1 SAMUEL 29 - BUKUIT NE TILIL

Keonei Daudi eng’ lugetab Pilistik

¹ Kiiyumji anyun Pilistik lugosiekwak tugul Apek: ak kiteech Israel ye negite kondab beek ne mi Jesreel.

² Kiba anyun kiptainikab Pilistik kobee bogolwogik ak elfusiek: ak kiletu Daudi ak bikyik koboto Akis.

³ Yeityo komwa bounikab Pilistik kole, Yaei nee Hebranichu? Ak kilenji Akis bounikab Pilistik, Ma Daudi nito otwogindetab Saul laitoriatab Israel, ne komi kobota eng’ betusiechu anan eng’ kenyisiechu, ak tom anyoru lelut eng’ inendet koboch ngoistogei rani?

⁴ Ago kinerekyi inendet bounikab Pilistik; ak kilenji bounikab Pilistik inendet, Ilenji chichi koweek, koweektagei oldanyi ole kiiborji, amat kochortagei kwo luget kobotech, si maek bunyondennyo eng’ ole mi luget: amu, nee ne igochin konamgei ak kiptaiyandennyi? Tos ma eng’ metowekab bichu?

⁵ Ma Daudi nito, ne kitienjingei ichek agobo inendet eng’ ureriosiek kole, Kibar Saul elfusiek, Ak kibar Daudi tamanusiekab elfusiek.

⁶ Kiguur anyun Akis Daudi, ak kolenji, Ko u ye sobei Jehovah, ko kiitebi eng’ imanda, ak mie eng’ tainnyu mandaeng’ung’ ak nyonuneng’ung’ kobota eng’ luget: amu tom anyorjin yaitiet koboch inyo ole ami agoi rani: agot nganda u noto, ko machamin kiptainik.

⁷ Ara anyun weektege, ui eng’ kalyet, si megochi kiptainikab Pilistik konerekso.

⁸ Ak kilenji Daudi Akis, Koayai nee? Ak koinyorji nee otwogindeng’ung’ koboch ye kiami taing’ung’ agoi rani, si mawe kebarge ak bunikab kiptaiyandennyu laitoriat?

⁹ Ak kiwolji Akis Daudi kolenji, Angen ale i mie eng’ tainnyu, ko u malaikaiyatab Kamuktaindet: ago kagomwa bounikab Pilistik kole, Magibendi tugul luget koboto inendet.

¹⁰ Noto anyun, muste karon koboto otwogikab kiptaiyandeng’ung’ che koobwane tugul: ak ye ong’eetye karon ko kaeech, ko kalapkeit, obe.

¹¹ King’eet anyun Daudi karon mising’, inendet ak bikyik, si koba karon, koweektagei emetab Pilistik. Ak kitogosta Pilistik koba Jesreel.