1 SAMUEL 9 - BUKUIT NE TILIL

Kotuitos Saul ak Samuel

¹ Ak kimi chi ne bo oretab Benjamin, ne kainennyi ko ki Kis, weritab Abiel, weritab Seror, weritab Bekorat, weritab Apia, weritab Benjaminindet, chito ne nyigan, ne kim.

² Ak kitinyei werit, ne kigiguure kainennyi Saul, chito ne ki neranet ne kararan: ak kima komi eng’ lagokab Israel chito ne kararan kosiir inendet: ki koi kosiir chi tugul, kong’eete tigigoikyik, ak kotogosta.

³ Ak kibetyo sigirokab Kis kwandab Saul. Ak kilenji Kis werinnyi Saul, Imut age eng’ otwogik, ak obe ocheng’ sigirok.

⁴ Ak kibun emetab tulonokab Epraim, ak kibun emetab Salisa, ago manyor: yeityo kobun emetab Saalim, ak kima komi oloto: ak kibun emetab Benjaminik, ago manyor.

⁵ Kingoit emetab Sup, kolenji Saul otwogindennyi ne kimi tuwai, Nyo keweege; si mabagach kwandanyu kobwat sigirok, ak kobwatech.

⁶ Ak kilenji inendet, Keero, mitei nganasani chitab Kamuktaindet, ak inendet ko chito ne kigonyiti; ak tuguk tugul che mwaei kosuldoi iman: ngebe anyun yoto; tamangab komuch komwawech agobo bandanyo ne kibendi.

⁷ Kilenji anyun Saul otwogindennyi, Ago keero, ngot kebe, keipchini nee chichoto? Amu kogogesgei amitwogik eng’ tuguk che kogiibune, ama mi kagochinet ne keipchini chichoto bo Kamuktaindet. Kitinye nee?

⁸ Ak kiwolji otwogindonoto Saul kogeny, kolenji, Keero, atinye eng’ eunnyu kebeberta agenge eng’ ang’wan ne bo sekelitab feda: agochini noto chitab Kamuktaindet, si komwawech agobo bandanyo.

⁹ (Kingowa chi keny eng’ Israel, kwo koteebe Kamuktaindet ng’olyo, komwaei ko u ni kole, Obwa kebe gab keerindet: amu inendet ne kiguure Maotiot nguno ko kigiguure keny Keerindet.)

¹⁰ Kolenji anyun Saul otwogindennyi, Kemwa kit ne mie; nyo kebe. Koba anyun nganaset ole mi chitab Kamuktaindet.

¹¹ Ye kingotogostoi kobendi nganaset, konyor tibik kobendi koramei beek, ak kolenji, Mi keerindet yu?

¹² Ak kiwolji kolenji, Mi; ogeero, mi taing’ung’: chakte nguno, amu kait ra nganaset; amu tinyei bik ra tiseiywek eng’ ole toror:

¹³ ye oititoi kityo nganaset, onyoru inendet eng’ yoto, kotomo kotogosta ole toror koamis: amu maamisiei bik kot koit inendet, amu iberuri tiseiywek; si ye ibata koamis bik che kagiguur. Otogoste anyun nguno; amu onyoru inendet eng’ sainito.

¹⁴ Ak kitogosta koba nganaset; ak ye kingoba nganaset orit, ogeero, komong’ Samuel kotokyigei ichek, konyo kowendi ole toror.

¹⁵ Ak kiga kong’ang’ji Jehovah Samuel ko u amut, kotomo koit Saul, kolenji,

¹⁶ Ayogun mutai chito ne bunu emetab Benjamin koteni asis, si iil inendet koek bounindet eng’ bikyuk Israel, ak soru bikyuk eng’ eunekab Pilistik: amu kiageer bikyuk, amu kigoit oldanyu rirekwak.

¹⁷ Ak kingogeer Samuel Saul, kolenji Jehovah inendet, Keer chichi koamwaun-o! Nito ne bou bikyuk.

¹⁸ Yeityo korikyi Saul Samuel eng’ ye bo ormarich, ak kolenji, Asomin ale mwawa ole mi gotab keerindet.

¹⁹ Ak kiwolji Samuel Saul kolenji, A keerindonoto; togoste indoena, ui ole toror, amu kiamisiei tugul ak okwek ra: ak karon abagakten iwe, ak amwaun tuguk tugul che mi muguleldang’ung’.

²⁰ Ak agobo sigirok che kigobetyo betusiek somok che kigosiirto, ko mata ibwat, amu kogenyor. Ak tokyingei ng’o maget tugul ne bo Israel? Ma inye, ak got tugul ne bo kwandang’ung’?

²¹ Ak kiwol Saul kole, Ma a Benjaminindet, ne bo bororiet ne ming’in eng’ tugul che bo Israel? Ak orennyo ne ming’in eng’ ortinwek tugul che bo bororietab Benjamin? Amu nee anyun si ing’alalwa ko u ni?

²² Kiimut anyun Samuel Saul ak otwogindennyi, koba gotab toek, ak kogochi kotebe ole toogunot kosiir tugul eng’ kwenutab che kiga kiguur, che ki olo bo bik sosom.

²³ Ak kilenji Samuel kwong’indet, Ibu kebeberta ne kagagonin, ne kagamwaun, alenjin, Konor.

²⁴ Ak kiinem kwang’indonoto kubesto, ak che kimi baragutab benyoto, ak konde taitab Saul. Ak kile Samuel, Keer che kagigonorun-o! Nde taing’ung’, ak iam; amu kagigonorun kot koit sait ne koging’at, amu kamwa ale, Kaguur bichu. Kiamis anyun Samu ak Samuel eng’ betunoto.

²⁵ Ak kingo kagochorgei eng’ ole toror, koba nganaset, kong’alal ak Saul eng’ got barak.

²⁶ Ak king’eetyo karon mising’: ak kingo kairir emet, koguur Samuel Saul eng’ got barak, kolenji, Ng’eet si agonin iwe. King’eet anyun Saul, ak kimanda tuwai, inendet ak Samuel koba sang’.

²⁷ Kingochortagei eng’ ye boch nganaset, kolenji Samuel Saul, Mwachi otwogindeng’ung’ kondo, (ak kiindo,) ago tonon inye nguno, si amwaun ng’olyotab Kamuktaindet igas.