1 SAMUEL 27 - BUKUIT NE TILIL

Unyegei Daudi eng’ Gat ak kotaachei Siklag

¹ Ak kimwa Daudi eng’ muguleldanyi kole, Tatun amechini eunekab Saul: mami kiy ne mie kosiir amwechi emetab Pilistik; si kogesgei kamang’unetab Saul, si ma kocheng’a kogeny eng’ kiwotosiek tugul che bo Israel: si achilile eunekyik.

² Ak king’eet Daudi kolanda, inendet ak bik bogol lo che kimi koboto inendet, kot koit ole mi Akis weritab Maok, laitoriatab Gat.

³ Ak kitebi Daudi ak Akis eng’ Gat, inendet koboto bikyik, chi tugul ak bikab gonnyi, agot Daudi ak osotikyik aeng’, Ainoam Jesreelyot, ak Abigail Chepkarmelyot, ne ki osotiotab Nabal.

⁴ Ak kigimwachi Saul kelenji, kogomwechi Daudi Gat: ak mata kocheng’at inendet kogeny.

⁵ Ak kilenji Daudi Akis, Ngot ko koanyoru mieindo eng’ taing’ung’, ingogona ichek oldo eng’ age eng’ nganasokab emoni; si kobiit ameny oloto: amu kalya si komeny otwogindeng’ung’ nganasetab laitoriat, koboten?

⁶ Kogochi anyun Akis inendet Siklag eng’ betunoto: noto anyun, kibunji Siklag laitorinikab Juda agoi ra.

⁷ Ak koitetab betusiek che kimeny Daudi emetab Pilistik ko ki kenyit agenge ak arawek ang’wan.

⁸ Ak kitogosta Daudi ak bikyik kobokyi Gesurik, ak Girsik, ak Amalegik: amu choto ko ki bik che kimenyei emonoto, bik che ki bo keny, eng’ oret ne kibunei kebendi Sur, agoi emetab Misri.

⁹ Ak kibar Daudi emonoto, ama bagakta muren anan kwony kosob, ak kinyaban kechirek ak tuga, ak sigirok, ak tambesik, ak ngoroik; ak kiweek kwo oldab Akis.

¹⁰ Ak kilenji Akis, Kobar ano ra? Ak kile Daudi, Kagibar Murot ne bo Tai ne bo Juda, ak Murot ne bo Tai ne bo Jeramelik, ak Murot ne bo Tai ne bo Kenik.

¹¹ Ma bagakta Daudi muren anan kwony kosob, si maimut koba Gat, amu kile, si ma mwaitech, kole, Kiyai ko u noto Daudi, ak kiyaei ko u noto eng’ bitennyi eng’ betusiek tugul che kimeny emetab Pilistik.

¹² Ak kiiyan Akis ng’alekab Daudi, kole, Kagogochi bikyik Israel kowech inendet inne; noto anyun egu otwogindennyu agoi.