1 SAMUEL 7 - BUKUIT NE TILIL

Koruochi Samuel eng’ Israel

¹ Ak kibwa bikab Kiriat-jearim, ak koib moingetab Jehovah kotogosta, ak koib kwo gotab Abinadab eng’ tulwet, ak kotaban Eleasar werinnyi si korib moingetab Jehovah.

² Ak kichang’it betusiek koboch ngotebe moinget Kiriat-jearim; amu kiek kenyisiek tiptem: ak kirirji Jehovah got tugul ne bo Israel.

³ Ak king’alalji Samuel got tugul ne bo Israel, kolenji, Ngot oweekyinige Jehovah eng’ mugulelwekwok tugul, oiste anyun kanamonik che too ak Astarot eng’ kwenung’wong’ ak otokyi mugulelwekwok Jehovah ak oot inendet inegei: si kosoruok eng’ eunekab Pilistik.

⁴ Kiisto anyun lagokab Israel Baalik ak Astarot, ak kiot Jehovah inegei.

⁵ Ak kile Samuel, Oyumji Israel tugul Mispa, si kobiit asaiywok Jehovah.

⁶ Ak kiiyumjigei tugul Mispa, ak kiram beek, ak kotumda eng’ taitab Jehovah, ak kiirugutgei betunoto, ak kimwa eng’ yoto kole, Kigeyachi Jehovah tengekto. Kiiruokyi Samuel lagokab Israel eng’ Mispa.

⁷ Ak kingogas Pilistik kole koiyumgei lagokab Israel eng’ Mispa, koba kiptainikab Pilistik kotogosta kobargei ak Israel. Ak kingogas lagokab Israel, koiywei Pilistik.

⁸ Ak kilenji lagokab Israel Samuel, Amebagakte irirji Jehovah Kamuktaindennyo agobo achek, si kosoruech eng’ eunekab Pilistik.

⁹ Ak kinam Samuel aruetab kechir ne reriei, ak kogoito koek kagochinet ne kibeeljin Jehovah komugul: ak kirirji Samuel Jehovah agobo Israel; ak kiwolji Jehovah inendet.

¹⁰ Ak ye kingota kogoitoi Samuel kagochinet ne kibeelei, korik Pilistik kobwa kobargei ak Israel: ago kitulji Jehovah Pilistik eng’ tulet ne o betunoto, ak konyalil ichek; ak kigibar eng’ taitab Israel.

¹¹ Ak kimanda bikab Israel eng’ Mispa, koba koon Pilistik, ak kobarat, agoi koit Bet-ka kel.

¹² Yeityo konam Samuel koita, ak konde kwenutab Mispa ak Sen, ak koguure kainennyi Eben-eser, kole, Kigotoretech Jehovah kot koit rani.

¹³ Kigiterter anyun Pilistik, ak matagai kobwa kogeny kosiir kiwotetab Israel: ak kigirinda Jehovah Pilistik eng’ betusiek tugul che bo Samuel.

¹⁴ Ak kigiweekyi Israel nganasok che kiga koibe Pilistik, koboch Ekron kot koit Gat; ak kiitiach Israel kiwotennyi eng’ eutab Pilistik. Ak kibiit kalyet eng’ kwenutab Israel ak Amorik.

¹⁵ Ak kiiruokyi Samuel Israel eng’ betusiek tugul che bo sobennyi.

¹⁶ Ak kiwendi eng’ kenyit age tugul komuutoti Bet-el, ak Gilgal, ak Mispa; ak kiiruokyi Israel eng’ komoswechoto tugul.

¹⁷ Ak kiweekyingei Rama, amu kimi gonnyi yoto; ak kiiruokyi Israel eng’ oloto: ak kiteekyi Jehovah kaptisisiet eng’ yoto.