1 TIMOTEO 3 - BUKUIT NE TILIL

Kandaikab kaniset

¹ Bo iman ng’olyondoni, Ngo machei chi koek ribindetab kaniset, ko kamach boisiet ne mie.

² Kanyolji anyun ribindet koek ne magigeerjin ng’olyo ne ma litit, manong’otiotab osotiot agenge, ne ribegei, ne litit ng’omnatet, ne tebyei komie, ne taachei toek, ne chepcheb konetis;

³ ne ma kimaiya, ne ma birisiei; ago ne tala, ne ma chi ne bo boriot, ne machamei siling’isiek;

⁴ ne bou gonnyi komie, ne igochin eng’ teegisto tugul lagokyik kogas it;

⁵ (ago ngo manai chi ole boundoi gonnyi, koriptoi ano kanisetab Jehovah?)

⁶ Ama chi ne kota koyani, si ye men kobutyi kiruogetab oindet.

⁷ Ak kogeny konyoljin kotinyei baornatet ne mie eng’ icheget che mi sang’; si maibutyi tewernatet ak mestetab oindet.

⁸ Ko u noto kiboitinikab kaniset kanyol kotebi eng’ teegisto, ma che bo ng’elyebwek aeng’, ama che bogitos, ama che kasei miat agobo siling’isiek;

⁹ che namei ung’otietab kayanet eng’ kabwatet ne tilil.

¹⁰ Ak nyolu ketiem chuto agichek korok; ingoyai anyun ichek boisietab kiboitinik ngo magigeerjin ng’olyo ne ma litit.

¹¹ Ko u noto kobogorisiek, kanyol kotebi eng’ teegisto, ma kataamik, che ribegei, che kiyani eng’ tuguk tugul.

¹² Ingoek kiboitinikab kaniset manong’otaikab osotiot agenge, kobou lagokwak ak gorikwak komie.

¹³ Amu icheget che kigobois komie eng’ boisionoto bo kiboitinik, konyoru teegisto ne mie, ak nyiganatet ne o eng’ kayanet ne mitei eng’ Kristo Jesu.

¹⁴ Kasirun tuguchu, amang’u ale anyonjinin ko negit;

¹⁵ ago ngot agage, imuchi inai ole kanyol kotepto bik eng’ gotab Jehovah, noto kanisetab Jehovah ne sobei, toloita ak irimetab imanit.

¹⁶ Ak ne matiny, ko o ung’otiot ne bo kaiyweet ne kiywei Jehovah; Inendet ne king’ang’ak eng’ borto, Kigiityi imanda eng’ tamirmiriet, Ne kigeer malaikaisiek, Ne kigiamda eng’ Bororiosiek, Ne kiiyan che bo ng’ony, Ne kigimut kwo barak eng’ torornatet.