1 TIMOTEO 1 - BUKUIT NE TILIL

Kagatet. Kanyol keribege konetisiosiek che ma bo iman

¹ Paulo, ne kiyoktoi ne bo Kristo Jesu ko u ng’atutietab Jehovah Yetindennyo, ak Kristo Jesu ne kamang’unennyo;

² asirjini Timoteo lakwennyu, ne bo iman eng’ kayanet: Ingoteb koboten mieindo, ak rirenetab ge, ak kalyet, che bunu Jehovah Kwanda ak Kristo Jesu Kiptaiyandennyo.

³ Ko u ye kiasomin ale itebe Epeso, ye kiawendi Makedonia, si kobiit ing’at bik alak amat konet konetisiet ne ter,

⁴ anan koepchi it atindonik ak tetutikab ibinwek che kigosiirto, che matinyei ole igesunegei, che ing’eeti teebutik, kosiir ripsetab boisietab Jehovah ne mi eng’ kayanet; kasomin nguno anyun ko u noto.

⁵ Ago kasuldaetab ng’atutioni ko chamnyet ne bunu muguleldo ne tilil ak kabwatet ne mie ak kayanet ne matinyei kenisiet:

⁶ ye kingo kagochilil bik alak eng’ tuguchuto, koyiemjigei ng’alalet ne bo buch,

⁷ chamei koek konetikab Ng’atutiet, nganda maiguitos che mwaei, anan ng’alechato mwaei eng’ kimnatet.

⁸ Ago kingen kele mie Ng’atutiet, ngo boisie chi ko u ye nyolu,

⁹ kongen kole kima kiyai Ng’atutiet agobo chi ne bo imanda, ago agobo bistoik ak ng’emik, agobo che yaachen ak kiptengeginik, agobo che ma tililen ak che maiywei Jehovah, agobo che barei kwanisiek ak che barei kametisiek agobo rumik,

¹⁰ agobo che soksei, ak murenik che ibegei ak murenik, ak che chorei bik, ak kiplembechonik, ak che iyostos lembech, ak ngo mi kit age tugul ne ketei konetisiet ne bo imanit;

¹¹ ko u ye mwaei logoiywek che miach che bo torornatetab Jehovah ne iberurot, che kigigona atononji.

Kotinyei Paulo kongoi amu rirenetab ge ne bo Jehovah

¹² Amwachini kongoi inendet, ne kiimuktawa, inendet Kristo Jesu Kiptaiyandennyo, amu kiita kole a chito ne kiyani, kondea boisiet;

¹³ nganda kia chi ne chubisiei eng’ tai, ak ne usisiei, ak kia kolgol: ago kianyoru rirenetab ge, amu kiayae ko mangen kotom ayan;

¹⁴ ak kitesak mieindab Kiptaiyandennyo kobarait koboto kayanet ak chamnyet ne mi eng’ Kristo Jesu.

¹⁵ Bo iman ng’olyondoni, ak nyolu koyanak inne, ne mwaei kole kinyo Kristo Jesu ng’ony kosor kiptengeginik; a ne bo tai eng’ choto;

¹⁶ ago kianyoru rirenetab ge amu ng’olyondoni, si kobiit kobarta Jesu Kristo muitaennyi tugul eng’ ane, ne a ne bo tai, koek kaborunet eng’ ichek che tun iyani inendet agoi sobondab koigeny.

¹⁷ Ingobunji anyun nguno Laitoriat ne bo koigeny, ne ma ng’emaksei, ne ma toogu, Jehovah ne inegei, teegisto ak torornatet koigeny ak koigeny. Amen.

¹⁸ Kagonin kayomisoni inye lakwennyu Timoteo, ko u amdaosiek che kisib kemwa agobo inye si kobiit imuch iyai luget ne mie eng’ choto;

¹⁹ iname kayanet ak kabwatet ne mie; che, kingo kagometo alage, kong’emogis eng’ kayanet;

²⁰ eng’ choto ko Humenayo ak Aleksandro; che kiagochi Setani, si kobiit kinet si machubis.