2 ATEPTAP PEETUUSYEK 12 - BUKUIT NE TILIL

Kobokyin Sisak laitoriatab Misri, Juda

¹ Ak kingo kagigimit bounatetab Reoboam, ak kogimit agine, kometo ng’atutikab Jehovah, inendet ak Israel tugul.

² Ak eng’ kenyit ne bo mut ne bo laitoriat Reoboam, kotogos Sisak laitoriatab Misri, konyo kobar Jerusalem, amu kiga kongelelji Jehovah;

³ kitinyei karisiek elfut agenge ak bogol aeng’, ak bik elfusiek tamanwogik lo che lanyei mbartanyisiek: ak kima ko iitoksei bik che kigabwa koboto inendet eng’ Misri; Lubik, Sukik, ak Etiopik.

⁴ Ak kinam nganasok che ng’ototin che ki bo Juda, ak kobwa Jerusalem.

⁵ Konyo maotiot Semaia oldab Reoboam, ak bounikab Juda, che kiga koyumjigei Jerusalem, komwee Sisak, ak kolenji ichek, Kamwa Jehovah ko u ni, kole, Kiometa, eng’ noto ko kabagakyok anyun agane eutab Sisak.

⁶ Koming’ingei anyun bounikab Israel koboto laitoriat; ak kile, Bo iman Jehovah.

⁷ Ak kingogeer Jehovah kole, kagoming’ingei, konyonji ng’olyotab Jehovah Semaia, kolenji, Kagoming’ingei ichek; ma abare: ago asoru kitigin, ak ma kerong’jin Jerusalem neregekyuk eng’ eutab Sisak.

⁸ Ago egu ichek otwogikyik; si kobiit konai boisiennyu ak boisietab bounatosiekab emotinwek.

⁹ Kotogos anyun Sisak laitoriatab Misri kobar Jerusalem, ak koib konoraikab gotab Jehovah, ak konoraikab gotab laitoriat: kiib tugul: kiib kogeny long’onik che bo tahabu che kiga yai Solomon.

¹⁰ Ak kiyai laitoriat Reoboam long’onik che bo sugunonik kogeere choto, ak kogochi kiptainikab ribik korib, che kiribei kurgetab gotab laitoriat.

¹¹ Ak eng’ betut age tugul ne kanyo laitoriat gotab Jehovah, kobwa ribik koib, yeityo koweekta koba gotab ribik.

¹² Ak kingoming’ingei, koistoegei neregekab Jehovah inendet, si mabar inendet kowong’: ak kogeny kimitei Juda tuguk che miach.

¹³ Kiigimitgei anyun laitoriat Reoboam eng’ Jerusalem, ak kolaitoran: amu ki bo kenyisiek artam ak agenge Reoboam ye kitau kolaitorani, ak kilaitoran kenyisiek taman ak tisab eng’ Jerusalem, nganasanato kiga kolewen Jehovah eng’ ortinwek tugul che bo Israel, konde kainennyi oloto: ak kigiguure kamet Naama Jebamonindet.

¹⁴ Ak kiyai yaitiet, amu ma igiilgei eng’ muguleldanyi kocheng’ Jehovah.

¹⁵ Ak boisionikab Reoboam, che bo tai ak che bo let, tos ma kisir eng’ ng’alekab Semaia maotiot, ak che bo Ido keerindet, kobee tetutikab ibinwek che kigosiirto? Ak kimi lugosiek kwenutab Reoboam ak Jeroboam kotugul.

¹⁶ Ak kiru Reoboam koboto kwanisiekyik, ak kigitupchi nganasetab Daudi; ak kilaitoran Abija werinnyi kogeer inendet.