1 SAMUEL 24 - BUKUIT NE TILIL

Korire Daudi sobondab Saul eng’ Engedi

¹ Ak kingoweek Saul eng’ kasubet ne kiisubi Pilistik, kemwachi kelenji, Keero, mitei Daudi ong’atetab En-gedi.

² Konam anyun Saul murenik elfusiek somok che kigilewen eng’ Israel tugul, koba kocheng’ Daudi ak bikyik eng’ ruandosiekab sitok.

³ Ak kiit ole mi biusiekab kechirek eng’ oret, ole kimi kebenet; ak kiwa Saul orit, ak kotuch kelyekyik. Kimi Daudi ak bikyik kebenet orit mising’.

⁴ Ak kilenji bikyik Daudi, Keero, betut ne kimwaun Jehovah kole, Keero, andoi bunyondeng’ung’ eung’ung’, ak iyachi kit ne igeere ile mie eng’ inye. King’eet anyun Daudi kwo kotil tabandab ngorietab Saul eng’ ung’ot.

⁵ Ak eng’ let kogas Daudi ng’wanindo eng’ muguleldanyi, amu kagotil tabandab ngorietab Saul.

⁶ Ak kilenji bikyik, Ingolooit eng’ ane eng’ Jehovah si mayachi kiptaiyandennyu ne iilat ne bo Jehovah, kiy ne u ni, si machuul eunnyu ayachi kiy ne ya, amu inendet ko ne iilat ne bo Jehovah.

⁷ Kiete anyun Daudi bikyik ng’alechuto, ama chamji kong’eetyo kobar Saul. Ak king’eet Saul kwo eng’ kebenet, ak kwo bandanyi.

⁸ Yeityo kong’eet Daudi agine, ak kwo eng’ kebenet, ak komwachi Saul eng’ kutit ne o, kole, Kiptaiyandennyu laitoriat. Ak kingogusgong’ Saul, kong’uruk Daudi, kot kotiiny toget ng’ony, kogutung’ji.

⁹ Kolenji Daudi Saul, Amu nee si igas ng’alekab bik, che mwaei kole, Cheng’ei Daudi koyaun kiy ne ya?

¹⁰ Keero, kagogeer konyeguk rani kole kaindein Jehovah rani eunnyu eng’ kebenet: ak kamwawa bik alage kole abarin: ago karirenen; ak kamwa ale, machuule eunnyu abare kiptaiyandennyu; amu inendet ko ne iilat ne bo Jehovah.

¹¹ Kogeny, keero, baba, ee, keer walitab ngorieng’ung’ ne mi eunnyu: amu katil walitab ngorieng’ung’ ak ma abarin, nai anyun ak igeer ile matinye yaitiet anan ko bistoet eng’ eunekyuk, ak tom ayaun tengek, agot nganda icheng’e sobondanyu ibar.

¹² Ingooiyech Jehovah, ak ingoyaaktawa Jehovah mugetut eng’ inye; ago mabarin eunnyu.

¹³ Ko u ye mwaei kalewenetab bik che bo keny, kole, Bunu sogornatet sogoranik: ago mabarin eunnyu.

¹⁴ Kamong’ sang’ laitoriatab Israel koon ng’o? Ione ng’o? Ione seset ne kigome, anan kimitiat?

¹⁵ Ingoek Jehovah kiruogindet, kotilwech kiruoget eng’ kwenunnyo, ane ak inye, ak kogeer, ak kong’alal agobo ane, ak kosorua eng’ eung’ung’.

¹⁶ Ak kingo kagoges Daudi ng’alechu kimwachin Saul, komwa Saul kole, Kuting’ung’ nito, werinnyu Daudi? Ak kiwaach Saul korir.

¹⁷ Ak kimwachi Daudi kolenji, I bo iman isiira: amu kaiyaiywa ne mie, ago kiayaun ne ya.

¹⁸ Ak kaibarte rani ile kaiyaiywa ne mie: amu ko u ye kaindea Jehovah eung’ung’, ko ma ibara.

¹⁹ Amu ngot konyor chi bunyondennyi, kobagaktoi kwo kochamegei? Noto anyun ingogonin Jehovah mieindo agobo noto keyaiywa rani.

²⁰ Nguno anyun, angen ale iegu laitoriat iman, ak kigimiti bounatetab Israel eng’ eung’ung’.

²¹ Iyosiewa anyun eng’ Jehovah ile, meistoi iyotennyu che biitu let eng’ ane, ak ile megesu kainennyu eng’ gotab baba.

²² Ak kiiyosiechi Daudi Saul. Ak kiwa Saul ga; ago kitogosta Daudi ak bikyik koba irimet.