1 SAMUEL 8 - BUKUIT NE TILIL

Kosomei bik laitoriat

¹ Ak kingoosit Samuel, konde werikyik koek kiruogik koboi Israel.

² Ak kainetab taitanyi ko ki Joel; ak kainetab ne bo aeng’ ko ki Abija: ki kiruogik eng’ Beer-seba.

³ Ak ma bendate werikyik ortinwekyik, ago kimasta kosub magornotet eng’ oret ne ya, ak kitaach tuguk che kigoigoisie, ak komaas kiruoget.

⁴ Ak kiiyumgei boisiek tugul che bo Israel, ak kobwa ole mi Samuel eng’ Rama:

⁵ ak kolenji inendet, Keero, kaiositu, ama bendote weriguk ortinweguk: cheng’wech laitoriat ne iruokwech ko u bororiosiek tugul.

⁶ Ago kiyait ng’olyondonoto eng’ Samuel kingomwa ichek kole, Konech laitoriat ne iruokwech. Ak kisa Samuel Jehovah.

⁷ Ak kilenji Jehovah Samuel, Kas ng’alekab bik agobo tuguk tugul che kamwaun: amu ma inye ne kaesio, ago kaesio ane, kole maegu laitoriat eng’ ichek.

⁸ Ko u boisionik tugul che kigoyai koboch betut ne kiamutu kotogos eng’ Misri kot koit ra, kobagaktoa, ak kootot kanamonik che ter, koyaun aginye ko u noto.

⁹ Kasyi anyun ng’alekwak: ago iteechi komie, ak iborji kit ne u laitoriat ne tun laitorane ichek.

¹⁰ Ak kimwachi Samuel bichoto kisomei eng’ inendet laitoriat, ng’alek tugul che bo Jehovah.

¹¹ Ak kile, U ni laitoriat ne tun laitoranenok: namei werikwok, ak kolewenjigei kotononji karisiekyik, ak koek che lanyei mbartanyisiekyik: ak koruai kondoe karisiekyik:

¹² ak kolewenjigei icheget koek kiptainikab elfusiek ak kiptainikab konomusiek; ak kobat mbarenikyik alage, ak koges bekyik, ak kotany karikyik che bo luget, ak tugukab karisiekyik.

¹³ Ak konam tibikwok koek che yaei nyamdutik, ak koek che kwanyei, ak che beelei makatinik.

¹⁴ Ak korebenak mbarenikwok, ak mbarenikwok che bo sabibuk ak che bo emitik, che kororon eng’ tugul, ak kogochi otwogikyik.

¹⁵ Ak koib kebeberta agenge eng’ taman ne bo keswekwok, ak ne bo mbarenikwok che bo sabibuk, kogochi kiboitinikyik ak otwogikyik.

¹⁶ Ak korebenak otwogikwok che murenik, ak otwogikwok che tibik, ak neranikwok che kororon, ak sigirokwok, ak konde koyai boisionikyik.

¹⁷ Ibei kebeberta agenge eng’ taman ne bo kechirekwok: ak oegu otwogikyik.

¹⁸ Ak oririe eng’ betunoto amu laitoriandeng’wong’ ne tun olewenjinige; ak mawolwok Jehovah eng’ betunoto.

¹⁹ Ago kiesio bik kogas ng’alekab Samuel; ak kile, Achicha; ago kimache laitoriat ne boiywech;

²⁰ si keige ak achek bororiosiek tugul; ak si koruokwech laitoriandennyo, ak komandoi kondoenech, ak koyaiywech lugosiekyok.

²¹ Ak kigas Samuel ng’alek tugul che bo bik, ak kimwachi Jehovah ng’alechato kogas.

²² Ak kilenji Jehovah Samuel, Kasyi ng’alekwak, ak icheng’ji ichek laitoriat. Ak kilenji Samuel bikab Israel, Ingowo chi tugul nganasennyi.