1 SAMUEL 31 - BUKUIT NE TILIL

Kiterteri Israelik eng’ tulwetab Gilboa, ak meetab Jonatan ak Saul

¹ Kibargei anyun Pilistik ak Israel: ak kimwei murenikab Israel eng’ taitab Pilistik, ak kiibutyo eng’ tulwetab Gilboa ko kagebar.

² Ak kion Pilistik mising’ Saul ak werikyik, kirikyi; ak kibar Pilistik Jonatan, ak Abinadab, ak Malkisua, werikab Saul.

³ Ak kigoromit boriet mising’ eng’ Saul, ak kion inendet mwogik kot koriich; ak kinyalil kot amu mwogichoto.

⁴ Kolenji anyun Saul chito ne kiipchin karikyik, Ng’usu rotweng’ung’ bo chok, ak itoorena; si mabwa bichu ma kimuratan, kotoora, ak kogengeniena. Ago ma cham chito ne kiipchin karikyik; amu kiiywei kot. Konem anyun Saul rotwennyi bo chok, ak kobutyi.

⁵ Ak kingogeer chito ne kiipchin karik kole, kagome Saul, kobutyi agine rotwennyi bo chok, ak kime koboto inendet.

⁶ Kime anyun Saul, koboto werikyik somok, ak chito ne kiipchin karikyik, ak bikyik tugul, eng’ betunak.

⁷ Ak kingogeer bikab Israel che kimi atebwet komosin, ak ichek che kimi Jordan bitonin, kole kagomwei bikab Israel, ak kagome Saul ak werikyik, kobagakta nganasok ak komwei: ak kibwa Pilistik komeny.

⁸ Ak eng’ betut ne kiisubi noto, ye kingobwa Pilistik kobut bik che kiga kibar, konyor Saul ak werikyik somok ko kagobek eng’ tulwetab Gilboa.

⁹ Ak kitil metinnyi, ak koreegune karikyik, ak koyokto kemwaita eng’ emetab Pilistik komoswek tugul, keib ng’alechato koba gotab kanamonikwak, ak koipchi bik.

¹⁰ Ak kiinde karikyik gotab Astarot: ak koratyi mustanyi inatutab Bet-san.

¹¹ Ak kingogas bik che kimenyei Jabes-gilead agobo kit ne kiyachi Pilistik Saul,

¹² kong’eetyo murenik tugul che nyigonen ak koba eng’ kemout komugul, ak konem mustab Saul ak muswekab werikyik eng’ inatutab Bet-san; ak kiit Jabes, ak kobeel eng’ oloto.

¹³ Ak kiib kowekwak, ak kotupchi ketit kel eng’ Jabes, ak korugutgei betusiek tisab.