1 SAMUEL 25 - BUKUIT NE TILIL

Meetab Samuel, Daudi, Nabal ak Abigail

¹ Ak kime Samuel; ak kiiyumgei Israel tugul, koba korirji inendet, ak kotupchi gonnyi eng’ Rama. Ak king’eet Daudi, ak kochortagei kwo ong’atetab Paran.

² Ak kimi chito Maon, ne kimi tugukyik Karmel; ak ki toogunot chichoto, ak kitinyei kechirek elfusiek somok, ak ng’ororek elfut agenge: ak kitilei kororikab kechirekyik eng’ Karmel.

³ Kainetab chichoto ko ki Nabal; ak kainetab osotiondennyi ko ki Abigail; ak ki ng’om osotiondonoto, ak kitinyei itondo ne kararan: ago ki uui met chichoto ak ki yaach boisionikyik; ak ki bo oretab Kaleb.

⁴ Ak kigas Daudi eng’ ong’atet kele, tilei Nabal kororikab kechirekyik.

⁵ Ak kiiyokto Daudi murenik taman, ak kilenji Daudi murenjoto, Otogoste Karmel, ak obe ole mi Nabal, ak ogat inendet eng’ kainennyu:

⁶ ak omwachi ko u ni inendet ne meng’isiei eng’ kaberuret, Ingoteb kalyet koboten, ak ingoteb kalyet eng’ gong’ung’, ak ingoteb kalyet koboto tugul che itinye.

⁷ Ak kaagas nguno kele itinye bik che tilei kororikab kechirek: kogotebi mestoweguk kobotech, ama kiyachi kiy ne ya, ama betyi ichek kiy age tugul, eng’ betusiek tugul ye kimi Karmel.

⁸ Teebe murenjotoguget, si komwaun; noto anyun ingonyor chamet murenjoto eng’ taing’ung’; amu kagibwa eng’ betut ne mie: asomin anyun ale, igochi otwogiguk, ak wering’ung’ Daudi, kiy age tugul ne itinye.

⁹ Ak kingoit murenjoto bo Daudi, komwachi Nabal ko u ng’alechato tugul eng’ kainetab Daudi, ak kosisyo.

¹⁰ Ak kiwolji Nabal otwogikab Daudi, kolenji, Daudi ko ng’o? Ak weritab Jesii ko ng’o? Chang’ otwogik betusiechu che mwee chi age tugul kiptaiyandennyi.

¹¹ Araso, kanam amitwogikyuk, ak beekyuk, ak banyek che kaeng’ji bikyuk che tilei kororikab kechirek, ak agochi bik che mangen ole bunu?

¹² Kiwelelgei anyun murenjoto bo Daudi, ak koweektagei, ak kiba komwachi inendet ko u ng’alechuto tugul.

¹³ Ak kilenji Daudi bikyik, Ingorat chi tugul rotwennyi bo chok. Ak kirat chi tugul rotwennyi bo chok; ak kirat Daudi agine rotwennyi bo chok; ak kitogosta murenik olo bo bogol ang’wan kosub Daudi; ak kitebi murenik bogolwogik aeng’u korib tuguk.

¹⁴ Ago kimwachi age eng’ murenjoto Abigail osotiotab Nabal, kolenji, Keero, kiiyok Daudi bik kobwa eng’ ong’atet, kobwa kogat kiptaiyandennyo; ak kinerekyi ichek.

¹⁵ Ago kiyaiywech ne mie kot bichoto, ama amech kiy, ama betwech kiy, ye kita kemi tugul, ye kigimi kewanin:

¹⁶ ak kiek ichek ng’otwennyo eng’ achek kemoi ak bet, betusiek tugul ye kigimitei tugul ak ichek, kiyagi kechirek.

¹⁷ Nai anyun ak ibwat kit ne iyae; amu kigetilji yaitiet kiptaiyandennyo, ak gonnyi tugul: amu inendet ko weritab Belial ne siirtoot, kot ko maimuchi chi kotwekyi.

¹⁸ Kichirjiren anyun Abigail, ak konam makatinik bogol aeng’ ak sotonik aeng’ che bo divaik, ak kechirek mut che kageeny che chobotin, ak kerutik mut che nyiitotin bek che kagegel, ak temenik bogol che mi sabibuk che yaamnyotin, ak makatinik bogol aeng’ che bo mogoonik, ak kiratyi sigirok.

¹⁹ Ak kilenji bikyik, Oba ondoena; ogeero, anyone asubwok. Ago ma mwachi manong’otiondennyi Nabal.

²⁰ Ak ye kita kobunei sigiriennyi, kochortagei kobun ole ma toogu eng’ tulwet, ogeero, kichorugei Daudi ak bikyik kotoorjingei inendet; ak kituiye ichek.

²¹ Kigale Daudi, Kaga, kiarib buch iman tuguk tugul che kitinyei chichi, eng’ ong’atet, kot ko ma bet kiy eng’ tugukyik tugul: ak kagoweekwa yaitiet eng’ ne mie.

²² Ingoyachi Kamuktaindet ko u noto bunikab Daudi, ak kotes, ngot abagakte kiy age tugul ne nenyi mutai kaeech, agot lakwet agenge ne ng’etet.

²³ Ak kingogeer Abigail Daudi, kochorgei kochok eng’ sigiriennyi, ak kobutyi taitab Daudi, kong’uruk kotiing’e toget ng’ony.

