1 TIMOTEO 6 - BUKUIT NE TILIL

Otwogik

¹ Ingoiityi otwogik alak tugul che ratotin kole nyoljin kiptainikwak teegisto tugul, si ma kichub kainetab Jehovah ak konetisiet.

² Ak ichek che tinyei kiptainik che iyanotin, ko mat kosas ichek, amu tupchosiek; ago kaigai koot ichek, amu icheget che nyoru toretet ko che iyani ak ko chamanik. Inet ng’alechu ak iteechi.

Konetisiosiek che ma bo iman

³ Ngoneti chi age tugul konetisiet ne ter, ama chamei ng’alek che bo iman, ng’alekab Kiptaiyandennyo Jesu Kristo, ak konetisiet ne namegei ak atebet ne bo kaiyweisietab Jehovah;

⁴ komenei, ama naei kiy, ago tinyei miando agobo teebutik ak tiiyosiekab ng’alek che bunu ng’etkonda, suriet, chemereret, kabwatutik che yaachen,

⁵ boriosiekab bik che kigong’emogis kabwatutikwak, ak che kigirebe imanit, kolen kaiyweet ne kiywei Jehovah ko oret ne kibore.

Magornatet ne bo iman

⁶ Ago kaiyweet ne kiywei Jehovah koboto yametab ge eng’ tuguk che kitinye, ko borotet ne o:

⁷ amu kima kiibu kiy konyo ng’ony, ama kimuchi keib kiy komanda eng’ ng’ony;

⁸ ago kitinye amitwogik ak ngoroik; yamech choto.

⁹ Ago ichek che machei koek magorek kobutyin yomset ak mestet ak magutik che chang’ che berberen, che ibu ng’wanindo, che lugui bik koba ng’emisiet ak luset.

¹⁰ Amu chametab siling’isiek ko tigitiot agenge ne bo yaitwogik alak tugul: che kigong’asyigei alage kot kometo kayanet ak kigotorgei eng’ arogenosiek che chang’.

Kotigonutik che bunu Paulo inegei

¹¹ Ago inye, ee, chitab Jehovah, mwee tuguchuto; ak isub imanda, ak kaiyweet ne kiywei Jehovah, kayanet, chamnyet, muitaet, mutyonet.

¹² Yai luget ne mie ne bo kayanet, nam sobondo ne bo koigeny, noto ne kigiguurjin, ak kiing’any ng’ang’et ne mie eng’ taitab baorinik che chang’.

¹³ Kang’atin anyun eng’ taitab Jehovah, ne ribei tuguk tugul kosopcho, ak eng’ taitab Kristo Jesu, ne kibaorian ng’ang’et ne mie eng’ taitab Pontio Pilato;

¹⁴ ale irib ng’atutiet amanyor berut, ne magimuchi keger kong’, agoi toogunetab Kiptaiyandennyo Jesu Kristo:

¹⁵ ne tun ibortoi eng’ betusiekyik, ne inendet ne iberurot ak ko Kamuktaindet inegei, Laitoriat ne bo laitorinik, ak Kiptaiyat ne bo kiptainik;

¹⁶ ne tinyei inegei sobondab koigeny, ne menyei eng’ lapkeiyet ne magimuchi kerikyi; ne tomo kogeer chi, ama imuchi kogeer: ingobunji inendet teegisto ak kamuktaet koigeny. Amen

¹⁷ Ng’at magorek che bo betusiechu, si mamenio, anan konde kamang’unenywa magornatosiek che matonondos, ago eng’ Jehovah inendet ne konech tuguk tugul eng’ aiyebindo si kobiit keboiboitune;

¹⁸ ile koyai ne mie, si kobiit koek magorek eng’ boisionik che miach, si kochobogis kogoito, koyomogei ak alak;

¹⁹ kogonorjigei lumdaet ne mie, agobo betusiek che bwanei, si kobiit konam sobondo noto ne bo iman.

²⁰ Ee, Timoteo, rib anyun noto kigegonin, istoege ng’alek che manamegei ak oretab Jehovah, ak kabeletab ge ne bo naet, noto kiguure eng’ lembech naet;

²¹ ne kigosub alage ak kigochiliil eng’ kayanet. Ingoteb mieindo koboten.