1 SAMUEL 28 - BUKUIT NE TILIL

Saul ak kwondo ne bonindet ne kimi Endor

¹ Kiiyum Pilistik lugosiekwak eng’ betusiechoto koba luget, kobargei ak Israel. Ak kilenji Akis Daudi, Nai komie ile, kibendi tuwai luget, inye ak mureniguk.

² Ak kilenji Daudi Akis, Noto anyun, inae kit ne yaei otwogindeng’ung’. Ak kilenji Akis Daudi, Noto anyun, ayain iegu ne iribwa metinnyu agoi.

³ Kiga kome Samuel, ak kiga korirji Israel tugul inendet, ak kigitupchi Rama, nganasennyi. Kiga koon Saul ichek che kiboisie oik, ak bonik eng’ emet.

⁴ Ak kiiyumgei Pilistik, ak koba koteech Sunem: ak kiiyum Saul Israel tugul, ak koteech Gilboa.

⁵ Ak kingogeer Saul lugetab Pilistik, koiywei, kirukrugen muguleldanyi mising’.

⁶ Ak ye kingolen koteebe Saul Jehovah, ko ma kowolji Jehovah, eng’ karuotitaosiek, anan eng’ Urim, anan eng’ maotik.

⁷ Kolenji anyun Saul otwogikyik, Ocheng’wa kwondo ne boisie oik, si awa ole mi inendet ak ateepse. Ak kilenji otwogikyik inendet, Keero, mi kwondo En-dor ne boisie oik.

⁸ Ak kiwalgei Saul, ak kolaach ngoroik alak, ak kwo inendet koboto bik aeng’ ak kiit kemoi ole kimi kwonyoto: ak kilenji, Asomin ale, ng’orsewa eng’ oindet ne iboisie, si imutwa kotogos chito age tugul ne amwaun kainennyi.

⁹ Ak kilenji kwonyoto inendet, Keero, ingen inye kit ne kigoyai Saul, ko u ye kigoisto eng’ emet icheget che boisie oik, ak bonik: amu nee si iriich sobondanyu, igona ame?

¹⁰ Ak kiiyosiechi Saul inendet eng’ Jehovah, kolenji, Ko u ye sobei Jehovah, ko mami biret ne inyoru agobo kiito.

¹¹ Kile anyun kwonyoto, Ng’o ne imache amutun kotogos? Ak kile, Imutwa Samuel kotogos.

¹² Ak kingogeer kwonyoto Samuel, kowaach eng’ kutit ne o, ak kimwachi kwonyoto Saul kolenji, Amu nee si igena? Amu i Saul inye.

¹³ Ak kilenji laitoriat inendet, Ameiywei; igeere nee? Ak kilenji kwonyoto Saul, Ageere cheptalelit ne togosu eng’ ng’ony.

¹⁴ Ak kilenji inendet, Tinyei itondo nee? Ak kile, Boiyot ne togosu; ak ilaachi ngoriet. Ak kinai Saul kole Samuel inendet, ak kiing’uruk kot kotiiny togennyi ng’ony kogutung’ji.

¹⁵ Ak kimwachi Samuel Saul kolenji, Amu nee si iima, imutwa atogos? Ak kiwolji Saul kolenji, Atinye nyalilda ne ng’wan; amu kabwa Pilistik kebarge, ak kogometa Kamuktaindet, ama kowolwa kiy, eng’ maotik, anan eng’ karuotitaosiek: noto anyun kaguurin, si kobiit iborua kit ne ayae.

¹⁶ Ak kile Samuel, Amu nee si iteebena, ago kigometen Jehovah, ak kigoek bunyondeng’ung’?

¹⁷ Ak kigoboisiechigei Jehovah, ko u ye kimwa eng’ ane: ak kigobetenen Jehovah bounatet, ak kogochi chitab kokweng’ung’, inendet ko Daudi.

¹⁸ Amu ma igas it kutitab Jehovah, ama isuldochi neregekyik che koromen eng’ Amalek, ko kayaun anyun Jehovah kii rani amu noto.

¹⁹ Ak kogeny, indoi Jehovah Israel eunekab Pilistik koboten aginye: ak omite mutai kobota inye ak weriguk: ak kogeny indoi Jehovah lugetab Israel eunekab Pilistik.

²⁰ Kiibutyi ng’ony Saul anyun kosieb mo, ak kiarogen mising’, amu ng’alekab Samuel: ak kima kota kotinyei kimnatet; amu kima amis eng’ betut komugul anan kemout komugul.

²¹ Ak kinyo kwonyoto ole mi Saul, ak kogeer kole tinyei arogenet ne o, ak kolenji inendet, Keero, kagogas cheptang’ung’ ne otwogindet ng’aleguk, ak kande sobondanyu eunnyi, ak kaagas ng’alek che kemwawa.

²² Asomin anyun ale, igas ng’alekab cheptang’ung’ ne otwoget, ak chamwa aibun amitwogik tutigin ande taing’ung’; ak iam, si kobiit isich kimnatet eng’ bandang’ung’.

²³ Ago kiesio ak kole, Maame. Ago kibirji inendet otwogikyik ak kwonyoto; ak kigas ng’alekwak. Ak king’eet eng’ ng’onyut, ak kwo kotebe itogut.

²⁴ Ak kitinyei kwonyoto eng’ go moita ne nerat; ak kichakta, kwo koeny; ak kiinem busiek, ak kokwanykwany, ak kobeel makatinik che ma kinde mermerek:

²⁵ yeityo koib amitwogichoto ak konde taitab Saul ak otwogikyik; ak kiam. Yeityo kong’eetyo, ak koba bandanywa kemounoto.