2 ATEPTAP PEETUUSYEK 11 - BUKUIT NE TILIL

Laitornatetab Reoboam eng’ Jerusalem

¹ Ak kingoit Reoboam Jerusalem, koyum gotab Juda, ak gotab Benjamin, murenik elfusiek bogol ak tamanwogik sisiit che bo luget, che kigilewen, kobargei ak Israel, koweekyi bounatet Reoboam.

² Ago kinyonji ng’olyotab Jehovah Semaia chitab Kamuktaindet, kolenji,

³ Ng’alalji Reoboam weritab Solomon, laitoriatab Juda, koboto Israel tugul eng’ Juda ak Benjamin, ilenji,

⁴ Kamwa Jehovah ko u ni, kole, Amobe otogoste anan obarge ak tupchosiekwok; ingoweek chi tugul kwo gonnyi; amu bunwa kii. Kogas anyun ichek ng’alekab Jehovah, ak koweek, mata koba kobargei ak Jeroboam.

⁵ Ak kimeny Reoboam Jerusalem, ak koteech eng’ Juda nganasok che kiribegei.

⁶ Kiteech Bet-lehem, Etam, ak Tekoa,

⁷ ak Bet-sur, Soko, ak Adulam,

⁸ ak Gat, Maresa, ak Sip,

⁹ ak Adoraim, Lakis, ak Aseka,

¹⁰ ak Sora, Aijalon, ak Hebron, che mi Juda ak Benjamin, nganasok che ng’ototin.

¹¹ Ak kiigimit irimoik, ak konde kiptainik, ak kogonore amitwogik, ak mwanik ak divaik.

¹² Ak kiinde nganaset age tugul long’onik ak ng’otwek, ak kogimit mising’. Ak kibunji inendet Juda ak Benjamin.

¹³ Ak kibwanji inendet tisiik ak Lawik che kimi Israel tugul, komong’ eng’ kiwotosiekwak tugul.

¹⁴ Amu kibagakta Lawik emotinwekwak che kiyagisie ak tugukwak, ak kobwa Juda ak Jerusalem: amu kion Jeroboam ak werikyik ichek, si mayai boisietab tiseinatet koyachi Jehovah:

¹⁵ ak kilewenjigei tisiik che bo komoswek che tororen, ak che bo oik, ak che bo moek che kiga koyai.

¹⁶ Ak kibwa Jerusalem, bik alak eng’ ortinwek tugul che bo Israel, ichek che kiga igiilgei eng’ mugulelwekwak kocheng’ Jehovah Kamuktaindetab Israel, kosub bichoto, kobwa koeng’ji Jehovah Kamuktaindetab kwanisiekwak.

¹⁷ Kiigimit anyun bounatetab Juda, ak kogimit Reoboam weritab Solomon eng’ kenyisiek somok: amu kibandate ortinwekab Daudi ak Solomon eng’ kenyisiek somok.

¹⁸ Ak kitun Reoboam Maalat cheptab Jerimot weritab Daudi, ak Abiail, cheptab Eliab weritab Jesii;

¹⁹ ak kisikyi inendet werik; Jeus, Semaria, ak Saham.

²⁰ Yeityo kotun Maaka cheptab Absalom; ak kisikyi inendet Abija, Atai, Sisa, ak Selomit.

²¹ Ak kicham Reoboam Maaka cheptab Absalom kosiir osotikyik tugul, ak chebaigainiyik: (amu kiitun osotik taman ak sisiit, ak chebaigeinik tamanwogik lo, ak kisich werik tiptem ak sisiit ak tibik tamanwogik lo.)

²² Ak kiinde Reoboam Abija weritab Maaka koek ne o, koboi tupchosiekyik: amu kimach konde inendet koek laitoriat.

²³ Kiyai eng’ ng’omnatet, kopcheita werikyik tugul koyom emotinwek tugul che bo Juda ak Benjamin, koba nganaset age tugul ne ng’otat, ak kiigochi ichek amitwogik che chang’ kot. Ak kicheng’ji ichek osotik che chang’.