1 SAMUEL 5 - BUKUIT NE TILIL

Komi Moinget nganasokab Pilistik

¹ Kiga koib anyun Pilistik moingetab Kamuktaindet, ak koib eng’ Eben-eser konyo Asdod.

² Ak kiib Pilistik moingetab Kamuktaindet, konde gotab Dagon, ak konde ole negite Dagon.

³ Ak kingong’eetyo bikab Asdod karon inne, eng’ betutab aeng’, ogeero, kogolul Dagon kosieb mo eng’ taitab moingetab Jehovah. Ak kiinem Dagon ak konde komostanyi kogeny.

⁴ Ak kingong’eetyo karon inne eng’ betutab somok, ogeero, kogolul Dagon kosieb mo eng’ taitab moingetab Jehovah; ak king’et metitab Dagon ak rubeiywekab eunekyik tuwai, ak kimi kurgat; king’et kebeberta kityo ne kogomutak ne bo Dagon.

⁵ Eng’ noto anyun, ko matiechei tisiikab Dagon kurgetab gotab Dagon eng’ Asdod, kot koit ra, anan ko chi age tugul ne nyonei gotab Dagon.

⁶ Ak kinyigisyi eutab Jehovah bikab Asdod, ak kibar ichek, ak kobire miando ne ibwansei, Asdod ak kiwotosiekyik.

⁷ Ak kingogeer bikab Asdod kole kagoek ko u noto, kole, Ma kotebyei moingetab Kamuktaindetab Israel kobotech: amu kagong’wanit eunnyi eng’ achek, ak eng’ Dagon kanamwennyo.

⁸ Kiiyokto anyun kiyum kiptainik tugul che bo Pilistik kobwa ole mi ichek, ak kolenji, Kiitoi nee moingetab Kamuktaindetab Israel? Ak kiwol kole, Ngeibot moingetab Kamuktaindetab Israel kot koit Gat. Ak kiibot moingetab Kamuktaindetab Israel.

⁹ Ak kingo kagoibot, konyalil Jehovah nganasanato eng’ kanyalilet ne o mising’: ak kibir bikab nganaset, che mengech ak che eechen, ak kimong’une ichek miando ne ibwansei.

¹⁰ Kiiyokto moingetab Kamuktaindet kwo Ekron. Ak kingoit moingetab Kamuktaindet Ekron, kowaach Ekronik kole, Kagoibwech moingetab Kamuktaindetab Israel konyo kobarech ak bikyok.

¹¹ Kiiyokto anyun kiyum kiptainik tugul che bo Pilistik kotuiyo, ak kile, Oiste moingetab Kamuktaindetab Israel, kwo oldanyi kogeny, si mabarech, ak bikyok: amu kibiit kanyalilet ne bo meet eng’ nganaset komugul; kinyigisit mising’ eutab Kamuktaindet eng’ oloto.

¹² Ak bik che ma bek ko kigibire miando ne ibwansei: ak kitogosta kipsengwet rirekab nganaset.