²⁴ Ak kiibutyi kelyekyik, ak kolenji, Ingobunja yaitioni, kiptaiyandennyu, ingobunja: ak asain ale, chamji cheptang’ung’ ne otwoget kong’alal igas, ak igasyi cheptang’ung’ ne otwoget, ng’alekyik.

²⁵ Asain kiptaiyandennyu ale, mat iit chichi bo Belial, inendet Nabal: amu ko u kit ne u kainennyi, ko u noto inendet; kainennyi ko Nabal, ak tinyei abusnatet; ago ma ageer ane cheptang’ung’ ne otwogindet, murenjoto bo kiptaiyandennyu che kigeyogu.

²⁶ Ara anyun kiptaiyandennyu, ko u ye sobei Jehovah, ak ko u ye sobei sobondang’ung’, ak ko u ye kietenen Jehovah si metumde korotik, si meyaaktochigei mugetut eng’ eung’ung’, noto anyun, ingoigei buniguk Nabal, ak ichek che cheng’jin yaitiet kiptaiyandennyu.

²⁷ Ingigochi kagochinoni kaipchin otwogindeng’ung’ kiptaiyandennyu, ingigochi murenik che isuboti kiptaiyandennyu.

²⁸ Asain ale, nyochi kaat cheptang’ung’ ne otwogindet, lelutiennyi: amu igimiti Jehovah iman gotab kiptaiyandennyu, amu yaei kiptaiyandennyu lugosiekab Jehovah; ama kinyorjinin yaitiet eng’ betusieguk tugul.

²⁹ Ak nganda ng’eet chi koonatin, ak kocheng’ sobondang’ung’, ko kigiratyi sobondab kiptaiyandennyu ratutietab sobondo koboto Jehovah Kamuktaindeng’ung’; ak wirtoi inendet sobondab buniguk, ko u ye kiwirtoe kondab borowet.

³⁰ Ak ye kagoyachi Jehovah kiptaiyandennyu ko u mieindo tugul ne kimwaitaenen, ak kondein iegu bounindetab Israel;

³¹ ko maegu nito arogenet eng’ inye, ama egu kanagutietab muguleldo eng’ kiptaiyandennyu, ngot ko kiitumde korotik buch, anan ngot ko kigoyaaktochigei mugetut kiptaiyandennyu: ak ye tun kagoyachi Jehovah kiptaiyandennyu kit ne mie, ibwat anyun cheptang’ung’ ne otwogindet.

³² Ak kilenji Daudi Abigail, Iberurot Jehovah, Kamuktaindetab Israel, ne kaiyogun rani, itorokwa:

³³ ak iberurot ng’omnateng’ung’, ak iberurot aginye, ne kaetena rani si matumde korotik, amayaaktochigei mugetut eng’ eunnyu.

³⁴ Amu iman, ko u ye sobei Jehovah Kamuktaindetab Israel, ne kaetena si mayaun kit ne ya, nda ma ichogu itorokwa, ta kama kong’etyin Nabal agot lakwet agenge ne ng’etet, mutai kaeech.

³⁵ Kitaach anyun Daudi tuguk che kiga ipchi inendet, osotiondonoto: ak kilenji Daudi inendet, Togoste ui ga eng’ kalyet; keero, kaagasun ng’aleguk, kaachamin.

³⁶ Ak kiwa Abigail ole mi Nabal; ak keero, kitinyei igorta eng’ gonnyi, ne u igortab laitoriat; ak kibaibai muguleldab Nabal eng’ orinnyi, amu kiga bogit kot: ma mwachi kiy amun inendet, ne ming’in anan ne o, agoi koeech.

³⁷ Ak karon, ko kagogesgei bogitetab Nabal, komwachi osotiondennyi inendet tuguchuto tugul, ak kime muguleldanyi, ak koigei inendet koita.

³⁸ Ak kingogesgei olo bo betusiek taman, kobir Jehovah Nabal, ak kime.

³⁹ Ak kingogas Daudi kole, kagome Nabal, kole, Iberurot Jehovah, ne kigoruokyinewa Nabal agobo chubet ne kichuba, ak kiete otwogindennyi yaitiet: ak kiweekyi Jehovah metitab Nabal yaitiennyi ne kiyai. Ak kiiyokto Daudi keng’alalji Abigal, si komut koek osotiondennyi.

⁴⁰ Ak kingoit otwogikab Daudi ole mi Abigail eng’ Karmel, kong’alalji, kolenji, Kagoyokwech Daudi kebwa ole imi, si kimutin iegu osotiondennyi.

⁴¹ King’eet anyun ak kong’uruk, kotiing’e togennyi ng’ony, ak kole, Keero, otwogindet cheptang’ung’ ne otwogindet ne iuni kelyekab otwogikab kiptaiyandennyu.

⁴² Ak kichirjiren Abigail, ak kong’eet ak kolany sigiriet, koboto tibik mut che kitinyei che kiisub inendet; ak kiwa kosub bikab Daudi, ak kiek osotiondennyi.

⁴³ Kiimut Daudi agine Ainoam ne bo Jesreel; ak kiek tuwai osotikyik.

⁴⁴ Kiga kogochi Saul Mikal cheptanyi, ne ki osotiotab Daudi, Palti weritab Lais, ne ki bo Galim.