asa keerindet, ak konde inendet korgoret; amu kinerekyi inendet mising’ agobo kiito. Ak kius Asa bik alak eng’ betusiechoto.

¹¹ Ak ogeero, boisionikab Asa, che bo tai, ak che bo let, ogeero, kigisirji bukuitab laitorinikab Juda ak Israel.

¹² Ak eng’ kenyitab sosom ak sogol ne bo laitornatennyi, konam miando kelyekab Asa; kieet mising’ miandanyi: ago ma cheng’ Jehovah eng’ miandanyi, kicheng’ chepkerichinik.

¹³ Ak kiru Asa ak kwanisiekyik, ak kime eng’ kenyitab artam ak agenge ne bo laitornatennyi.

¹⁴ Ak kigitub inendet eng’ kererisiekyik, che kiga kowachigei eng’ nganasetab Daudi, ak kiginde itogut ne ki nyiitat nyamdutik che anyiny, ak tuguk alak che terjin che kigichob eng’ ng’omnatetab chepkerichinik: ak kigibeelji tuguk che chang’ mising’.