2 ATEPTAP PEETUUSYEK 1 - BUKUIT NE TILIL

Koleweni Solomon ng’omnatet: magornatennyi

¹ Ak kigimit Solomon weritab Daudi eng’ bounatennyi, ak kimi Jehovah Kamuktaindennyi koboto inendet, ak kiieet inendet mising’.

² Ak king’alalji Solomon Israel tugul, kiptainikab elfusiek ak che bo bogolwogik, ak kiruogik, ak bounindet age tugul eng’ Israel tugul, kandoikab gorikab kwanisiek.

³ Kiwa anyun Solomon koboto tuiyet tugul, komosta ne toror eng’ Gibeon; amu kimi yoto emait ne kituiyechin ne bo Kamuktaindet, ne kiga teech Musa otwogindetab Jehovah eng’ ong’atet.

⁴ Ago kiga koib Daudi moingetab Kamuktaindet kotogos eng’ Kiriat-jearim konyo ole kiga kochopchi Daudi: amu kiga koteekyi emait eng’ Jerusalem.

⁵ Ak kimi yoto kaptisisiet ne bo sugunwet ne kiyaei Besalel weritab Uri, weritab Hur, kimitei taitab gotab Jehovah: ak kiba Solomon ak tuiyet ole mi.

⁶ Ak kitogosta Solomon kwo ole mitei kaptisisiet ne bo sugunwet, ne kimitei emait ne kituiyechin, eng’ taitab Jehovah, ak kogoito kagochinoik che kibeelei elfut.

⁷ King’ang’jigei anyun Kamuktaindet Solomon kemounoto, ak kolenji, Som kit ne imache agonin.

⁸ Kilenji Solomon Kamuktaindet, Kiiyachi mieindo ne o kwandanyu Daudi, ak kiyaa aek laitoriat ageer inendet.

⁹ Ara anyun, ee Jehovah Kamuktaindet, ingogimit kayomiset ne kiiyomisyi kwandanyu Daudi: amu koiyaa aek laitoriat aboi bik che te temburiek eng’ ng’ony eng’ chang’indo.

¹⁰ Kona anyun ng’omnatet ak naet, si amuch amanda ak anyo eng’ taitab bichu: amu ng’o ne imuchi koruokyi bichuguk chang’ ko u ni?

¹¹ Ak kilenji Kamuktaindet Solomon, Amu kimi ng’olyondonito muguleldang’ung’, ama isom magornatosiek, ak chang’indab tuguk, anan ko teegisto, anan kebar icheget che wechin, ama isom isob keny; ago kesomjige ng’omnatet ak naet, si kobiit iruokyi bikyuk, che kiandein iegu laitoriat ibou:

¹² kagegonin anyun ng’omnatet ak naet; ak agonin magornatosiek, ak chang’indab tuguk, ak teegisto, che tom konyor laitorinik che kigondounenen, ama kobiitu age ne nyoru ko u noto.

¹³ Konyo anyun Solomon eng’ komosato toror ne kimi Gibeon, eng’ taitab emait ne kituiyechin, konyo Jerusalem; ak kilaitoran eng’ Israel.

¹⁴ Ak kiiyum Solomon karisiekab luget ak bik che lanyei mbartanyisiek: ak kitinyei karisiek elfut agenge ak bogol ang’wan, ak bik elfusiek taman ak aeng’ che lanyei mbartanyisiek, che kiinde nganasokab karisiek, koboto ole mi laitoriat eng’ Jerusalem.

¹⁵ Ak kiyai laitoriat feda ak tahabu eng’ Jerusalem kot kotenit koik, ak kiyai taragonik kotenit mogoonik che mi emet ne soi.

¹⁶ Ak kigigetune Misri mbartanyisiek che kitinyei Solomon; kialei chemung’arainikab laitoriat kobee akwotisiek, akwet age tugul eng’ alyennyi.

¹⁷ Ak kiib kotogos eng’ Misri karit ne yamei sekelisiek bogol lo che bo feda, ak mbartanyit ne yamei bogol agenge ak konom: ak kiyai ko u noto laitorinik tugul che bo Hitik, ak laitorinikab Suria, kiget ichek eng’ kamugenywa.