1 SAMUEL 22 - BUKUIT NE TILIL

Komi Daudi kebenetab Adulam

¹ Kiwa Daudi anyun eng’ oloto, kochilil kwo kebenetab Adulam: ak kingogas tupchosiekyik ak bik tugul che bo gotab kwandanyi, kochortagei koba ole mi.

² Ak kiiyumjigei inendet chi age tugul ne kinyalili, ak age tugul ne kitinyei besendo, ak age tugul ne kitinyei ng’wanindo eng’ muguleldanyi; ak kiek kiptaiyandenywa: ak kimi ak inendet murenik olo bo bogol ang’wan.

³ Ak kiwa eng’ oloto Daudi kwo Mispe ne bo Moab, kolenji laitoriatab Moab, Asomin ale, chamji baba ak kamennyu kobwa otebi tugul, agoi anai kit ne yaiywa Kamuktaindet.

⁴ Ak kiimut ichek kobwa taitab laitoriatab Moab: ak kimeng’is ak inendet betusiek tugul che kimi Daudi kebenet.

⁵ Ak kilenji maotiot Gad Daudi, Amat itebe kebenet; ui, ak iwe emetab Juda. Kwo anyun Daudi, ak kiit osnetab Heret.

⁶ Ak kigas Saul kole kigenyor Daudi, koboto murenik che kimi ak inendet: ak kitebi Saul eng’ Gibea, ketit kel eng’ Rama, kotinyei ng’otit eng’ eunnyi, ak kotonondos otwogikyik eng’ ye negite inendet.

⁷ Ak kilenji Saul otwogikyik che kitonondos eng’ ye negite inendet, Ogas nguno, okwek Benjaminik; tos igochi weritab Jesii chi age tugul eng’ okwek mbarenik ak mbarenikab sabibuk, tos yaok okwek tugul egu kiptainikab elfusiek ak kiptainikab bogolwogik;

⁸ kot ochaama okwek tugul? Ma biit agot agenge ne ng’ang’wa ye yaei arorutiet werinnyu ak weritab Jesii, ama mi chi eng’ okwek ne rirena, anan ko ne ng’ang’wa kole kogong’eet werinnyu otwogindennyu kosuriena, kosapcha, ko u rani?

⁹ Kowol anyun Doeg Edomindet, ne kitononi eng’ ye negite otwogikab Saul kole, Kiageer weritab Jesii konyonei Nob, ole mi Aimelek weritab Aitub.

¹⁰ Ak kiteepsechi eng’ Jehovah agobo inendet, ak kogochi inendet amitwogik, ak kogochi rotwetab chok ne ki bo Goliat Pilistindet.

¹¹ Kiiyokto anyun laitoriat keguur tisiindet Aimelek, weritab Aitub, ak bik tugul che bo gotab kwandanyi, tisiik che kimi Not: ak kibwa ichek tugul ole mi laitoriat.

¹² Ak kile Saul, Kas nguno inye, weritab Aitub. Ak kiwol kole, Ami yu, kiptaiyandennyu.

¹³ Ak kimwachi Saul inendet kolenji, Amu nee si ochaama, inye, ak weritab Jesii, kiigochi inendet makatinik, ak rotwetab chok, ak kiiteepsechi inendet eng’ Kamuktaindet, si kong’eetya, koboriena, kosapcha, ko u rani?

¹⁴ Kowolji anyun Aimelek laitoriat kolenji, Ago ng’o eng’ otwogiguk tugul ne bo iman ko u Daudi ne sandetab laitoriat, ne kiginem kwo kapkiruogeng’ung’, ak ko konyitot eng’ gong’ung’?

¹⁵ Tos katau rani ateepsechi inendet eng’ Kamuktaindet? Ingolooit eng’ ane: amat koiityi laitoriat kiy age tugul otwogindennyi, anan got tugul ne bo baba: amu maingen otwogindeng’ung’ agobo ng’alechu tugul che ng’ering’ anan ngo che chang’.

¹⁶ Ak kile laitoriat, Imee iman, inye Aimelek, ak bik tugul che bo gotab kwandang’ung’.

¹⁷ Ak kilenji laitoriat ribik che kitonondos eng’ ye negite inendet, Owelelge ak obar tisiikab Jehovah; amu ting’egei agichek yamdaet ak Daudi, amu kiingen kole kimwei, ama ng’ang’wa. Ago ma cham otwogikab laitoriat koiito eunekwak kobar tisiikab Jehovah.

¹⁸ Ak kilenji laitoriat Doeg, Welelge inye, ak ibar tisiik. Kiwelelgei anyun Doeg Edomindet, ak kobar tisiik, ak kibar eng’ betunoto bik tamanwogik sisiit ak mut che kiilachi epod ne bo katanit.

¹⁹ Ak kibar Nob, nganasetab tisiik, eng’ rotwetab chok, murenik ak gotab kor, lagok ak che reriei, ak tuga koboto sigirok ak kechirek.

²⁰ Ak kichilil age eng’ werikab Aimelek weritab Aitub, ne kigiguure Abiatar, ak komwei kosub Daudi.

²¹ Ak kimwachi Abiatar Daudi kolenji, Kogobar Saul tisiikab Jehovah.

²² Ak kilenji Daudi Abiatar, Kiganai eng’ betunoto, ye kimi yoto Doeg Edomindet, ale mwachin iman Saul: koaipchi meet bik tugul che bo gotab kwandang’ung’.

²³ Tebi kobota, ameiyweisie; amu inendet ne cheng’ei sobondanyu kocheng’ei sobondang’ung’: amu ngemi tuwai ko i ribot.