1 SAMUEL 30 - BUKUIT NE TILIL

Kobokyin Amalegik Siklag, ak koonoti Daudi ichek

¹ Ak kingoit Daudi ak bikyik Siklag eng’ betutab somok, ko kagobokyi Amalegik Murot ne bo Tai, ak Siklag, ak kiga kobar Siklag ak kobeel eng’ mat;

² Ak kiga koluul kwonyik che kimi yoto, che mengech ak che eechen: ma bar chi age tugul, ago kiluul ak koba.

³ Ak kingoit Daudi ak bikyik nganaset, ogeero, kiga kebeel; ak kigiluul osotikwak, ak werikwak, ak tibikwak.

⁴ Ak kiwaach Daudi ak bik che kimi koboto inendet, ak koririo, kot ko ma komuchi koririo.

⁵ Ak kigiluul osotikab Daudi tuwai, Ainoam Jesreelyot, ak Abigail ne ki osotiotab Nabal Karmelindet.

⁶ Ak kiimgei mising’ Daudi, amu kimwa bik kole kilache inendet eng’ koik, amu kiarogenso sobonwekab bik tugul, kiarogen chi age tugul agobo werikyik ak tibikyik: ago kiigimitgei Daudi eng’ Jehovah Kamuktaindennyi.

⁷ Ak kilenji Daudi Abiatar tisiindet, weritab Aimelek, Asomin ibwa epod konyo yu. Ak kiib Abiatar epod konyo ole mi Daudi.

⁸ Ak kiteebe Daudi Jehovah kolenji, Ngot asub lugoni, aname? Ak kiwolji kolenji, Isub: amu iname iman, ak ne matiny imutu tugul.

⁹ Kiwa Daudi anyun, koboto murenik bogol lo che kimi koboto inendet, kot koit kererutab Besor, ole kiga tebe bik che kiga ng’et.

¹⁰ Ago kiisub Daudi bichoto koboto murenik bogol ang’wan: amu kitebi bik bogol wogik aeng’u che kima imuchi kolandae kererutab Besor amu kiga kong’etyo mising’.

¹¹ Ak kinyor bichoto Misrindet eng’ kewet, ak kiimutyi Daudi, ak kiigochi amitwogik, ak kiam; ak kiinaga beek koee:

¹² ak kiigochi makatiat ne ming’in ne bo mogoonik, ak temenik aeng’ che bo sabibuk che yaamnyotin: ak kingo kagoam kosob: amu kima am kiy, anan koee beek eng’ betusiek somok ak kemousiek somok.

¹³ Ak kilenji Daudi inendet, I bo gab ng’o? Ak ibunu ano? Ak kile, A muren ne bo Misri, a otwogindetab Amalegindet; kibagakta kiptaiyandennyu, amu kiamian eng’ betusiechu somok.

¹⁴ Kiga kibokyi Murot ne bo Tai ne bo Keretik, ak oldab Juda, ak oldab Kaleb ne mi Murot ne bo Tai; ak kigibeel Siklag eng’ mat.

¹⁵ Ak kilenji Daudi inendet, Ichame imuta ole mi lugonoto? Ak kile, Iyosiewa eng’ Kamuktaindet, ile mebara, anan indea eunekab kiptaiyandennyu, si amutin ole mi lugonoto.

¹⁶ Ak kingo kagomut kochortagei, ogeero, kiga yom bichoto ola tugul eng’ emet, koamisiei ak koeeisei, ak kourerendos, amu barunenik che chang’ che kiga luul eng’ emetab Pilistik, ak eng’ emetab Juda.

¹⁷ Ak kibar Daudi ichek koboch ko karatarat agoi koskoleng’utab betut ne bo aeng’: ama chilil chi agot agenge, kobate murenik bogol ang’wan che kilany tambesik ak komwei.

¹⁸ Ak kisor Daudi tugul che kiga luul Amalegik: ak kisor Daudi osotikyik tuwai.

¹⁹ Ak kima bete kiy ichek, ngo ne ming’in anan ngo ne o, anan werik anan ko tibik, anan ko barunenik, anan ko kiy age tugul ne kiga ib: kiib Daudi tugul koweek.

²⁰ Ak kikweri Daudi akwotisiek tugul che bo kechirek ak che bo tuga, che kikweri ichek kondoe tuga alak, ak kole, Chuto ko barunenikab Daudi.

²¹ Kiit anyun Daudi ole kimi murenjoto bogolwogik aeng’u, che kiga kong’etyo mising’ kot ko mata komuch kosub Daudi, che kiga mwachi kotebe kererutab Besor: ak kiba kotorokta Daudi, ak kotorokta bik che kimi koboto inendet: ak kingorikyi Daudi bichoto, kogat ichek.

²² Kiwol anyun bik tugul che yaachen, ak bikab Belial, eng’ bik che kiga ba ak Daudi, ak kile, Magigochini ichek kiy age tugul eng’ barunenik che kagiweegu, amu kima kibe tugul, kobate kityo kigochin chi tugul osotiondennyi ak lagokyik, si komut ak koba.

²³ Kole Daudi anyun, Amat oyai ko u noto, che kitupche, eng’ tuguk che kogonech Jehovah, ne koribech, ak koinde eunekyok lugoni koibokyinech.

²⁴ Ak ng’o ne kasok eng’ ng’alechu? Amu ko u ole tenitu kebebertab ne wendi luget, kotenitu noto kebebertab ne tebyei koribei tuguk: pcheei koaechin.

²⁵ Ak kiek ko u noto koboch betunoto agoi, kiyai koek ng’atutiet ak kayomiset agobo Israel, agoi rani.

²⁶ Ak kingonyo Daudi Siklag, koyokyi barunenik boisiekab Juda, choronokyik, kole, Ogeero, kagochineng’wong’ ne bo barunenikab bunikab Jehovah;

²⁷ kiiyokyi che kimi Bet-el, ak che kimi Ramot ne bo Murot ne bo Tai, ak che kimi Jatir;

²⁸ ak che kimi Aroer, ak che kimi Sipmot, ak che kimi Estemoa;

²⁹ ak che kimi Rakal, ak che kimi nganasokab Jerameelik, ak che kimi nganasokab Kenik;

³⁰ ak che kimi Horma, ak che kimi Korasan, ak che kimi Atak;

³¹ ak che kimi Hebron, ak komoswek tugul che kicham koitei Daudi ak murenikyik.