1 SAMUEL 21 - BUKUIT NE TILIL

Komwechin Daudi Nob ak Gat

¹ Konyo anyun Daudi Nob oldab Aimelek tisiindet: ak kinyo Aimelek kotorok Daudi kobotanonu, ak kolenji, Amu nee si imi inyege, ama mi chi ne omi tuwai?

² Ak kilenji Daudi Aimelek tisiindet, Kang’ata laitoriat agobo ng’olyo, ak kolenja, Matingonai chi agobo ng’olyondonito kayoktochin, anan agobo kit ne kang’atin: ak kang’at murenik koba ole kile.

³ Ara anyun, itinye nee eng’ eung’ung’? Kona makatinik mut kobwa eunnyu, anan ko kit age tugul ne itinye.

⁴ Ak kiwolji tisiindonoto Daudi kolenji, Mami makatinik che maitabanotin, kobate mi makatinik che tililen; ngot ko koripgei murenjoto eng’ kwonyik.

⁵ Ak kiwolji Daudi tisiindonoto kolenji, Iman, kogitabanenech kwonyik eng’ betusiechu somok; ye kiamong’u ko kiitabanotin tugukab murenik, agot ngo bandab betusiek tugul; kotabanotin tugukwak ra ne tia?

⁶ Kogochi anyun tisiindet inendet makatinik che itabanotin: amu kima komi makatinik alage kobate makatinik che bo kabartaet, che kiginemu eng’ taitab Jehovah, si kinde makatinik che kabunu ma eng’ betut ne kagiisto che kami.

⁷ Kimi yoto chito age ne bo otwogikab Saul eng’ betunoto, ne kigirany kotebi eng’ taitab Jehovah; ak kainennyi ko ki Doeg, Edomindet, ne ki o eng’ mestowekab Saul.

⁸ Ak kimwachi Daudi Aimelek, kolenji, Metinye eng’ yu ng’otit anan ko rotwetab chok eng’ eung’ung’? Amu maibu rotwennyu anan ko karikyuk, amu komachei boisietab laitoriat kechokyi.

⁹ Ak kile tisiindonoto, Keero, Mi yu rotwetab chok ne bo Goliat Pilistindoni kiibare eng’ atebwetab Ela, kigitaae anget ak mitei eng’ batetab epod: ngot imache iib noto, iib: amu mami age yu kobate noto. Ak kile Daudi, Mami age ne u noto; kona noto.

¹⁰ Ak king’eet anyun Daudi, komwei betunoto amu kiiywei Saul, ak kwo oldab Akis laitoriatab Gat.

¹¹ Ak kilenji otwogikyik Aksi, Ma Daudi nito laitoriatab emet? Tos kima tienjigei ichek agobo inendet eng’ ureriosiek, kole, Kibar Saul elfusiekyik, Ak kibar Daudi tamanusiekab elfusiek?

¹² Ak kigonor Daudi ng’alechuto eng’ muguleldanyi, ak kiiywei mising’ Akis laitoriatab Gat.

¹³ Ak kiwal atebennyi eng’ tainywa, ak kiyaigei koek kibiywet eng’ eunekwak, ak kisirasir kurgotikab ormarichet, ak kibagakta ng’ulekyik kochortaegei tamnet.

¹⁴ Kilenji anyun Akis otwogikyik, Ogeero, ogeere ole kibiywo chichi: amu nee anyun si omutwa?

¹⁵ Tos korarua kibionik, kot omutwa chichi konyo koiiywen eng’ tainnyu? Nyonei chichi gonnyu?