2 ATEPTAP PEETUUSYEK 13 - BUKUIT NE TILIL

Laitornatetab Abija

¹ Kitoi kolaitoran Abija eng’ Juda eng’ kenyitab taman ak sisiit ne bo laitoriat Jeroboam.

² Kilaitoran kenyisiek somok eng’ Jerusalem: ak kigiguure kamet Mikaia cheptab Uriel ne bo Gibea. Ak kitinyei luget Abija ak Jeroboam eng’ kwenunywa.

³ Ak kitet luget Abija koboto lugetab murenik che nyigonen che bo luget, murenik elfusiek bogol ang’wan che kigilewen: ak kitet Jeroboam luget kobargei ak inendet kotinyei murenik elfusiek bogol sisiit, che kigilewen, bik che kimen, che nyigonen.

⁴ Ak kitonon Abija eng’ tulwetab Semaraim, ne mi emetab tulonok ne bo Epraim, ak kole, Ogasa, ee Jeroboam ak Israel tugul;

⁵ tos manyoljok onai ole kiigochi Jehovah Kamuktaindetab Israel, Daudi, bounatet koboi Israel koigeny, kiigochi inendet ak werikyik eng’ kayomisetab munyuk?

⁶ Ago king’eet Jeroboam weritab Nebat, otwogindetab Solomon weritab Daudi, kongelelji kiptaiyandennyi.

⁷ Ak kiiyumjigei inendet bik che yaach, werikab Belial, che kiigimitgei kobargei ak Reoboam weritab Solomon, ye kita ko ming’in Reoboam ak kotinyei rirge, ak ma imuch kogirinda ichek.

⁸ Ak nguno olen omuchi ogirinde bounatetab Jehovah ne mi eunekab werikab Daudi; ak o tuiyet ne o, ak otinye moek che bo tahabu che kiitang’wok Jeroboam koek kanamonik.

⁹ Ma oonu tisiikab Jehovah, werikab Aron, ak Lawik, ak olewenjige tisiik, osubi bitonwekab bikab emotinwek alak? Si age tugul ne nyonei koanyinyegei kirgit ak mengichik tisab, koegu noto tisiindetab tuguk che matilei kiy.

¹⁰ Ago Jehovah ko Kamuktaindennyo achek, ak tom kebagakte inendet; ak ketinye tisiik che boisiechin Jehovah, werikab Aron, ak Lawik che yaei boisienywa:

¹¹ ak beeljin ichek Jehovah kagochinoik che kibeelei, ak nyamdutik che ng’uu ne anyiny, karonet age tugul ak koskoleng’ut age tugul: tetei makatinik che bo kabartaet eng’ meset ne tilil: ak keldab tait ne bo tahabu koboto taisiekyik, si kolal koskoleng’ut age tugul: amu kiribe boisietab Jehovah Kamuktaindennyo; ago kiomete inendet.

¹² Ogeero, mi Kamuktaindet kobotech, kondoiywech, ak tisiikyik che tinyei iriagok che bo waagat si koguutwak ne bo waagat. Ee lagokab Israel, amat obarge ak Jehovah Kamuktaindetab kwanisiekwok: amu mobore.

¹³ Ago kichob Jeroboam bik kobwa koribisyo eng’ let: kimi ichek taitab Juda, ak kimi let che kiribistos.

¹⁴ Ak kingogeer bikab Juda let, ogeero, kimi luget tainywa ak let: ak kirirji Jehovah, ak kiguut tisiik iriagok.

¹⁵ Kowaach anyun bikab Juda; ak ye kita kowaachei bikab Juda, kobar Kamuktaindet Jeroboam ak Israel tugul eng’ taitab Abija ak Juda.

¹⁶ Ak kimwei lagokab Israel eng’ taitab Juda: ak kiinde Kamuktaindet ichek eunekwak.

¹⁷ Ak kibar Abija ak bikyik ichek eng’ baret ne o: kobek anyun bik che kigilewen elfusiek bogol mut.

¹⁸ Kigiming’in ko u noto lagokab Israel eng’ betusiechoto, ak kiiterteris lagokab Juda, amu kitiiegei Jehovah, Kamuktaindetab kwanisiekwak.

¹⁹ Ak kion Abija Jeroboam, ak korebe inendet nganasok, Bet-el ak nganasokyik, ak Jesana ak nganasokyik, ak Epron ak nganasokyik.

²⁰ Mata konyor kimnatet kogeny Jeroboam eng’ betusiekab Abija: kibar Jehovah inendet, ak kime.

²¹ Ago kitesak Abija kogimit, ak kotun osotik taman ak ang’wan, ak kisich werik tiptem ak aeng’, ak tibik taman ak lo.

²² Ak boisionik che ng’etunotin che bo Abija, ak ortinwekyik, ak ng’alekyik, ko kigisirji bukuitab maotiot Ido.