1 TIMOTEO 5 - BUKUIT NE TILIL

¹ Amerasyi boiyo, ago ng’alalji ko u kwanda; murenik ko u che otupche,

² chebiosok ko u kametisiek, kwonyik che mengechen ko u tibik che otupche, eng’ tililindo tugul.

Ole kanyol keteretito mosogik

³ Teech mosogik che mosogik iman.

⁴ Ago ngo tinyei mosoget age tugul lagok anan mochogoronik, konetgei korok kobarta kaiyweet ne kiywei Jehovah eng’ bikab gonywa, ak koyaakyi sigikwak toretet: amu taagaksei nito eng’ taitab Jehovah.

⁵ Ak inendet ne mosoget iman, ne tebyei inegei, kotinyei kamang’unennyi eng’ Jehovah, ak kotepto somutik ak sautik kemoi ak bet.

⁶ Ago inendet ne suegei ko kagome agot ngo sobei.

⁷ Ng’at tuguchuto, si kotebi ichek ko matinyei tewernat.

⁸ Ago ngo maribei chi bikyik, ak che siirei ko che bo gonnyi, ko kagoesio kayanet, ak ko ya kosiir chito ne ma iyan.

⁹ Amat kesirji ole kisirjin mosogik kotom koit kenyisiek tamanwogik lo, ne ki osotiotab chito agenge,

¹⁰ ne kimwaitae inendet boisionik che miach; ngo kigobai lagok, ngo kigotaach toek, ngo kigoun kelyekab che tililen, ngo kigotoret che nyalildos, ngo kigogiilgei eng’ boisiet age tugul ne mie.

¹¹ Ago esie mosogik che mengechen; amu ye kagongelelji Kristo, komach kitun;

¹² tinyei kiruoget anyun, amu kagometo kayanenywa ne bo tai.

¹³ Koboto noto anyun konetgei koek chorirenik, ak koitoti gorik; ago ma chorirenik kityo, ago chaamik ak che iboti chemererosiek, kong’alalote tuguk che manyoljin.

¹⁴ Noto anyun achame ale kitun mosogik che ta ko mengechen, si kosich lagok, ak korib got, amat kogochi boroindo bunyot kochuris eng’ ui tugul;

¹⁵ amu agot nguno ko kagomasta alak kosub Setani.

¹⁶ Ngo tinyei kobogoriot ne iyanat mosogik, ingotoret anyun ichek, si manyor nyigisindo kaniset; si kotoret che mosogik iman.

Boisiek

¹⁷ Ingiityi boisiek che bou komie, teegisto konyil aeng’, ne siirei ko ichek che yaei boisiet ne nyigis ne bo ng’olyot ak konetisiet.

¹⁸ Amu mwaei sirutiet kole, Amerat kutitab eito ne tiechei bek koborei, ak, Nyoljin kiboitiot melektanyi.

¹⁹ Ametaach kataamset agobo boiyo, kobate eng’ kutuswekab baorinik aeng’ anan ko somok.

²⁰ Ker kong’ eng’ taitab bik tugul icheget che yaei tengekwogik, si kobiit koiywei chun alage agichek.

²¹ Kang’atin anyun eng’ taitab Jehovah, ak Kristo Jesu, ak malaikaisiek che lewenotin, ale irib tuguchuto amesib itil kiruoget, ameyae kiy age tugul eng’ tiytiet.

²² Amegonoor chi age tugul eunek eng’ sartaet, anan iyai yamdaet ak tengekwogikab bik alak: ripge eng’ tililindo.

²³ Koboch nguno ko mata iee beek kityo, ago boisie divaik tutigin amu moeng’ung’, ak amu mianweguk che bo atgai tugul.

²⁴ Toogunotin tengekwogikab bik alak, indoe kobendi kiruoget; ak che bo bik alak agichek kosubi ichek.

²⁵ Ko u noto agine mitei boisionik che miach che toogunotin; ak che ma u choto ko maimugaksei koung’ogis.