2 ATEPTAP PEETUUSYEK 10 - BUKUIT NE TILIL

Koesioi Israelik Reoboam koek laitoriat

¹ Ak kiwa Reoboam Sekem: amu kigabwa Israel tugul Sekem, konde inendet koek laitoriat.

² Ak kingogas Jeroboam weritab Nebat agobo noto, (amu kimi Misri, ole kiga mwechi komwee laitoriat Solomon,) koweek Jeroboam eng’ Misri.

³ Ak kiiyokto keguur inendet; ak kinyo Jeroboam koboto Israel tugul, ak kong’alalji Reoboam, kolenji,

⁴ Kiyai kwandang’ung’ choginnyo kouuiit: ara anyun, yai kowisisit otisiet ne uui ne ki bo kwandang’ung’, ak iyai kowisisit choginnyi ne nyigis ne kiindeech, si kobiit keotin.

⁵ Ak kilenji ichek, Obwa kogeny ole ami koga ibata betusiek somogu. Koba anyun bik.

⁶ Kong’alal laitoriat Reoboam ak boisiek, che kicham kotonondos eng’ taitab Solomon kwandanyi, ye kita kosobei, kolenji, Nee ng’olyot ne omwawa ne awoljini bichu?

⁷ Ak kimwachi kolenji, Ngot iegu chi ne mie eng’ bichu, ak ibaibai ichek, ak imwachi ng’alek che miach, koegu anyun ichek otwogiguk koigeny.

⁸ Ago kibagakta ng’alekab boisiek, che kimwachi inendet, ak kong’alal ak neranik che kinerjindos tugul, che kitonondos eng’ tainnyi.

⁹ Ak kilenji ichek, Nee ng’olyot ne omwae okwek, si kobiit kewolji bichu kong’alalwa kolenja, Yai kowisisit chogit, ne kiindeech kwandang’ung’?

¹⁰ Ak kiwolji neranik che kinerjindos ak inendet kolenji, Imwachini ko u ni bichu kong’alalun, kolenjinin, Kiyai kwandang’ung’ choginnyo konyigisit, ago iyaiywech kowisisit; imwachini ko u ni, ilenjini, Nyigis mornennyu ne ming’in ne bo eut kosiir suetab baba.

¹¹ Ak ko u ye kigonok baba chogit ne nyigis, atese choging’wong’: kiitigonenok baba kipcharitisiek, ago atigonenok melmelwek.

¹² Kobwa anyun Jeroboam ak bik tugul ole mi Reoboam eng’ betutab somok, ko u ye kiga ng’at laitoriat, kole, Obwa eng’ betutab somok.

¹³ Ak kiwolji laitoriat ichek eng’ koromnatet; ak kometo laitoriat Reoboam ng’alekab boisiek,

¹⁴ ak kong’alalji ichek ko u ye kiga mwachi neranik, kolenji, Kiyai baba choging’wong’ konyigisit, ago atese: kiitigonenok baba kipcharitisiek, ago atigonenok melmelwek.

¹⁵ Koma kasyi anyun laitoriat bichoto; amu ki kit ne kibunu Kamuktaindet, si kobiit kogimit Jehovah ng’olyondennyi, ne kimwa eng’ Aija Silonindet komwachi Jeroboam weritab Nebat.

¹⁶ Ak kingogeer Israel tugul kole mata kogasyi laitoriat ichek, kowolji bik laitoriat, kolenji, Nee kebeberta ne ketinye eng’ Daudi? Ama kitinye borotet eng’ weritab Jesii: ingwo chi tugul emainnyi, ee Israel: rib gong’ung’ anyun, Daudi. Koba Israel tugul anyun emaisiekwak.

¹⁷ Ago kilaitoran Reoboam eng’ lagokab Israel che kimenyei nganasokab Juda.

¹⁸ Kiiyokto anyun Reoboam Hadoram, ne kibou aisurut; ak kilach lagokab Israel inendet eng’ koik, kome. Ak kichakta laitoriat Reoboam kolany karinnyi komwei kwo Jerusalem.

¹⁹ Kongelelji anyun Israel gotab Daudi, agoi ra.