1 THESSALONIKEK 2 - BUKUIT NE TILIL

Koboru Paulo chamjinet ne tinyei eng’ boisiennyi ne bo amdaetab ng’alek

¹ Amu ongen okwek, tupchosiechu, itunennyo ne kigiitu olong’wong’, ole kimaek buch:

² ago kingo kaginyalilech eng’ tai ak kitewerech eng’ Pilipi, ko u ye ongen, ko kiginyiganitu eng’ Jehovah nenyo kemwawok logoiywek che miach che bo Jehovah eng’ boriet ne o.

³ Amu ma bo kateunennyo lelut, anan simdo, anan eng’ ng’alset:

⁴ ago ko u ye kigoyanwech Jehovah keegu che tononjin logoiywek che miach, keng’alali ko u noto; ma ko u che iboiboiti bik, ago Jehovah ne tiemei mugulelwekyok.

⁵ Amu kima kinyoruech eng’ sait age tugul keboisie ng’alekab kachaunetab ge, ko u ye ongen, anan ng’alekab ung’ot che bo keiyandit, baoriat Jehovah;

⁶ ama kicheng’e teegisto eng’ bik, anan eng’ okwek, anan eng’ alak, ye kita kiegu nyigisin eng’ okwek ko u che kiyoktoi che bo Kristo.

⁷ Ago kigi taloen eng’ kwenung’wong’, ko u baindet ne baei lagokyik:

⁸ ko u noto, kigiting’enok emosto ne bo chamnyet ne o, kigimache mising’ kele kegonok, ma logoiywek che miach che bo Jehovah kityo, ago sobonwekyok agichek, amu kioegu che chamotin mising’ eng’ achek.

⁹ Amu obwati, tupchosiechu, boisiennyo ne uui ak bichiindo, keboisie kemoi ak bet, si ma kigochi milet chi age tugul eng’ okwek. Kigiamwok logoiywek che miach che bo Jehovah.

¹⁰ O baorinik okwek, koboto Jehovah, agobo ole kigitepte acheget eng’ kwenung’wong’ okwek che oyani, eng’ tililindo ak eng’ imanda ko magitinye kiy ne kiruogunenech:

¹¹ ko u ye ongen ole kigiteechindoite chi age tugul eng’ okwek, ko u kwanda ak lagokyik, kiteeiywok ak kigiilok, ak kebaoriani,

¹² si kobiit obendate ko u ye nyolu eng’ Jehovah, ne kuurjinok bounatennyi ak torornatet.

Usisiet

¹³ Kimwachini anyun Jehovah kongoi, amu ng’olyondonito, ama kisistosi kele, ye kingotaach ng’olyot ne kiogasenech, noto ng’olyotab Jehovah, kiotaach, ma ko u ng’olyotab bik, ago ko u ye mi eng’ imanit, ng’olyotab Jehovah, noto agine ne boisiei eng’ okwek che oyani.

¹⁴ Amu okwek anyun, tupchosiechu, ko kioegu yaikab tuguk che yaei kanisosiekab Jehovah che mitei Judea eng’ Kristo Jesu: amu kionyoru ak okwek, nyalilwogik che u choto eng’ bikab emeng’wong’, agot ko u ye kinyor ichek eng’ Yahudik;

¹⁵ che kibar Kiptaiyat Jesu ak maotik, ak kionech, ama ibaibai Jehovah, ama namegei ak bik tugul;

¹⁶ etenech keng’alalji Bororiosiek si kobiit kesor; inyiiti kotugul tengekwogikwak: ago nyonjin ichek nereknatet agoi let.

Kotinyei Paulo emosto kogeer kanisetab Tesalonikek

¹⁷ Ago, achek anyun, tupchosiechu, nga mata kegeerge ak okwek togoch eng’ betusiek che ng’ering’, ma eng’ muguleldo, ko kigitiem mising’ inne kele kegeerok togoch amu emosto ne o:

¹⁸ amu kigimache kebwa olong’wong’, agot ane Paulo, ko kiamache ak ko ta amache; ago kiranyech Setani.

¹⁹ Amu tos nee kamang’unennyo, anan boiboiyennyo, anan kutwet ne bo torornatet? Tos ma okwek, eng’ taitab Kiptaiyandennyo Jesu eng’ nyonunennyi?

²⁰ Amu okwek torornatennyo ak boiboiyennyo.