1 SAMUEL 4 - BUKUIT NE TILIL

Koluulei pilistik Moingetab Jehovah

¹ Kinyonji Israel tugul ng’olyotab Samuel. Kimanda Israel koba kobargei ak Pilistik, ak kiteech ole negite Eben-eser: ak kiteech Pilistik Apek.

² Kitetgei Pilistik kobargei ak Israel: ak ye kingotuiyo luget, ko kigibar Israel eng’ taitab Pilistik: ak kibar che bo luget eng’ koronoto ole bo bik elfusiek ang’wan.

³ Ak ye kingoit bik nganaset, kole boisiekab Israel, Amu nee si kobarech Jehovah rani eng’ taitab Pilistik? Ongeibu moingetab arorutietab Jehovah eng’ Silo, konyo oli kimi, konyo kwenunnyo kosoruech eng’ eunekab bunikyok.

⁴ Kiiyokto anyun bichoto bik koba Silo, ak kiib eng’ yoto moingetab arorutietab Jehovah ne bo lugosiek, ne tebe kerubisiek: ak kimi yoto werichoto aeng’u bo Eli, Hopni ak Pineas, koboto moingetab arorutietab Kamuktaindet.

⁵ Ak kingoit moingetab arorutietab Jehovah nganaset, kowaach Israel tugul eng’ waagat ne o, kot kochei emet.

⁶ Ak kingogas Pilistik bolatetab waagat, komwa kole, Bo nee bolatetab waagandani eng’ nganasetab Hebranik? Ak kinai kole kagoit moingetab Jehovah nganaset.

⁷ Ak kiiywei Pilistik, amu kile, Kanyo Kamuktaindet nganaset. Ak kile, Bwa achek! Amu tom kobiitu kit ne u ni atkinye kora.

⁸ Bwa achek! Ng’o ne soruech eng’ cheptalelisiechu kimen? Chuto ko cheptalelisiechu kibarei Misrik eng’ borotwek alak tugul eng’ ong’atet.

⁹ Ogimegitu, ak oegu murenik, ee okwek Pilistik, si moegu otwogikab Hebranik ko u ye ki otwogikwok ichek: oegu murenik anyun, ak oyai luget.

¹⁰ Ak kiyai Pilistik luget, ak kigibar Israel, ak kimwei chi age tugul kwo emainnyi: ak kibiit baret ne o mising’; amu kibek che bo Israel murenik elfusiek sosomu che bunei kelyek.

¹¹ Ak kigiib moingetab Kamuktaindet; ak kigibar werichoto aeng’ bo Eli, Hopni ak Pineas.

Meetab Eli

¹² Ak kilabat eng’ ole mi luget chito ne bo oretab Benjamin, ak kiit Silo betunoto ko kagogerer ngoroikyik, ak komi ng’ung’unyek metinnyi.

¹³ Ak kingoit, ogeero, kitebe Eli ng’echerennyi eng’ tabandab oret koripsei: amu kibotan muguleldanyi agobo moingetab Kamuktaindet. Ak kingoit chichoto nganaset, ak komwa ng’alechato, kowaach nganaset tugul.

¹⁴ Ak kingogas Eli bolatetab rirek, kole, Bo nee bolatoni wasegei bik? Ak kilabat chichoto, kwo komwachi Eli.

¹⁵ Ki bo Eli kenyisiek tamanwogik sogol ak sisiit; kiga kogor ne kima kota komuchi kogeer kiy.

¹⁶ Ak kilenji chichoto Eli, A inendet ne kabunu luget, ak kamweu ra eng’ ole mi luget. Ak kile Eli, Katepto ano ng’alek-o, werinnyu?

¹⁷ Ak kiwol inendet ne kiibu ng’alek, kole, Kagomwei Israel eng’ taitab Pilistik ak kagobiit baret ne o eng’ bik, ak kagobek agichek weriguk tuwai, Hopni ak Pineas, ak kageib moingetab Kamuktaindet.

¹⁸ Ak kingomwa agobo moingetab Kamuktaindet, kobut Eli kobun batai eng’ ng’echerennyi eng’ tabandab ormarich, ak king’et kaatit, ak kime: amu ki chi ne kiga koosit ak kiga konyigisit. Ak kiga koruokyi Israel kenyisiek artam.

¹⁹ Ak ki tamono osotiotab werinnyi, Pineas, ki negit kosigis: ak kingogas ng’alek kole kageib moingetab Kamuktaindet, ak kole kagome kwandab manong’otiondennyi koboto manong’otiondennyi, kong’uruk ak kosigis; amu kinyonji inendet ng’wanindo.

²⁰ Ak ye kimachei kome komwachi inendet kwonyik che kitonondos eng’ ye negit, kolenji, Ameiywei; amu kesich werit. Ago ma wol kiy, ama iit ng’alechato.

²¹ Ak kiguure lakwanato Ikabod, kole, Kagoistogei torornatet eng’ Israel: amu kageib moingetab Kamuktaindet, ak amu kwandab manong’otiondennyi ak manong’otiondennyi.

²² Ak kile, Kagoistogei torornatet eng’ Israel; amu kageib moingetab Kamuktaindet.