1 TIMOTEO 4 - BUKUIT NE TILIL

Tuguk che kanyol keyai ye kinyoru konetik che ma bo iman

¹ Ago mwaei Tamirmiriet kotook, kole tun eng’ betusiek che bwanei koistoegei alak kayanet, koepchin it tamirmirik che ibeeti bich ak konetisiosiek che bo oik,

² eng’ chombilisietab bik che ng’alali lembech, che kigoigei kabwatutikwak che kigibeele karnet ne beelei bich;

³ che etei kitunis, ak koistoegei amitwogik alak, che kiyai Jehovah kole kotaach eng’ kongoi ichek che iyani ak kongen imanit.

⁴ Amu mie yautiet age tugul ne bo Jehovah, ama mi kiy ne nyolu keesio, ngetaach eng’ kongoi:

⁵ amu kitilili eng’ ng’olyotab Jehovah ak saet.

⁶ Ngot ibwatyi che kitupche tuguchu, iegu anyun kiboitiot ne mie ne bo Kristo Jesu, ne baat komie eng’ ng’alek che bo kayanet, ak eng’ konetisiet ne mie ne kiisub inye:

⁷ ago esie atindonik che bo tangoita che manamegei ak oretab Jehovah, che mwaei chebiosok. Ak igiilge eng’ kaiyweet ne kiywei Jehovah:

⁸ amu borot ne matia kagiiletab ge ne bo borto; ago borotet eng’ tuguk tugul kaiyweet ne kiywei Jehovah, amu tinyei arorutiet ne bo sobondo ne mi nguno, ak ne nyonei.

⁹ Bo iman ng’olyondoni, ak konyolu koyanak inne.

¹⁰ Kiyae anyun boisiet ne o amu nito ak kigiilige, amu mitei kamang’unennyo Jehovah ne sobei, inendet Yetindetab bik tugul, ago ne siirei ko bo bik che iyani.

Sobetab Timoteo inegei, ak konetisiosiek che ineti bik

¹¹ Ng’at tuguchu ak inet.

¹² Amat kosas chi ming’inateng’ung’; ago egu kaborunet eng’ ichek che iyani, eng’ ng’olyot, eng’ atepto, eng’ chamnyet, eng’ kayanet, eng’ tililindo.

¹³ Agoi anyo, chuuljige somanet, ak kateitaet, ak konetisiet.

¹⁴ Amebagakte iboisie konunet ne itinye, ne kigigonin eng’ oret ne bo amdaet, koboto kagonooretab eunek che bo boisiekab kaniset.

¹⁵ Igiiljige tuguchuto; igochige mising’; si kotook eng’ bik tugul bandang’ung’ ne bo tai.

¹⁶ Ripge, ak irib konetisieng’ung’. Tepte tuguchuto; amu ngiyae nito isoruge koboto icheget che kasin.