1 TIMOTEO 2 - BUKUIT NE TILIL

Kiborjin bik ole kanyoljindo kolos Jehovah Kibagenge

¹ Ne bo tai anyun aboru ale ingoyaak somutik, ak sautik, ak saisaet, ak mwaet ne bo kongoi agobo bik tugul;

² agobo laitorinik ak tugul che tinyei bounatet; si kobiit ketebe kalyet ak mutyonet eng’ kaiyweet ne kiywei Jehovah ak teegisto.

³ Mie nito ak ko taagaksei eng’ taitab Jehovah Yetindennyo;

⁴ ne machei kole kesor bik tugul, ak konyor naet ne bo imanit.

⁵ Amu mitei Jehovah agenge, katuiyoindet agenge agine kwenutab Jehovah ak bik, noto chito, Kristo Jesu,

⁶ ne kiigoitogei koek ne kitiage tugul; ne tun kibaorianjin eng’ betusiekyik;

⁷ kigindea anyun agobo noto aek amdoindet ak ne kiyoktoi (amwae imanit, mamwae lembech), konetindetab Bororiosiek eng’ kayanet ak imanit.

⁸ Amache anyun ale kosaei murenik eng’ komosta age tugul, konamjin barak eunekwak che tililen, ko mami neregek ak tiiyet.

⁹ Ko u noto kobogorisiek ingolaach ge eng’ kalaakset ne nyolu, eng’ teegisto ak ribetab ge; ma eng’ laetab sumeek, ak tahabu anan sonoek che kororon anan ngoroik che bo kamanutiet ne o;

¹⁰ ago (ko u ye nyoljin kobogorisiek che ibortogei kole bikab Jehovah icheget) eng’ boisionik che miach.

¹¹ Ingonetgei kobogoriot eng’ mutyonet koboto kasetab it.

¹² Ago machamjini kobogoriot konetis, anan koboi muren, ago kotebi eng’ mutyonet.

¹³ Amu kigiyai Adam korok, si keyae Awa;

¹⁴ ak kima king’al Adam, ago kingo kageng’al kobogoriot kobutyi bistoet;

¹⁵ ago kisoru eng’ sigisiet, ngo tebyei ichek eng’ kayanet ak chamnyet ak katabanet koboto ribetab ge.