1 SAMUEL 23 - BUKUIT NE TILIL

Komwee Daudi Saul

¹ Ak kigimwachi Daudi kelenji, Keero, baregei Pilistik ak Keila, ak kochorei tuguk eng’ ruanyut ne kiborse.

² Koteebe anyun Daudi Jehovah kolenji, Awe abar Pilistichuto? Ak kilenji Jehovah Daudi, Ui ak ibar Pilistik, ak isoru Keila.

³ Ak kilenji bikyik Daudi, Keero, kiyweisiei eng’ olito bo Juda: ko siirei ne tia anyun ngot kebe Keila kebarge ak lugosiekab Pilistik?

⁴ Koteebe anyun Daudi Jehovah kogeny. Ak kiwolji Jehovah inendet kolenji, Ng’eet, chortege Keila; amu andoi Pilistik euneguk.

⁵ Ak kiwa Daudi Keila koboto bikyik, ak kobargei ak Pilistik, ak koluul tukwak, ak kobar bik eng’ baret ne o. Kisor anyun Daudi bikab Keila.

⁶ Ak kingomwechi Abiatar weritab Aimelek Daudi eng’ Keila, kochorgei kotinyei epod eng’ eunnyi.

⁷ Ak kigimwachi Saul kelenji, Konyo Daudi Keila. Ak kile Saul, Kagonde Kamuktaindet inendet eunnyu; amu kagegerji orit, amu kiwa nganaset ne tinyei ormarichok ak temeleiywek.

⁸ Ak kiguur Saul bik tugul koba luget, kochortagei koba Keila, koba koyiem Daudi ak bikyik.

⁹ Ak kinai Daudi kole, chobei Saul yaitiet agobo inendet; ak kilenji Abiatar tisiindet, Ibu epod konyo yu.

¹⁰ Yeityo komwa Daudi kole, Ee Jehovah, Kamuktaindetab Israel, kagogas iman otwogindeng’ung’ kole, machei konyo Saul Keila, konyo kobar nganaset agobo ane.

¹¹ Tos indea bikab Keila eunnyi? Chorugei Saul, ko u ye kagogas otwogindeng’ung’? Ee, Jehovah, Kamuktaindetab Israel, asomin mising’ ale, mwachi otwogindeng’ung’. Ak kile Jehovah, Chorugei.

¹² Komwa Daudi anyun kole, Tos indea eutab Saul bikab Keila, ane ak bikyuk? Ak kile Jehovah, Indein.

¹³ Kong’eet anyun Daudi koboto bikyik che ki olo bo bogol lo, ak koba eng’ Keila, ak kiba oldo tugul ole kiimuch koba. Ak kigimwachi Saul kelenji, kigomwei Daudi eng’ Keila; ak mata kwo.

¹⁴ Ak kitebe Daudi irimoik eng’ ong’atet, ak kitebe emetab tulonok eng’ ong’atetab Sip. Ak kicheng’ei Saul inendet eng’ betut age tugul, ago ma inde Kamuktaindet inendet eunnyi.

¹⁵ Ak kigeer Daudi kole kagonyo sang’ Saul kocheng’ sobondanyi: ak kimi Daudi ong’atetab Sip eng’ osnet.

¹⁶ Ak king’eet Jonatan weritab Saul, ak kwo ole mi Daudi eng’ osnet, ak kogimit inendet eng’ Kamuktaindet.

¹⁷ Ak kilenji inendet, Ameiywei: amu manyorun eutab Saul baba; ak iegu laitoriat eng’ Israel, ak aegu ne rubin; ak ingen noto agine Saul kwandanyu.

¹⁸ Ak kiiyomisgei tuwai eng’ taitab Jehovah: ak kitebe Daudi osnet, ak kwo Jonatan gonnyi.

¹⁹ Kibwa anyun Sipik kotogos ole mi Saul, eng’ Gibea, kobwa kolenji, Tos maunyegei Daudi eng’ olinnyo eng’ irimoik che mi osnet, eng’ tulwetab Hakila, ne mi murot ne bo tai ne bo ong’atet?

²⁰ Ara anyun, ee laitoriandani, choruge, ko u maget tugul ne bo sobondang’ung’ ichoruge; ak boisiennyo ko kinde inendet eutab laitoriat.

²¹ Ak kile Saul, Ingoberurok Jehovah; amu kaorirena.

²² Asomok anyun ale oba ocheng’ komie, ak onai ak ogeer ole mi, ak inendet ne kigeerei eng’ oloto: amu kigimwawa kele boisie ng’alset.

²³ Ogeer anyun ak onai komoswek tugul ole ung’egei, ak obwa kogeny yu ami, oibu ng’alek che bo iman, si kebe tugul: ak ngot komi emoni, acheng’oti eng’ elfusiek tugul che bo Juda.

²⁴ Ak king’eetyo koba Sip kondoe Saul; ago kimi Daudi ak bikyik ong’atetab Maon, eng’ Araba murot ne bo tai ne bo ong’atet.

²⁵ Ak kiba Saul ak bikyik koba kocheng’ inendet. Ak kigimwachi Daudi: kichorgei anyun konyo ole mi ruandet, ak kitebe ong’atetab Maon. Ak kingogas Saul, kwo kosub Daudi eng’ ong’atetab Maon.

²⁶ Ak kibun Saul tulwet komosi, ak kibun Daudi ak bikyik tulwet komosin: ak kichakta Daudi komwei amu kiiywei Saul; amu kiyiem Saul ak bikyik Daudi koboto bikyik kole konam.

²⁷ Ago kinyo chi komwachi Saul kolenji, Nyo chogu, amu kagobokyi emet Pilistik.

²⁸ Kiweek anyun Saul mata kosub Daudi, ak kiwa kobargei ak Pilistik: kiguure yoto anyun Sela-hamalekot.

²⁹ Ak kitogosta Daudi eng’ yoto, kwo komeny irimoikab En-gedi.