1 SAMUEL 3 - BUKUIT NE TILIL

Keguurei Samuel

¹ Ak kiboisiechi lakwanato Samuel Jehovah eng’ taitab Eli. Kima ko tai kegasei ng’olyotab Jehovah eng’ betusiechoto; kima komi ng’ang’utiet ne toogu.

² Ak ye kingoru Eli eng’ oldanyi, (kigatoi kogorio konyekyik, kot ko ma kogeerei kiy,)

³ ak ye kitom kome tait ne bo Kamuktaindet, ak koga koru Samuel, eng’ hekalutab Jehovah, ole kimi moingetab Kamuktaindet;

⁴ koguur Jehovah Samuel: ak kile, Ami yu.

⁵ Ak kilabat ole mi Eli, ak kolenji, Ami yu; amu keguura. Ak kile, Ma aguurse; ru kogeny. Ak kiwa koru.

⁶ Ak kiguur Jehovah kogeny, kole, Samuel. Ak king’eet Samuel kwo ole mi Eli, ak kolenji, Ami yu; amu keguura. Ak kiwolji Eli kolenji, Ma aguurse, werinnyu; ru kogeny.

⁷ Kitom konai Samuel Jehovah, ak kitom keng’ang’ji inendet ng’olyotab Jehovah.

⁸ Ak kiguur Jehovah Samuel kogeny ne bo somok. Ak king’eet kwo ole mi Eli, ak kolenji, Ami yu; amu keguura. Ak kinai Eli kole kaguur Jehovah lakwanito.

⁹ Kolenji anyun Eli Samuel, Ui, iru: ak ngot koguurin, imwa ile, Ng’alal, Jehovah; amu kasei otwogindeng’ung’. Kwo anyun Samuel koru eng’ oldanyi.

¹⁰ Ak kinyo Jehovah, ak kotonon, koguur ko u tai, kole, Samuel, Samuel. Kile anyun Samuel, Ng’alal; amu kasei otwogindeng’ung’.

¹¹ Ak kilenji Jehovah Samuel, Keero, ayae kit eng’ Israel, ne ng’wonegitu itik tuwai che bo chito age tugul ne kasei.

¹² Ayachini Eli eng’ betunoto tuguk tugul che kiamwa agobo gonnyi, koboch taunet agoi let.

¹³ Amu kiamwachi alenji, Aruokyini gonnyi koigeny, amu tengekto ne kiingen, amu kiipchigei werikyik chubisiet, ama ker kong’.

¹⁴ Noto anyun kiayosie agobo gotab Eli ale, magitisei tengektab gotab Eli, eng’ tiseiywek anan ko eng’ kagochinoik agoi koigeny.

¹⁵ Ak kiru Samuel agoi koeech, ak kiyat kurgotikab gotab Jehovah. Ak kiiywei Samuel koborji Eli ng’ang’utionoto.

¹⁶ Kiguur Eli Samuel anyun, ak kolenji, Werinnyu, Samuel. Ak kile, Ami yu.

¹⁷ Ak kile, Nee kit ne komwaun Jehovah? Asomin ale, ameung’ena ng’olyondonoto: ingoyaun ko u noto Kamuktaindet, ak ne siirei noto, ngot iung’ena kiy age tugul eng’ tuguk tugul che komwaun inendet.

¹⁸ Ak kimwachi Samuel kiy age tugul, ama ung’e kiy inendet. Ak kile Eli, Inendet ko Jehovah: ingoyai ko u ye keerei kole mie.

¹⁹ Ak kieet Samuel, ak kimi Jehovah koboto inendet, ama cham kobutyi ng’ony ng’olyo age tugul eng’ ng’alekyik.

²⁰ Ak kinai Israel tugul koboch Dan agoi Beer-seba kole kogigimit Samuel koek maotiotab Jehovah.

²¹ Ak kitook Jehovah kogeny eng’ Silo: amu king’ang’jigei Jehovah Samuel eng’ Silo eng’ ng’olyotab Jehovah.